ចៅក្រមសម្រេចហើយ ក្រោយស្ត្រីអាជីវករម្នាក់ត្រូវដីកាបង្គាប់ឲ្យចូលខ្លួន២លើក មិនព្រមចូល
- ភ្នំពេញ
ស្ត្រីអាជីវករម្នាក់ ត្រូវសមត្ថកិច្ចនគរបាលខេត្តសៀមរាប សហការជាមួយនគរបាលរាជធានីភ្នំពេញ ធ្វើការចាប់ខ្លួន
ខេត្តសៀមរាប ៖ ស្ត្រីអាជីវករម្នាក់ ត្រូវសមត្ថកិច្ចនគរបាលខេត្តសៀមរាប សហការជាមួយនគរបាលរាជធានីភ្នំពេញ ធ្វើការចាប់ខ្លួន កាលពីថ្ងៃទី៨ ខែឧសភា ឆ្នាំ២០២៣ នៅខេត្តសៀមរាប ខណៈពេលស្ត្រីអាជីវកររូបនេះ មិនចូលខ្លួនតាមដីកាបង្គាប់ឲ្យចូលឆ្លើយចំនួន២លើក របស់ចៅក្រមស៊ើបសួរសាលាដំបូងរាជធានីភ្នំពេញ ពីបទ «រំលោ.ភលើទំនុកចិត្ត» ចុងក្រោយនៅតែគេចមិនផុតពីការចាប់ខ្លួនដដែល។
ជនសង្ស័យខាងលើនេះ មានឈ្មោះ ជីវ ណារ៉ា ភេទស្រី អាយុ៣៦ឆ្នាំ មុខរបរលក់ដូរ មានទីលំនៅភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប។ ក្រោយពីចាប់ខ្លួន សមត្ថកិច្ចនគរបាលខេត្តសៀមរាប ប្រគល់ជនសង្ស័យរូបនេះ ឲ្យទៅនគរបាលព្រហ្មទណ្ឌកម្រិតស្រាលរាជធានីភ្នំពេញ ដើម្បីនាំខ្លួនទៅប្រគល់ជូនចៅក្រមស៊ើបសួរសាលាដំបូងរាជធានីភ្នំពេញ ដែលបានចេញដីកាបង្គាប់ឲ្យចាប់ខ្លួនស្ត្រីអាជីវកររូបនេះ។
តាមសមត្ថកិច្ចឲ្យដឹងថា នគរបាលរាជធានីភ្នំពេញ សហការជាមួយនគរបាលខេត្តសៀមរាប បានអនុវត្តតាមអនុវត្តដីកាបង្គាប់ឲ្យចាប់ខ្លួនលេខ ២៥១ ដ.ច.ន ចុះថ្ងៃទី១៤ ខែមីនា ឆ្នាំ២០២៣ របស់លោក សាន ប៊ុនធឿន ចៅក្រមស៊ើបសួរសាលាដំបូងរាជធានីភ្នំពេញ ទៅលើឈ្មោះ ជីវ ណារ៉ា ភេទស្រី អាយុ៣៦ឆ្នាំ រស់នៅភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប។ ដោយត្រូវបានចោទប្រកាន់ពីបទ «រំលោ.ភលើទំនុកចិត្ត» ដែលប្រព្រឹត្តនៅចំណុចសណ្ឋាគារ DYVITH HOTEL ស្ថិតក្នុងសង្កាត់ភ្នំពេញថ្មី ខណ្ឌសែនសុខ កាលពីថ្ងៃទី១៧ និងថ្ងៃទី៣០ ខែវិច្ឆិកា ឆ្នាំ២០១៩ នៅរាជធានីភ្នំពេញ ដែលបទល្មើសនេះមានចែងឲ្យផ្តន្ទាទោសតាមបញ្ញតិមាត្រា ៣៩១ និងមាត្រា ៣៩២ នៃក្រមព្រហ្មទណ្ឌ។
សមត្ថកិច្ចបន្តទៀតថា ជនត្រូវចោទត្រូវបានចៅក្រមស៊ើបសួរចេញដីកាបង្គាប់ឲ្យចូលខ្លួនចំនួន២លើក ក្នុងអំឡុងខែមករា ឆ្នាំ២០២៣ ប៉ុន្តែមិនឃើញចូលមកឆ្លើយបំភ្លឺដោះសារ ដោយរត់គេចខ្លួនមិនដឹងទៅទីណា។ ហើយបទចោទប្រកាន់ខាងលើនេះ ជាបទមជ្ឍឹម ដែលអាចផ្តន្ទាទោសដាក់ពន្ធនាគារលើសពីមួយឆ្នាំ ហេតុនេះដើម្បីធានាដល់យន្តការច្បាប់អនុវត្តឲ្យមានប្រសិទ្ធភាព ចៅក្រមស៊ើបសួរគប្បីសម្រេចចេញដីកាបង្គាប់ឲ្យចាប់ខ្លួន។
លុះនារសៀលថ្ងៃទី៩ ខែឧសភា ឆ្នាំ២០២៣ នេះ នគរបាលព្រហ្មទណ្ឌកម្រិតស្រាលរាជធានីភ្នំពេញ ក៏បានបញ្ជូននជនសង្ស័យខាងលើនេះ ទៅកាន់សាលាដំបូងរាជធានីភ្នំពេញ ដើម្បីប្រគល់ជូនចៅក្រមស៊ើបសួរ តាមដីកាបង្គាប់ឲ្យចាប់ខ្លួននោះតែម្តង។
ក្រោយពីសាកសួរអស់រយៈពេលជាច្រើនម៉ោង ចៅក្រមសម្រេចចេញដីកាឃុំខ្លួនជនត្រូវចោទខាងលើនេះ ដាក់ពន្ធនាគារ «មណ្ឌលអប់រំកែប្រែម២» ព្រៃ.ស ជាបណ្តោះអាសន្ន ដើម្បីរង់ចាំបើកសវនាការផ្តន្ទាទោសតាមច្បាប់ជាធរមាន៕
ចែករំលែកព័តមាននេះ