តំណាងអយ្យការអមសាលាដំបូងរាជធានីភ្នំពេញ បានចេញដីកាបញ្ជាឲ្យឈ្មួញរកស៊ីទិញលក់ដីធ្លី និងសាងសង់ផ្ទះល្វែងលក់ម្នាក់ ចូលខ្លួនទៅឆ្លើយបំភ្លឺពាក់ព័ន្ធលើករណី «មិនបំពេញកាតព្វកិច្ចចំពោះឧបករណ៍អាចជួញដូរបាន» ដោយ
រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ បានចេញដីកាបញ្ជាឲ្យឈ្មួញរកស៊ីទិញលក់ដីធ្លី និងសាងសង់ផ្ទះល្វែងលក់ម្នាក់ ចូលខ្លួនទៅឆ្លើយបំភ្លឺពាក់ព័ន្ធលើករណី «មិនបំពេញកាតព្វកិច្ចចំពោះឧបករណ៍អាចជួញដូរបាន» ដោយប្រើប្រាស់សែកស្អុយប្រមាណជាង១០ម៉ឺនដុល្លារអាមេរិក។ ប៉ុន្តែបុគ្គលរូបនោះ មិនបានចូលខ្លួនតាមដីកាបញ្ជាទេ ទើបតំណាងអយ្យការសម្រេចឲ្យសមត្ថកិច្ចកងរាជអាវុធហត្ថរាជធានីភ្នំពេញនាំខ្លួន ស្មើនឹងចាប់ខ្លួន ដើម្បីយកមកសាកសួរពាក់ព័ន្ធលើការចោទប្រកាន់នោះ។
ជនសង្ស័យខាងលើនេះ មានឈ្មោះ ម៉ាញ សុចិន្តា ភេទប្រុស អាយុ៤១ឆ្នាំ មុខរបររកស៊ីទិញលក់ដីធ្លី ស្នាក់នៅផ្ទះលេខ៤៣ ស្ថិតក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
តាមដីកាបញ្ជាឲ្យចូលខ្លួនលេខ១៩០ អ.យ.គ របស់លោក ហេង ផេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបញ្ជាក់ថា ឈ្មោះ ម៉ាញ សុចន្តា ត្រូវចូលខ្លួនឲ្យបានមុនថ្ងៃទី១៩ ខែឧសភា ឆ្នាំ២០២៣ នៅរៀងរាល់ម៉ោងធ្វើការ ដើម្បីសាកសួរ និងស្តាប់ចម្លើយពីដំណើររឿង «មិនបំពេញកាតព្វកិច្ចចំពោះឧបករណ៍អាចជួញដូរបាន» ដែលប្រព្រឹត្តនៅរាជធានីភ្នំពេញ។ ប៉ុន្តែដោយសារតែជនសង្ស័យមិនគោរពតាមដីកាបញ្ជាឲ្យចូលខ្លួន ចំនួន២លើករួចមកហើយនោះ និងបានព្យាយាមគេចខ្លួច ទើបតំណាងអយ្យការសម្រេចឲ្យសមត្ថកិច្ចកងរាជអាវុធហត្ថនាំខ្លួនតែម្តងទៅ ។
ហើយសំណុំរឿងខាងលើនេះ គឺបានស្ថិតនៅដំណាក់កាលស្ថាប័នអយ្យការអមសាលាដំបូងរាជធានីភ្នំពេញ កំពុងបើកការស៊ើបសួរ៕
ចែករំលែកព័តមាននេះ