រាជធានីភ្នំពេញ៖ រឿងរ៉ាវលោកនាយឧត្តមសេនីយ៍ សៅ សុខា មេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានប្រកាសលាលែងតំណែងជាប្រធានសហព័ន្ធកីឡាបាល់ទាត់កម្ពុជាភ្លាមៗនៅយប់ថ្ងៃអាទិត្យ ទី៧ ឧសភា ក្រោយកម្ពុជាចាញ់មីយ៉ានម៉ា ២-០…
រាជធានីភ្នំពេញ៖ រឿងរ៉ាវលោកនាយឧត្តមសេនីយ៍ សៅ សុខា មេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានប្រកាសលាលែងតំណែងជាប្រធានសហព័ន្ធកីឡាបាល់ទាត់កម្ពុជាភ្លាមៗនៅយប់ថ្ងៃអាទិត្យ ទី៧ ឧសភា ក្រោយកម្ពុជាចាញ់មីយ៉ានម៉ា ២-០ ។ កាន់តែក្តៅគគុក បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា អំពាវនាវនាយឧត្តមសេនីយសៅ សុខា ឲ្យបន្តដឹកនាំកីឡាបាល់ទាត់កម្ពុជាតទៅទៀត ។
តាមរយៈសារសម្លេងរយៈពេលប្រមាណជាង៦នាទីជូនចំពោះឯកឧត្តមនាយឧត្តមសេនីយ៍ សៅ សុខា ក៏ដូចជាកីឡាករ កីឡាការិនី បាល់ទាត់ទាំងអស់ ព្រមទាំងប្រជាពលរដ្ឋដែលសេ្នហាកីឡាបាល់ទាត់ សម្តេចតេជោ បានបញ្ជាក់ថា កាលពីម្សិលមិញ បន្ទាប់ពីការបញ្ចប់ការប្រកួតបាល់ទាត់ដែលលទ្ធផល កម្ពុជា ចាញ់មីយ៉ានម៉ា នោះ នាយឧត្តមសេនីយ៍ សៅ សុខា បានសុំលាលែងចេញពីតំណែង។ ដូច្នេះ សម្តេចបានបញ្ជាក់ថា សម្តេចបានសង្កេតឃើញថា បន្ទាប់ពីការ ទទួលបានព័ត៌មាននេះ មានមនុស្សជាច្រើនបាន «បង្ហាញនូវការខកចិត្ត និងបង្ហាញនូវការសោកស្តាយចំពោះ នាយឧត្តមសេនីយ៍ សៅ សុខា ដែលធ្លាប់បានដឹកនាំ បង្កើតនូវការរីកចម្រើនរបស់កីឡាបាល់ទាត់កម្ពុជា»។
«ខ្លួនខ្ញុំផ្ទាល់ ក៏សូមចូលរួមសម្តែងនូវការសោកស្តាយនេះផងដែរ និងធ្វើការកត់សម្គាល់ថា ចាប់តាំងពី នាយឧត្តមសេនីយ៍ សៅ សុខា បានទទួលនូវមុខតំណែងនេះ កីឡាបាល់ទាត់កម្ពុជា មានការរីកចម្រើន ឈានឡើងជាលំដាប់ ទោះបីជាការលេងរបស់យើងមានលទ្ធផលមិនដូចការចង់បានរបស់យើងចង់បាន តែយើងបានដើរចេញពីចំណុច ដែលយើងមិនធ្លាប់មានកាលពីពេលមុន»។ នេះជាការបញ្ជាក់របស់សម្តេច តេជោ ហ៊ុន សែន។
សម្តេចនាយករដ្ឋមន្ត្រីបានបន្តថា «ខ្ញុំគួរតែបញ្ជាក់ថា មានប្រទេសច្រើនណាស់ ដែលកីឡាបាល់ទាត់មិនអាចទទួលបាននូវលទ្ធផលល្អ។ ប្រទេសខ្លះមានប្រជាជនដល់ទៅជាង ១ ពាន់លាននាក់ រាប់រយលាននាក់ ក៏បាល់ទាត់របស់គេមិនខ្លាំងដែរ។ យើងមានប្រជាជនត្រឹមតែជាង ១៦ ទៅ ១៧លាននាក់យើងធ្វើបានប៉ុណ្ណោះ គឺធ្វើបានល្អណាស់ហើយ ក្នុងកែវភ្នែកប្រជាជនយើង ដែលកីឡាបាល់ទាត់របស់យើងធ្លាប់តែនៅក្នុងបាតតារាង ប៉ុន្តែយើងក៏ធ្លាប់ឈ្នះ ធ្លាប់ទទួលបានលទ្ធផលល្អប្រសើរ»។
សម្តេចតេជោ បានសង្កត់ធ្ងន់ថា «ដូច្នេះ ក្នុងឋានៈជានាយករដ្ឋមន្ត្រីនៃព្រះរាជាណាចក្រកម្ពុជា ខ្ញុំអំពាវនាវចំពោះនាយឧត្តមសេនីយ៍ សៅ សុខា បន្តធ្វើជាប្រធានសហព័ន្ធកីឡាបាល់ទាត់កម្ពុជា តទៅទៀត។ ហើយនេះមិនមែនជាបញ្ហាដាច់ដោយឡែករបស់ខ្ញុំ តែនេះជាបញ្ហារួម ដែលរាជរដ្ឋាភិបាល ខ្ញុំតំណាងឱ្យរាជរដ្ឋាភិបាល អំពាវនាវឱ្យនាយឧត្តមសេនីយ៍ សៅ សុខា បន្តតួនាទីនេះ ជាមួយនឹងការចង់បានរបស់កីឡាករ កីឡាការិនីបាល់ទាត់ និងប្រជាពលរដ្ឋដែលគាំទ្រកីឡាបាល់ទាត់ផងដែរ»។
សូមរម្លឹកថា តាមរយៈហ្វេសប៊ុក មានឈ្មោះថា G Sao Sokha ដែលគេដឹងថា ជាហ្វេសប៊ុករបស់លោកនាយឧត្តមសេនីយ៍ សៅ សុខា បានប្រកាសថា «បន្ទាប់ពីបរាជ័យ ក្នុងការប្រកួតចម្រុះ ក្នុងពូលA ក្នុងព្រិត្តិការណ៍ sea games ខ្ញុំគោរពនូវការសន្យា ដើម្បីបង្ហាញនូវស្មារតីទទួលខុសត្រូវ ខ្ញុំសូមប្រកាសលាលែងពីតំណែងប្រធានសហព័ន្ធកីឡាបាល់ទាត់កម្ពុជា ចាប់ពីរាត្រីថ្ងៃអាទិត្យ ទី០៧ ខែឧសភា ឆ្នាំ២០២៣ ខ្ញុំសូមប្រគល់ជូនលោកឧ. ខៀវ សាម៉េត អនុប្រធានស.ប.ក ជាប្រធានស្តីទី ចាប់ពីពេលនេះតទៅ។
ខ្ញុំសូមអរគុណឯកឧត្តមរដ្ឋមន្ត្រីក្រសួងអប់រំយុវជន និងកីឡា និងបងប្អូន ដែលបានបញ្ចេញមតិគាំទ្រខ្ញុំ អោយបន្តដំណែងជាប្រធានសហព័ន្ធកីឡាបាល់ទាត់កម្ពុជា ព្រមទាំងសូមអភ័យទោស ដែលរូបខ្ញុំបាទ ពុំអាចនាំកិត្តិយសជូនជាតិបាន តាមរយៈការប្រកួតបាល់ទាត់ ក្នុងព្រិត្តិការណ៍ ដែលកម្ពុជា ធ្វើជាម្ចាស់ផ្ទះ។ ខ្ញុំសូមអរគុណលោកអនុប្រធាន សមាជិកគណៈកម្មាធិការប្រតិបត្តិស.ប.ក និងមន្ត្រីបុគ្គលិកទាំងអស់ ដែលបានរួមជាមួយខ្ញុំបាទ ធ្វើការងារលើវិស័យកីឡាបាល់ទាត់កន្លងមក។ ខ្ញុំសូមជូនពរអ្នកទាំងអស់គ្នា មានសុខភាពល្អ ចម្រុងចម្រើន មានសុភមង្គលគ្រប់ក្រុមគ្រួសារ និងជួបប្រទះតែសំណាងល្អជានិច្ច៕ ដោយក្តីគោរពពីខ្ញុំបាទ ឧ. សៅ សុខា»។
សូមរម្លឹកថា ក្រុមបាល់ទាត់កម្ពុជា ( បុរស អាយុក្រោម ២២ឆ្នាំ ) ក្នុងការប្រកួតនៅយប់ថ្ងៃអាទិត្យ ទី៧ ឧសភានេះ បានចាញ់មីយ៉ាន់ម៉ា ២-០។ កម្ពុជា នៅសល់ ១ប្រកួតទៀត ដោយត្រូវជួបឥណ្ឌូនេស៊ី នៅម៉ោង ៧យប់ ថ្ងៃទី១០ ខែឧសភា ឆ្នាំ២០២៣ នៅក្នុងពូល A។ ឆ្លងកាត់ ៣ប្រកួតកន្លងមក កម្ពុជា ទទួលបាន ៤ពិន្ទុ ខណៈឥណ្ឌូនេស៊ី ៣ប្រកួតកន្លងមក ឈ្នះទាំង ៣ប្រកួត មាន ៩ពិន្ទុ។ មីយ៉ាន់ម៉ា ៦ពិន្ទុ។ ទីម័រខាងកើត ៣ពិន្ទុ និងហ្វីលីពីន ១ពិន្ទុ។ ក្នុងការប្រកួតជាមួយឥណ្ឌូនេស៊ី នាម៉ោង ៧យប់ថ្ងៃទី១០ឧសភា គឺកម្ពុជាយើង ត្រូវការឈ្នះ។ រីឯមីយ៉ាន់ម៉ា ត្រូវជួបហ្វីលីពីន ដែលជាក្រុមបាតតារាង ក្នុងពូល A។ នៅថ្ងៃទី១០ឧសភា បើកម្ពុជា ឈ្នះឥណ្ឌូនេស៊ី ហើយមីយ៉ាន់ម៉ាស្មើ ឬក៏ចាញ់ហ្វីលីពីន ទើបអាចឡើងទៅវគ្គពាក់កណ្តាលផ្តាច់ព្រ័ត្រ៕
ចែករំលែកព័តមាននេះ