ខេត្តកំពង់ចាម ៖ រថយន្តបែនដឹកដីធុនធំ១គ្រឿង ពាក់ស្លាកលេខភ្នំពេញ 3A-1916 ដែលទ្វាររថយន្តមានបិទឡូហ្គោរបស់ក្រុមហ៊ុន «ធីធីវ៉ាយអភិវឌ្ឍន៍ដំណាំកសិកម្ម និងអាហរ័ណនីហរ័ណ» បានជួបនឹងឧប្បត្តិហេតុគ្រោះថ្នាក់នៅលើកំណាត់ផ្លូវជាតិលេខ៧ចំណុចផ្លូវបំបែកក្រែកជីមាន់ ស្ថិតនៅភូមិក្រែកខាងត្បូង ឃុំក្រែក ស្រុកពញាក្រែក
ខេត្តកំពង់ចាម ៖ រថយន្តបែនដឹកដីធុនធំ១គ្រឿង ពាក់ស្លាកលេខភ្នំពេញ 3A-1916 ដែលទ្វាររថយន្តមានបិទឡូហ្គោរបស់ក្រុមហ៊ុន «ធីធីវ៉ាយអភិវឌ្ឍន៍ដំណាំកសិកម្ម និងអាហរ័ណនីហរ័ណ» បានជួបនឹងឧប្បត្តិហេតុគ្រោះថ្នាក់នៅលើកំណាត់ផ្លូវជាតិលេខ៧ចំណុចផ្លូវបំបែកក្រែកជីមាន់ ស្ថិតនៅភូមិក្រែកខាងត្បូង ឃុំក្រែក ស្រុកពញាក្រែក កាលពីវេលាម៉ោង១១ និង៣០នាទីព្រឹកថ្ងៃទី៣០ មេសា ដោយក្រឡាប់បះជើងដេកស្តូកស្តឹងលើរង្វង់មូល ។ អ្វីដែលគួរ ឱ្យកត់សម្គាល់ គឺពេលដែលរថយន្តក្រឡាប់គេឃើញក្អួតចេញមកសុទ្ធតែឈើគ្រញូង រាប់ពាន់កំណាត់ដែលបម្រុងលោតឆត្រចេញទៅតំបន់ព្រំដែនវៀតណាម។ ក្រោយពេលក្រឡាប់ត្រូវបានប្រជាពលរដ្ឋរាប់រយនាក់ពពាក់ពពូននាំគ្នារត់ទៅដណ្តើមយក អ្នកខ្លះបានលើកដាក់លើរថយន្តអ្នកដំណើរ និងលើកដាក់លើម៉ូតូ សូម្បីតែកម្លាំងសមត្ថកិច្ចនគរបាលចរាចរ និងកងរាជអាវុធហត្ថ ក៏មិនអាចទប់ស្តាត់បានដែរ ។
លោកអនុសេនីយ៍ទោអាំ សុផល អធិការរងនគរបាលស្រុកពញាក្រែកទទូលផែនសេនាធិការ បានប្រាប់ឱ្យដឹងថា នៅក្រោយឧប្បត្តិហេតុបានបន្តិចត្រូវបានប្រជាពលរដ្ឋរាយការណ៍មករូបលោក ពេលដែលទទូលបាននូវព័ត៌មាននេះភ្លាមរូបលោកបានដឹកនាំកម្លាំងក្រោមឱវាទចុះទៅជាបន្ទាន់ ដើម្បីជួយសម្រួលដល់ការធ្វើដំណើរមិនឱ្យមានការកកស្ទះនៅលើដងផ្លូវ។
លោកអធិការរងទទូលផែនសេនាធិការ បានប្រាប់បន្តថា ក្នុងខណៈពេលដែលរូបលោកបានទៅដល់កន្លែងកើតហេតុនោះ បានឃើញប្រជាពលរដ្ឋរាប់រយនាក់កំពុងតែចូលទៅរើសយកកំណាត់ឈើគ្រញូងដែលគេច្នៃប៉ុនកំភួនជើងរាងបួនជ្រុងមានតូចមានធំ ទោះបីជាខិតខំស្រែកហាមឃាត់ឡើងតឹងសរសៃកយ៉ាងណាក្តី ក៏មិនមានអ្នកណាស្តាប់ដែរ គឺគិតតែពីនាំគ្នារើជញ្ជូនយកទៅយ៉ាងប្រញាប់ប្រញាល់ សូម្បីតែក្រុមអ្នករត់ម៉ូតូឌុបក៏បានមករើសយកដែរ ។ មិនតែប៉ុណ្ណោះទេ រថយន្តដឹកអ្នកដំណើរពេលដែលបើកមកឃើញបែបនេះ បានបង្អង់ល្បឿនឈប់ហើយនាំគ្នាចុះមករើសយកកំណាត់ឈើគ្រញូងបីបួនដុំម្នាក់ហើយឡើងជិះរថយន្តបើកចេញបាត់ទៅ គឺយកម៉ាសេរី ។
ចំពោះកំណាត់ឈើគ្រញូងដែលនៅសេសសល់ប្រហែលជា៣០ដុំតូចៗត្រូវបានរឹបអូសនិងបានហៅរថយន្តមកស្ទូចយករថយន្តបែនដែលក្រឡាប់ លើកបញ្ឈរវិញ បើកយកមករក្សាទុកនៅអធិការដ្ឋាននគរបាលស្រុកពញាក្រែកដើម្បីទុកដោះស្រាយតាមច្បាប់ព្រោះតែបានបង្កឱ្យខូចទ្រព្យសម្បត្តិសាធារណៈបែកឥដ្ឋការ៉ូឡាក្នុងរង្វង់មូលអស់ជាច្រើន ។ សាក្សីនៅកន្លែងកើតហេតុបានប្រាប់ឱ្យដឹងដែរថា រថយន្តបែនដឹកឈើគ្រញូងដែល ក្រឡាប់ប្រាស់ដេកលើរង្វង់មូលនេះបានបើក ចេញមកពីទិសខាងលិចឆ្ពោះមកកើតមិនដឹង ជាមូលហេតុអ្វីនោះទេ ស្រាប់តែក្រឡាប់តែម្តង ត្រូវបានប្រជាពលរដ្ឋនាំគ្នាស្រែកថា រថយន្តបុក មនុស្ស ហើយស្រែកគំរាមឱ្យចាប់ ។ អ្នកបើក បរ និងព្រូម្នាក់គ្រាន់តែឮបែបនេះ បាននាំគ្នារត់ ចេញទៅយ៉ាងលឿនចោលស្បែកជើងឆ្ពោះទៅ ទិសខាងកើតគេចខ្លួនបាត់ស្រមោលតែម្តង ។ ពេលដែលនាំគ្នាទៅមើលកន្លែងរថយន្តក្រឡាប់ មិនឃើញមានស្នាមឈាមនោះទេដែល គេគិតថា គ្មានអ្នកណារងរបួសឡើយ ។ បានប្រហែល ជា១០នាទីត្រូវបានកម្លាំងសមត្ថកិច្ចមកដល់ ហាមឃាត់មិនឱ្យប្រជាពលរដ្ឋយកឈើចេញ ទៅណានោះទេ។ ប៉ុន្តែទោះជាយ៉ាងណាក្តី ក៏ ត្រូវប្រជាពលរដ្ឋបាននាំគ្នាជញ្ជូនចេញព្រោង ព្រាត ហើយត្រូវបានខាងអាវុធហត្ថ លើកយក ឈើគ្រញូងដាក់លើរថយន្តទៅរក្សាទុកបានមួយ ចំនួនផងដែរ ។
ប្រជាពលរដ្ឋបាននិយាយថា រថយន្តបែនលួចដឹកឈើគ្រញូងដែលក្រឡាប់នេះ សង្ស័យជារបស់ឧកញ៉ាម្នាក់ដែលល្បីខាងជំនួញឈើគ្រញូងនៅខាងស្រុកពញាក្រែក ។ កោះសន្តិភាពបានព្យាយាមសុំការបំភ្លឺពីក្រុមហ៊ុនធីធីវ៉ាយជាម្ចាស់រថយន្តដែរ ប៉ុន្តែមិនអាចទាក់ទងបានទេ ៕
ចែករំលែកព័តមាននេះ