ប្រទេសថៃ៖ ពាក្យចាស់បុរាណពោលថា «ដំរីជើងបួនគង់មានភ្លាត់» ពិតជាត្រឹមត្រូវ។ កាលពីពេលថ្មីៗនេះ, បុរសជនជាតិថៃម្នាក់ដែលជាអ្នកឯកទេសខាងចាប់ពស់យ៉ាងស្ទាត់ជំនាញទៅហើយ ក៏ត្រូវពស់វែកព្រួសពិសដាក់ភ្នែករបស់គាត់សឹងតែងងឹតមើលអ្វីលែងឃើញ។
បុគ្គលិកផ្នែកសង្គ្រោះបន្ទាន់បានប្រញាប់ចុះទៅកន្លែងកើតហេតុដើម្បីជួយសង្គ្រោះបុរសវ័យ៤៩ឆ្នាំឈ្មោះក្រៀងសាក់ ក្លាង (Kriengsak Klang) ដែលបម្រើការនៅនាយកដ្ឋានបង្ការ និងគ្រប់គ្រងគ្រោះមហន្តរាយ។ នៅកន្លែងកើតហេតុ, គេឃើញជនរងគ្រោះកំពុងឈឺចុកចាប់យ៉ាងខ្លាំងស្ទើរតែទ្រាំមិនបាន។ នៅក្បែរនោះមានសាកសពពស់វែក១ក្បាលប្រវែងជាងមួយម៉ែត្រដែលត្រូវគេវាយឡើងខ្ទេចក្បាល។
ក្រុមអ្នកជួយសង្គ្រោះក៏សែងលើកលោកក្រៀងសាក់ដាក់លើរថយន្តគិលានសង្គ្រោះ ដើម្បីដឹកទៅមន្ទីរពេទ្យមហារដ្ឋនគររាជសីមា។ នៅតាមផ្លូវធ្វើដំណើរ, គេបានខិតខំយកទឹកសេរ៉ូមប្រៃច្រូចពីលើកែវភ្នែកទាំងគូរបស់ជនរងគ្រោះដើម្បីកាត់បន្ថយការឈឺផ្សា។ គេត្រូវតែប្រើវិធីនេះដើម្បីជួយបន្សាបជាតិពិស។ បើមិនដូច្នេះទេ ជនរងគ្រោះអាចនឹងងងឹតភ្នែកជារៀងរហូត។
ស្ថិតនៅក្នុងស្ថានភាពដែលភ្នែកខាងឆ្វេងរបស់គាត់កំពុងរុំរបួស, លោកក្រៀងសាក់ឆ្លៀតផ្ដល់បទសម្ភាសដល់អ្នកកាសែតថានៅថ្ងៃកើតហេតុនោះ គាត់កំពុងងូតទឹកសុខៗដើម្បីត្រៀមចូលធ្វើការវេនយប់។ ស្រាប់តែបុគ្គលិកដែលធ្វើការជាមួយគ្នាស្រែកហៅគាត់ទៅជួយចាប់ពស់វែក១ក្បាលដែលសម្ងំនៅក្នុងផ្ទះរបស់អ្នកស្រុក។ គ្រាន់តែឮដូច្នេះ, លោកក្រៀងសាក់ក៏ស្ទុះវឹងទៅយកស្រោមដៃជ័រដើម្បីពាក់ងាយស្រួលចាប់ពស់។ រួចហើយគាត់រត់ជាប្រញាប់ទៅផ្ទះដែលមានសត្វពស់ចូលរាតត្បាត។
ពេលទៅដល់, គាត់ឃើញពស់វែក១ក្បាលដេកនៅលើអំបោស។ គាត់ក៏យកតង្កៀបចាប់ខ្លួនពស់នោះជាប់ និងហុចដង្កៀបទៅឱ្យបុគ្គលិកម្នាក់ទៀត។ នៅពេលលោកក្រៀងសាក់បម្រុងលូកដៃចាប់ក្បាលពស់, ស្រាប់តែពស់ព្រួសពិស១ឆ្វាចពេញភ្នែករបស់គាត់។ មិនបង្អង់យូរ, ក្រៀងសាក់ក៏ទូរស័ព្ទសូមជំនួយ និងស្នើសុំឱ្យភ្នាក់ងារសង្គ្រោះបន្ទាន់យករបស់របរសម្រាប់លាងសម្អាតជាតិពិស។ គេបានប្រាប់ឱ្យគាត់លាងកែវភ្នែកនឹងទឹកអំបិល ហើយត្រូវតែប្រញាប់ធ្វើដំណើរទៅកាន់មន្ទីរពេទ្យជាបន្ទាន់។
ក្រៀងសាក់និយាយរម្លឹកថយក្រោយថា «ក្នុងនាមជាបុគ្គលិកខាងទប់ស្កាត់ហានិភ័យផ្សេងៗ, គាត់ធ្លាប់ចាប់ពស់រាប់រយក្បាលមកហើយ។ គាត់ប្រាប់ថាពស់ដែលរស់នៅតំបន់នេះភាគច្រើនជាពស់វែក។ ចំណែកពស់ថ្លាន់ក៏មានដែរ, ប៉ុន្តែមិនសូវច្រើនប៉ុន្មាន។ យូរៗទើបជួបប្រទះម្ដង។ គាត់ប្រាប់ថា១ជីវិតរបស់គាត់, គាត់ធ្លាប់ចាប់ពស់វែកច្រើនរាប់មិនអស់។
ប៉ុន្តែលើកនេះគាត់បែរជាភ្លាត់ស្នៀតដោយសារប្រញាប់ពេក។ នៅពេលប្រញាប់ពេកធ្វើឱ្យគាត់ភ្លេចមុខ ភ្លេចក្រោយ។ កាលពីពេលកន្លងមក, គាត់ពុំដែលជួបនឹងរឿងអកុសលបែបនេះទេ ព្រោះគាត់បានត្រៀមឧបករណ៍សម្រាប់បង្ការខ្លួន១កំផ្លេ។ ជាទូទៅ, គាត់ត្រូវពាក់ឧបករណ៍ការពារមុខ ឬពាក់វ៉ែនតាការពារភ្នែក។ គាត់ថាពស់វែកឧស្សាហ៍ព្រួសពិសរបស់វាដើម្បីរំដោះខ្លួន។
ក្រោយពេលជួបហេតុការណ៍លើកនេះ, គាត់យល់កាន់តែច្បាស់ថាហេតុអ្វីបានជាអ្នកចាប់ពស់ដូចជារូបគាត់ត្រូវតែពាក់ឧបករណ៍ការពារខ្លួនជាប់ជាប្រចាំ។ មូលហេតុដោយសារមនុស្សយើងទោះបីមានបទពិសោធចាប់ពស់ច្រើនដល់កម្រិតណាក៏ដោយ ក៏មិនអាចមានភាពស៊ំានៅក្នុងខ្លួន និងមិនអាចទប់ទល់នឹងជាតិពិសរបស់ពស់វែកបានទេ។ នេះសំណាងហើយដែលពស់វែក១ក្បាលនោះត្រឹមតែព្រួសពិសដាក់គាត់។ បើវាចឹក១ចង្កូមដើម្បីបញ្ជ្រាបពិសចូលទៅក្នុងសាច់របស់គាត់ ប្រាកដជាវីរវរធំតែម្ដង។
ឆ្លៀតឱកាសនេះ , គាត់ក៏សូមផ្ដែផ្ដាំទៅបងប្អូនប្រជាពលរដ្ឋ។ បើមានសត្វពស់ចូលទៅក្នុងផ្ទះ ឬបរិវេណដីរបស់បងប្អូន, សូមបងប្អូនកុំព្យាយាមចាប់វាដោយខ្លួនឯង។ បងប្អូនត្រូវប្រញាប់ទាក់ទងទៅអ្នកដែលមានជំនាញ និងមានបទពិសោធច្បាស់លាស់ខាងចាប់ពស់។ លោកថ្លែងថាសូម្បីតែរូបលោកដែលមានបទពិសោធខាងចាប់ពស់ប៉ុណ្ណឹងហើយនៅមានមានភ្លាត់ស្នៀតម្ដងៗ។ ចុះទម្រាំបងប្អូនដែលគ្មានបទពិសោធសោះយ៉ាងម៉េចទៅវិញ? ច្បាស់ណាស់ថាពួកគេអាចនឹងប្រឈមនឹងហានិភ័យខ្ពស់បំផុត៕
ប្រភព៖ The Thaiger
អត្ថបទដែលទាក់ទងដទៃទៀត
ពស់ថ្លាន់ថ្លើមធំចូលស៊ីមាន់ទាជិត១០០ក្បាលត្រូវម្ចាស់គេក្របួចជាប់
ពស់វែកសម្ងំនៅក្រោមកៅអីយន្តហោះ ធ្វើឱ្យពីឡុតព្រលឹងចុងសក់
ខឹងចិត្តពស់វែកចឹ.ក១ចង្កូម! កុមារឥណ្ឌាពន្លះវិញទាល់តែក្ស័.យ!
ចែករំលែកព័តមាននេះ