មន្ត្រីជាន់ខ្ពស់ក្នុងទីក្រុងបាសេឡូណា ប្រទេសអេស្ប៉ាញ បានដាក់បំរាមការស្រាតអាសអាភាស ឬស្លៀកឈុតហែលទឹកនៅទីសាធារណៈ និងកំណត់ការស្លៀកឈុតហែលទឹកតែនៅក្នុងបរិវេណអាងហែលទឹក ឆ្នេរសមុទ្រ និងដើរនៅលើឆ្នេរខ្សាច់តែប៉ុណ្ណោះ ។
សម្រាប់អ្នកដែលនិយមការស្រាត និងដើរនៅខាងក្រៅបរិវេណកំណត់ ត្រូវទទួលការផាកពិន័យជាទឹកប្រាក់ក្នុងរវាងពី៣០០ទៅ៥០០អឺរ៉ូ។ ចំណែកអ្នកស្លៀកឈុតប៊ីគីនី ខោសម្រាប់ហែលទឹក ឬឈុតហែលទឹកដែលចេញដើរនៅតាមដងផ្លូវ នឹងត្រូវទទួលការពិន័យជាប្រាក់ពី១២០ទៅ៣០០អឺរ៉ូ ។ កាលពីដើមឆ្នាំ២០១១ មន្ត្រីជាន់ខ្ពស់នៅទីក្រុងបាសេឡូណា បានបិទប្រកាសមិនឱ្យប្រតិបត្តិទង្វើខាងលើ ដោយការបង្ហាញរូបបុរស-ស្ត្រីចំនួន២គូ ដោយមួយគូតុបតែងកាយដោយសម្លៀកបំពាក់ធម្មតា ខណៈពេល១គូទៀតមានគូសខ្វែងពីលើដោយគំនូសក្រហមនៅពីលើការស្លៀកឈុតហែលទឹក។
ចំពោះបទបញ្ជាជាចុងក្រោយនេះ មន្ត្រី សមត្ថកិច្ចមានក្តីសង្ឃឹមយ៉ាងមុតមាំថា នឹងជួយទ្រទ្រង់ឱ្យប្រជាជនអាចរស់នៅរួមគ្នាបានល្អនៅតាមទីសាធារណៈ ។ ស្របពេលជាមួយគ្នានេះ អ្នកគាំទ្រក្រុមនិយមការស្រាតអាសអាភាសបានសម្តែងនូវការមិនពេញចិត្តចំពោះបំរាមខាងលើ ដោយថ្លែងបញ្ជាក់ថា បំរាមនេះស្ថិតនៅពីលើច្បាប់លើកលែងទោសការសម្រាតសម្លៀកបំពាក់កាលពី២២ឆ្នាំមុន ។
ចំណែកអាជីវករលក់ការ៉េមម្នាក់បានថ្លែងក្នុងន័យគាំទ្របំរាមខាងលើថា កាលពីមុននេះអាជ្ញាធរបានបន្ធូរបន្ថយរឿងរ៉ាវផ្សេងៗយ៉ាងច្រើន ហើយការចេញច្បាប់ថ្មីនេះ នឹងមានលទ្ធផលល្អដល់មនុស្សគ្រប់រូបនៅតាមទីសាធារណៈ។
រីឯអាជីវករលក់សម្លៀកបំពាក់ម្នាក់បានបង្ហាញការគាំទ្រដែរថា បច្ចុប្បន្ននេះមនុស្សដែលចូលចិត្តការស្រាតលំហែកាយតាមដងផ្លូវនៅក្នុងទីក្រុងចាប់ផ្តើមកើនចំនួនខុសប្រក្រតី ដូច្នេះមនុស្សទាំងនោះស័ក្តិសមនឹងទទួលរងការពិន័យពីអាជ្ញាធរហើយ ៕
ចែករំលែកព័តមាននេះ