ប្រធានាធិបតីអាមេរិក លោកបារ៉ាក់ អូបាម៉ា វាយតម្លៃកាលពីថ្ងៃទី៣០ មេសា ថា បណ្តាក្រុមហ៊ុនប្រេងឆ្លៀតឱកាសប្រេងឡើងថ្លៃខ្ពស់ដំឡើងតម្លៃប្រេងសាំងនៅសហរដ្ឋអាមេរិក។ លោកបានស្នើជាថ្មីដល់សភាឱ្យដកវិញ ការសំរាលពន្ធដែលបណ្តាក្រុមហ៊ុនប្រេងកាត និងឧស្ម័នទទួលបានក្នុងកំរិត៤ពាន់លានដុល្លារក្នុងមួយឆ្នាំ។ ក្នុងសង្កថា ប្រចាំសប្តាហ៍របស់លោកតាមវិទ្យុ និងអ៊ីនធើរណេត លោកអូបាម៉ាគូសបញ្ជាក់ថា កាដូពន្ធទាំងនេះមិនស្មើភាព និងពុំត្រឹមត្រូវឡើយ។ យើងត្រូវបញ្ចប់ការសំរាលពន្ធនេះ។
បញ្ហានេះមានការខ្វែងគំនិតគ្នាយ៉ាងខ្លាំងរវាងប្រធានាធិបតី និងបណ្តាសមាជិកសភានៃគណបក្សសាធារណរដ្ឋដែលមានភាគច្រើនក្នុងសភា។ តម្លៃប្រេងសាំងបានឡើងយ៉ាងខ្ពស់ដោយនៅកន្លែងខ្លះឡើងដល់៤ដុល្លារក្នុងមួយហ្គាឡុង(៣,៧៨លីត្រ) តំណាងឱ្យ២,៧អឺរ៉ូក្នុងមួយហ្គាឡុង ឬ០,៧១អឺរ៉ូក្នុងមួយលីត្រ។ តម្លៃនេះគឺខ្ពស់ជាង១ដុល្លារក្នុងមួយលីត្រដែលយោងតាមពួកអ្នកសេដ្ឋកិច្ចថា ធ្វើឱ្យរាំងស្ទះដល់កំណើនសេដ្ឋកិច្ច។ ទន្ទឹមនឹងនេះបណ្តាក្រុមហ៊ុនប្រេងប្រកាសពីប្រាក់ចំណេញយ៉ាងច្រើន។ លោកអូបាម៉ា មានប្រសាសន៍ថា ដកការកាត់បន្ថយពន្ធពីបណ្តាក្រុមហ៊ុនទាំងនេះនឹងអាចមានប្រាក់សំរាប់ធ្វើវិនិយោគថែមទៀតក្នុងការស្រាវជ្រាវលើថាមពលថ្មីៗ។
សមាជិកសភាគណបក្សសាធារណរដ្ឋមួយរូបលោក JAMES LANKFORD ឆ្លើយតបថា គំរោងនេះរបស់លោកប្រធានាធិបតីនឹងធ្វើឱ្យប៉ះពាល់ដល់ការងារជាច្រើនលានសំរាប់ពលរដ្ឋអាមេរិកដែលធ្វើការសំរាប់ឧស្សាហកម្មប្រេងកាត ៕
ចែករំលែកព័តមាននេះ