ជនសង្ស័យនៃក្រុមអាល់កៃដា៣នាក់ដែលត្រូវបានចាប់ខ្លួននៅក្នុងប្រទេសអាល្លឺម៉ង់កាលពី ថ្ងៃទី២៩ មេសា កន្លងមក បានរៀបចំផែនការបើកការវាយប្រហារដោយការបំផ្ទុះគ្រាប់បែកនៅក្នុងប្រទេសអាល្លឺម៉ង់។ នេះបើតាមការឱ្យដឹងដោយអាជ្ញាធរអាល្លឺម៉ង់ ។ ប្រធានការិយាល័យស៊ើបអង្កេតបទឧក្រិដ្ឋសហព័ន្ធអាល្លឺម៉ង់លោក Jirg Ziercke ថ្លែងក្នុងសន្និសីទកាសែតមួយដែលរៀបចំឡើងនៅក្នុងទី Karlsurhe ភាគខាងត្បូងប្រទេសថា ប៉ូលិសបានតាមដានជនសង្ស័យទាំង៣នាក់នោះរយៈពេល៦ខែមកហើយ រួចរកឃើញថា ពួកគេកំពុងសាកពិសោធន៍គ្រឿងផ្ទុះក្នុងរយៈពេលប៉ុន្មានថ្ងៃថ្មីៗនេះ។
លោក Ziercke ថ្លែងទៀតថា ដើម្បីរារាំង និងទប់ស្កាត់ការវាយប្រហារដែលអាចកើតឡើងជាយថាហេតុ ប៉ូលិសអាល្លឺម៉ង់បានសំរុកចូលមូលដ្ឋានរបស់ជនទាំងនោះ កាលពីព្រឹកថ្ងៃទី២៩ មេសា កន្លងមក ។
រដ្ឋអាជ្ញាសហព័ន្ធអាល្លឺម៉ង់ លោក Rainer Griesbaum ថ្លែងប្រាប់អ្នកកាសែតថា ផែនការបើកការវាយប្រហារនេះដែលបញ្ជាដោយមេដឹកនាំជាន់ខ្ពស់នៃក្រុមអាល់កៃដា បានត្រៀមអស់រយៈពេលជាច្រើនខែមកហើយ ។
ក្រោយពីត្រូវចាប់ខ្លួនជនសង្ស័យទាំង៣នាក់នោះត្រូវបានបញ្ជូនទៅកាន់តុលាការយុត្តិធម៌សហព័ន្ធដោយរងការចោទប្រកាន់ពីបទរៀបចំផែនការវាយប្រហារភេរវកម្ម។
រដ្ឋមន្ត្រីការបរទេសអាល្លឺម៉ង់ លោក Hans-Peter Friedrich ថ្លែងថា ការចាប់ខ្លួនជនសង្ស័យទាំង៣នាក់នេះបានលុបបំបាត់ចោលនូវការគំរាមកំហែងភេរវកម្មជាអន្តរជាតិ ប៉ុន្តែទោះបីជាបែបណា ពលរដ្ឋអាល្លឺម៉ង់ត្រូវតែប្រុងជើងការខ្ពស់ ។
លោក Ziercke បានព្រមានថា ការគំរាមបើកការវាយប្រហារភេរវកម្មនៅអាល្លឺម៉ង់នៅតែមាន ហើយអាជ្ញាធរអាល្លឺម៉ង់បានប៉ានស្មានថា មានក្រុមជ្រុលនិយមដ៏មានឥទ្ធិពល១៣០នាក់ នៅក្នុងប្រទេស ហើយថា ពួកគេនឹងបើកការវាយប្រហារភេរវកម្មជាយថាហេតុ ។
ប្រទេសអាល្លឺម៉ង់បានរឹតបន្តឹងសន្តិសុខនៅតាមព្រលានយន្តហោះសំខាន់ៗរបស់ខ្លួន និងនៅតាមស្ថានីយផ្លូវដែក ព្រមទាំងតំបន់ទេសចរណ៍សំខាន់ៗចាប់តាំងពីឆ្នាំ២០១០មក ៕
ចែករំលែកព័តមាននេះ