រាជធានីភ្នំពេញ ៖ ថ្មីៗនេះ អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានបង្ហោះសារខ្លីមួយ អំពីជីវិតក្មេងៗដែលនៅភ្នំពេញ ធ្វើការរកប្រាក់ដើម្បីចិញ្ចឹមជីវិត ទទួលការចាប់អារម្មណ៍ជាខ្លាំងពីសំណាក់អ្នកប្រើប្រាស់បណ្តាញសង្គមទាំងបរទេស និងខ្មែរ។
លោក ហុង ដា អ្នកចាត់ការសញ្ជាតិជប៉ុន ដែលមិនយកកម្រៃពីកម្ពុជារូបនេះ បង្ហោះសារថានៅលើបណ្តាញសង្គម Twitter កាលពីរាត្រីថ្ងៃទី៣០ ខែមេសា ជាភាសាអង់គ្លេស «I saw some children works in Phnom Penh on the way to the stadium. I feel there are many issues to solve in the world.» ដែលប្រែសម្រួលមកថា «នៅតាមផ្លូវទៅកីឡដ្ឋាន ខ្ញុំបានឃើញក្មេងៗជាច្រើននៅភ្នំពេញធ្វើការងារ។ ខ្ញុំមានអារម្មណ៍ថា មានបញ្ហាជាច្រើនដែលត្រូវដោះស្រាយនៅលើពិភពលោក»។
ជាមួយខ្លឹមសារដែលលោកគ្រូ ហុងដា ជាគ្រូបង្វឹករបស់កម្ពុជា បានសរសេរនៅលើបណ្តាញសង្គម Twitter របស់លោក ទទួលបានការចាប់អារម្មណ៍ជាច្រើន ដោយមានអ្នកបញ្ចេញមតិជាច្រើនគាំទ្រមតិរបស់លោក ហើយក៏មានបងប្អូនខ្លះបានសំណូមពរទៅលោក ហុង ដា ឱ្យចូលរួមជាមួយគាត់សាងសង់សាលារៀនសម្រាប់ក្មេងៗនៅកម្ពុជា ជាដើម។
ប្រាកដណាស់ សាររបស់លោក ហុង ដា ដែលទើបដឹកនាំក្រុមជម្រើសជាតិកម្ពុជា បានបង្ហាញនូវក្តីស្រលាញ់ដ៏ធំធេងរបស់លោកចំពោះប្រជាជនកម្ពុជា។ ហើយថ្មីៗនេះផងដែរ លោក ហុង ដា ក៏បានធ្វើឱ្យកម្ពុជារីកមុខរីកមាត់ជាខ្លាំងក្នុងការប្រកួតបាល់ទាត់បុរសនៃព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះនោះ។
ក្រោមការដឹកនាំរបស់លោក ហុង ដា ក្រុមបាល់ទាត់ជម្រើសជាតិកម្ពុជា អាយុក្រោម២២ឆ្នាំ ឬហៅថា ក្រុមបាល់ទាត់ U22 កម្ពុជា ពិតជាធ្វើបានល្អខ្លាំងណាស់ ដោយការប្រកួតពេញម៉ោង លទ្ធផល គឺក្រុមជម្រើសជាតិបាល់ទាត់ U22 យកឈ្នះក្រុម U22 របស់ទីម័រខាងកើត ក្នុងលទ្ធផល ៤-០។ ការប្រកួតនោះ គឺក្នុងវគ្គទី១ កម្ពុជា រកបាន២គ្រាប់ ដោយសុតបំប៉ោងសំណាញ់ទីរបស់គូប្រកួតដោយកីឡាករ ជូ ស៊ិនទិ នៅនាទី៣៩ និងនាទី៤៥+២។ លុះចូលដល់វគ្គទី២ ដោយមានការពួតដៃគ្នាបានយ៉ាងល្អ កីឡាករ ស រតនា ក៏ធ្វើបានសម្រេចនូវនាទី៧៣ រកគ្រាប់បាលទី២ ហើយកីឡាករ លឹម ពិសុទ្ធ រកបាននៅនាទី៨២។
សម្រាប់ព្រឹត្តិការណ៍ស៊ីហ្គេមនេះ អ្នកចាត់ការទូទៅ ជនជាតិជប៉ុន លោក ហុង ដា រួមជាមួយគ្រូបង្វឹក គឺលោក Ryu Herose បានដឹកនាំក្រុមកម្ពុជាទៅហ្វឹកហាត់នៅក្រៅប្រទេសយ៉ាងខ្លាំងក្លាផងដែរ សម្រាប់ការប្រកួតស៊ីហ្គេមលើកទី៣២ ឆ្នាំ២០២៣ ដែលនឹងចាប់ផ្ដើមពីថ្ងៃទី២៩ ខែមេសា នេះតទៅ។
សម្រាប់ព្រឹត្តិការណ៍ស៊ីហ្គេមនេះ កម្ពុជា ស្ថិតនៅពូល A ជាមួយឥណ្ឌូណេស៊ី មីយ៉ាន់ម៉ា ហ្វីលីពីន និង ទីម័រខាងកើត។ ហើយគិតត្រឹមថ្ងៃទី១ ឧសភានេះ ក្រុមបាល់ទាត់បុរសជម្រើសជាតិ U22 កម្ពុជា គឺឈរលើកំពូលតារាង ទទួលបាន៣ពិន្ទុក្នុងដៃ ក្រោយយកឈ្នះទីម័រខាងកើត។ សម្រាប់ថ្ងៃទី២ ឧសភា ស្អែកនេះ ក្រុមបាល់ទាត់បុរសជម្រើសជាតិ U22 កម្ពុជា នឹងប្រកួតជាមួយក្រុម U22 របស់ហ្វីលីពីន នៅកីឡដ្ឋានស្តាតអូឡាំពិកផងដែរ។ ចំពោះពូល B ពិតជាពូលកាចៗមែន ដែលប្រជុំទៅដោយក្រុមខ្លាំងៗនោះ មានវៀតណាម មេដាយមាសស៊ីហ្គេម លើកទី៣១ ថៃ ម៉ាឡេស៊ី សិង្ហបូរី និងឡាវ៕
ចែករំលែកព័តមាននេះ