រាជធានីភ្នំពេញ៖ ក្នុងព្រឹត្តិការណ៍ប្រកួតស៊ីហ្គេម ដែលកម្ពុជា ធ្វើជាម្ចាស់ផ្ទះ ចាប់ពីថ្ងៃទី៥ ឧសភា ដល់ថ្ងៃទី១៧ ខែឧសភា ឆ្នាំ២០២៣ នឹងមានប្រតិភូកីឡា រួមទាំងកីឡាករ និងភ្ញៀវអន្តរជាតិ សរុបមកចូលរួមជាង ១២០០០នាក់។ ក្នុងនោះ កម្ពុជា ត្រៀមចំណាយសរុបក្នុងរង្វង់ ១១៨លានដុល្លារ។ នេះបើតាមសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC។
សម្តេចពិជ័យសេនា ទៀ បាញ់ បានប្រកាសដូច្នេះ នៅក្នុងសន្និសីទកាសែត នៅពហុកីឡដ្ឋានជាតិ មរតក តេជោ នារសៀលថ្ងៃទី២៨ ខែមេសា ឆ្នាំ២០២៣។
សម្តេចពិជ័យសេនា ទៀ បាញ់ ក៏បានបញ្ជាក់ឡើងវិញពីការមិនយកថ្លៃសព្វបែបយ៉ាងលើប្រតិភូកីឡា និងកីឡាករ រួមទាំងភ្ញៀវអន្តរជាតិ ដែលមកចូលរួមប្រកួតកីឡាស៊ីហ្គេម សរុបជាង ១២០០០នាក់នេះ គឺរាជរដ្ឋាភិបាល ផ្តល់ជូនដោយមិនគិតថ្លៃនូវអាហារ ការស្នាក់នៅ រួមទាំងសិទ្ធិផ្សាយបន្តផ្ទាល់ពីស៊ីហ្គេម ដូចអ្វីដែលសម្តេចតេជោ ហ៊ុន សែន បានប្រកាសកន្លងមក។
ក្នុងព្រឹត្តិការណ៍ស៊ីហ្គេម ដែលកម្ពុជា ជាម្ចាស់ផ្ទះនេះ មាន ៣៧ប្រភេទ ដោយចែកជា ៥៨៦វិញ្ញាសា។ ក្នុងនោះ កម្ពុជា រៀបចំទីតាំងប្រកួត នៅរាជធានីភ្នំពេញ សៀមរាប ព្រះសីហនុ កែប និងខេត្តកំពត។
ក្នុងចំណោមប្រតិភូកីឡា និងកីឡាករ ដែលមកចូលរួមប្រកួតប្រជែងស៊ីហ្គេមនេះ គឺថៃ បញ្ជូនមកច្រើនជាងគេ ហើយតិចជាងគេ គឺទីម័រខាងកើត។
អំពីថ្នាក់ដឹកនាំ និងភ្ញៀវអន្តរជាតិ ដែលនឹងអញ្ជើញមកចូលរួមពិធីបើកព្រឹត្តិការណ៍កីឡាស៊ីហ្គេម នាយប់ថ្ងៃទី៥ឧសភា ត្រូវបានលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានណៈកម្មាធិការអូឡាំពិកកម្ពុជា បានលើកឡើងថា នឹងមានការចូលរួមពីប្រធានាធិបតីឡាវ អតីតប្រធានាធិបតីទីម័រខាងកើត ឧបនាយករដ្ឋមន្ត្រីវៀតណាម អនុប្រធានទី១ នៃគណៈកម្មការកីឡាអូឡាំពិក រួមទាំងអគ្គលេខាធិការគណៈកម្មការកីឡាអាស៊ីអាគ្នេយ៍។
នៅថ្ងៃបើកព្រឹត្តិការណ៍ស៊ីហ្គេម នាថ្ងៃទី៥ឧសភា លោក ថោង ខុន បានប្រកាសថា គណៈកម្មការកីឡាអូឡាំពិក នឹងប្រគល់មេដាយ មរតក អូឡាំពិក ជូនសម្តេចតេជោ ហ៊ុន សែន។ មេដាយ មរតក អូឡាំពិក ជាមេដាយ ដែលត្រូវប្រគល់ជូនថ្នាក់ដឹកនាំប្រទេស ដែលបានរៀបចំព្រឹត្តិការណ៍កីឡាអូឡាំពិកបានល្អប្រសើរ។ ក្នុងនោះ កម្ពុជាយើង ត្រូវបានគេប្រសិទ្ធនាមថា ជា «Cambodia Free Games» ដោយសារតែកម្ពុជា រៀបចំការប្រកួតកីឡាស៊ីហ្គេម បានល្អប្រសើរ ហើយអ្វីៗមិនគិតថ្លៃថែមទៀត។
ចំពោះការមិនគិតថ្លៃទាំងអស់ លើម្ហូបអាហារ ស្នាក់នៅ ការដឹកជញ្ជូន រួមទាំងការផ្សព្វផ្សាយពីស៊ីហ្គេមនេះ ត្រូវបានសម្តេចពិជ័យសេនា ទៀ បាញ់ ក៏ដូចជា លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការអូឡាំពិកកម្ពុជា រួមទាំងលោក វ៉ាត់ ចំរើន អគ្គលេខាធិការគណៈកម្មាធិការអូឡាំពិកកម្ពុជា បានបញ្ជាក់ក្នុងសន្និសីទកាសែតថា អ្វីៗ គឺកម្ពុជារៀបចំតាមស្តង់ដារអន្តរជាតិ ទាំងម្ហូបអាហារ កន្លែងស្នាក់នៅ ក៏ដូចជា រូបភាពនៃការផ្សាយបន្តផ្ទាល់ពីព្រឹត្តិការណ៍ស៊ីហ្គេម នាពេលនេះ៕
ចែករំលែកព័តមាននេះ