ហ្វូងកណ្តៀរបានចូលស៊ីក្រដាសប្រាក់ក្នុងរង្វង់១០លានរូពី ឬប្រហែល២,៣សែនដុល្លារដែលរក្សាទុកក្នុងទូដែកនៅឯធនាគារមួយកន្លែងក្នុងទីក្រុងបារ៉ាបាងគី ឆ្ងាយពីក្រុងឡាក់ណាវ រាជធានីរបស់រដ្ឋឧត្តរប្រទេសស្ថិតនៅភាគខាងជើងប្រហែល៣០គីឡូម៉ែត្រ ។ ប្រធានធនាគារខាងលើបានប្រទះឃើញការខូចខាត ខណៈពេលបើកបន្ទប់សុវត្ថិភាពនៅក្នុងធនាគារកាលពីថ្ងៃទី២៧ មេសា កន្លងមក ដោយប៉ូលិសកំពុងធ្វើការស៊ើបអង្កេតរកមូលហេតុថា តើហ្វូងសត្វកណ្តៀរចូលទៅក្នុងទូដែករក្សាទុកប្រាក់បានដោយរបៀបណា? ចំណែកទេសាភិបាលរបស់ធនាគារ «ស្តេត ប៊ែង អហ្វ ឥណ្ឌា» ថ្លែងឱ្យដឹងថា ត្រៀមយកកំហុសលើប្រធានធនាគារ ដែលបំពេញតួនាទីដ៏ខ្ជះខ្ជាយមួយ បណ្តោយឱ្យកណ្តៀរស៊ីក្រដាសប្រាក់របស់អតិថិជននៅឯសាខារបស់ធនាគារក្នុងតំបន់ហ្វាតេពូ ទីក្រុងបារ៉ាបាំងគី ហើយធនាគារត្រូវចេញប្រាក់សំណងលើការខូចខាតទាំងនេះ ព្រោះមានការចុះបញ្ជីចំនួនប្រាក់ និងលេខរៀងក្រដាសប្រាក់ខាងលើក្នុងឯកសារ។
ក្រៅពីនេះធនាគារកណ្តាលរបស់ឥណ្ឌាក៏បានចេញបទបញ្ជាដោយផ្ទាល់ដល់ប្រធានធនាគារគ្រប់សាខាដែលរក្សាទុកប្រាក់អតិថិជននៅក្នុងបន្ទប់សុវត្ថិភាព ត្រូវបង្កើនភាពហ្មត់ចត់ក្នុងការត្រួតពិនិត្យប្រាក់ និងវត្ថុផ្សេងៗ ។ នៅក្នុងទូសុវត្ថិភាពនៅរៀងរាល់២ខែម្តង ។ ចំណែករបាយការណ៍បញ្ជាក់ថា អគារដែលរក្សាទុកប្រាក់ខាងលើ ហាក់ដូចជាមានលក្ខណៈចាស់ទ្រុឌទ្រោម និងមិនសូវបានទទួលការថែទាំសំអាតអនាម័យឱ្យបានល្អិតល្អន់និងជាកន្លែងដែលមានមនុស្សជាច្រើនដឹងថា ទីនោះជាឋានសួគ៌របស់កណ្តៀរ ។ លើសពីនេះទៀត ក៏មានរបាយការណ៍បញ្ជាក់ទៀតថា កាលពីមុននេះ កណ្តៀរធ្លាប់ចូលទៅខាំស៊ីគ្រឿងសង្ហារឹម និងឯកសាររបស់ធនាគារ ហើយប្រាក់ខាងលើត្រូវបានយកទៅរក្សាក្នុងទូសុវត្ថិភាពច្នៃពីលោហៈកាលពីខែមករា កន្លងទៅ ។
ស្របពេលជាមួយគ្នានេះ មន្ត្រីនៅក្នុងធនាគារត្រូវទទួលនូវការចោទប្រកាន់ថា ប្រតិបត្តិតួនាទីដ៏ខ្ជះខ្ជាយដែលបណ្តោយឱ្យមានការខូចខាតដល់ធនាគារ ។ គួរបញ្ជាក់ថា សម្រាប់ហេតុការណ៍ដែលមានលក្ខណៈស្រដៀងគ្នានេះ បានកើតឡើងកាលពីឆ្នាំ២០០៨ នៅឯធនាគារមួយកន្លែងទៀតក្នុងទីក្រុងប៉ាតាណា រដ្ឋពីហាន ក្រោយពីប្រទះឃើញហ្វូងកណ្តៀរស៊ីក្រដាសប្រាក់ និងឯកសារវិនិយោគទុនដែលមានតម្លៃជាច្រើនសែនរូពី ។ ចំណែកផ្នែកធនាគារបានថ្លែងបញ្ជាក់ប្រាប់អតិថិជនថា អគារខាងលើជាប្រភពនៃហ្វូងកណ្តៀរ ៕
ចែករំលែកព័តមាននេះ