តារាយូធូបថៃនៃបណ្ដាញសូដ័រស៉្ទាយ (สอดอ Style) ដែលមានអ្នកចុចជាវ (subscriber) ជាង៤,៣លាននាក់ ត្រូវសមត្ថកិច្ចនៃនាយកដ្ឋានប្រឆាំងនឹងបទល្មើសបច្ចេកវិទ្យាអញ្ជើញទៅឆ្លើយបំភ្លឺពាក់ព័ន្ធនឹងវីឌីអូឃ្លីបដែលនាងប្រកាសថាចាញ់ល្បែង។ អ្នកនាងភីមឡាដា វេវវិតសង (Pimlada…
តារាយូធូបថៃនៃបណ្ដាញសូដ័រស៉្ទាយ (สอดอ Style) ដែលមានអ្នកចុចជាវ (subscriber) ជាង៤,៣លាននាក់ ត្រូវសមត្ថកិច្ចនៃនាយកដ្ឋានប្រឆាំងនឹងបទល្មើសបច្ចេកវិទ្យាអញ្ជើញទៅឆ្លើយបំភ្លឺពាក់ព័ន្ធនឹងវីឌីអូឃ្លីបដែលនាងប្រកាសថាចាញ់ល្បែង។ អ្នកនាងភីមឡាដា វេវវិតសង (Pimlada Wewvitsong) បានចូលឆ្លើយបំភ្លឺពាក់ព័ន្ធនឹងការបង្ហោះវីឌីអូនៅលើទីកតុកដែលថារយៈពេលជាងបីខែនេះ, នាងលេងល្បែងស៊ីសងតាមអនឡាញចាញ់អស់លុយជាង២៥លានបាត ឬស្មើនឹង៧៣ម៉ឺនដុល្លារ។
នាងចាប់ផ្ដើមវក់នឹងល្បែងអនឡាញកាលពីខែមករា ឆ្នាំ២០២៣ និងបន្តចាញ់ល្បែងជាហូរហែ។ នាងប្រាប់ថាមានពេល១នោះ នាងហ៊ានចាក់១ក្ដារ៣សែនបាត ឬស្មើនឹងជាង៨ពាន់ដុល្លារ ហើយក៏ចាញ់ហ្មត់តែម្ដង។ នាងធ្លាប់ចាក់ក្ដារធំៗចំនួនបីដងចាញ់អស់៩សែនបាត។ ក្រោយមក, នាងធ្វើវីឌីអូនិយាយពីការចាក់បាល់តាមអនឡាញចាញ់អស់លុយរាប់លានបាត។
នាងប្រាប់ថាត្រឹមលុយប៉ុណ្ណឹងគ្មានអ្វីអស្ចារ្យទេ។ នៅពេលនាងចាញ់ល្បែងកាន់តែច្រើន, នាងលេងកាន់តែខ្លាំងថែមទៀត ដូចពាក្យចាស់ថា «សេះដាច់ យកសេះតាម»។ ពេលខ្លះយីអ៊ុនរបស់នាងមានឡើង មានចុះ។ នៅពេលណាយីអ៊ុនរបស់នាងឡើង, នាងអាចឈ្នះល្បែងបានលុយមកវិញ ហើយអាចស្ដារដើមបានខ្លះត្រឹមតែ១ប៉ប្រិចភ្នែក។ នៅពេលចាក់១ក្ដារៗច្រើនៗ និងលេងល្បែងញឹកញាប់បែបនេះ ធ្វើឱ្យវេបសាយល្បែងធំៗស្គាល់នាងកាន់តែច្បាស់ និងចាត់ទុកនាងជាម៉ូយដុំរបស់ពួកគេ។
ពាក់ព័ន្ធនឹងសមត្ថកិច្ចហៅទៅសួរនាំនោះ, នាងប្រាប់ថានេះជាការចូលរួមធ្វើជាសាក្សី។ មុនដំបូង, នាងក៏មិនទាន់យល់ឱ្យបានស៊ីជម្រៅថាតើសមត្ថកិច្ចអញ្ជើញនាងទៅនេះទៅ ទៅដើម្បីគោលបំណងអ្វីទេ។ ប៉ុន្តែនាងបានសហការយ៉ាងល្អជាមួយសមត្ថកិច្ច និងព្យាយាមឆ្លើយសំណួរយ៉ាងអស់ពីចិត្តពីថ្លើម។ នាងសហការដោយរីករាយជានិច្ចនៅក្នុងការសាកសួរនេះ។
សមត្ថកិច្ចចង់ដឹងបទពិសោធដែលតារាយូធូបរូបនេះប្រឡូកនៅក្នុងល្បែងអនឡាញដើម្បីងាយស្រួលស៊ើបអង្កេត និងស្រាវជ្រាវកាន់តែស៊ីជម្រៅ, ងាយស្រួលកំណត់ថាវេបសាយណាខ្លះដែលបើករកស៊ីមានអាជ្ញាប័ណ្ណ និងវេបសាយណាខ្លះរកស៊ីខុសច្បាប់។ សមត្ថកិច្ចចង់ដឹងថាអ្នកណាខ្លះជាម្ចាស់វេបសាយទាំងនោះ, នាងលេងល្បែងអនឡាញញឹកញាប់កម្រិតណា, នាងវេរលុយចូលវេបសាយល្បែងប៉ុន្មានដង, ម្ដងៗចំនួនប៉ុន្មាន។ ព័ត៌មានទាំងនេះមានប្រយោជន៍សម្រាប់ការស្រាវជ្រាវ។
សមត្ថកិច្ចចង់ផ្ដោតសំខាន់ថាតារាយូធូបរូបនេះមានទំនាក់ទំនងកម្រិតណាជាមួយក្រុមចម្រៀងថានថៃ(Than Tai) និងបុរសឈ្មោះណុត ផាន់ថាវ៉ាត ណាខាវិសុទ្ធ (Not Pantawat Nakhawisut)។ សមត្ថកិច្ចចង់ដឹងថាពេលលេងល្បែងនោះ នាងអនឡាញនៅកន្លែងណា, នាងលេងជាមួយអ្នកណា, នាងវេរលុយចូលក្នុងខ្ទង់គណនីល្បែងតាមណា និងបើកលុយតាមណា។
បន្ថែមពីលើនេះ, សមត្ថកិច្ចចាប់អារម្មណ៍ទៅលើចំណុច២យ៉ាង ទី១- ការស្រាវជ្រាវអំពីមូលហេតុដែលនាំឱ្យកើតមានទំនាក់ទំនងរវាងតារាយូយូបរូបនេះ និងជនសង្ស័យ១ចំនួន និងទី២- សមត្ថកិច្ចចង់កំណត់មុខសញ្ញាឱ្យបានច្បាស់ថាតើពួកគេមានទំនាក់ទំនងជាមួយនឹងអ្នកដទៃទៀតដែរឬទេដែលអាចជាក្រុមមនុស្សដែលជាប់ពាក់ព័ន្ធនឹងការធ្វើសកម្មភាពខុសច្បាប់៕
ប្រភព៖ The Thaiger
ចែករំលែកព័តមាននេះ