មានហេតុការណ៍ដ៏គួរឱ្យភ្ញាក់ផ្អើលមួយកើតឡើងនៅប្រទេសថៃកាលពីពេលថ្មីៗនេះ បន្ទាប់ពីសត្វដំរីញី១ក្បាលជាន់សម្លាប់ម្ចាស់ខ្លួនឯង។ បុរសហ្មដំរីវ័យហុកសិបឆ្នាំឈ្មោះឆាត ម៉ូខុម (Chat Mokhom) ត្រូវសត្វដំរីព្រេច (ជាន់) រហូតដល់ស្លាប់នៅក្នុងខេត្តបុរីរ៉ាំ ប្រទេសថៃភាគឦសាន។…
មានហេតុការណ៍ដ៏គួរឱ្យភ្ញាក់ផ្អើលមួយកើតឡើងនៅប្រទេសថៃកាលពីពេលថ្មីៗនេះ បន្ទាប់ពីសត្វដំរីញី១ក្បាលជាន់សម្លាប់ម្ចាស់ខ្លួនឯង។ បុរសហ្មដំរីវ័យហុកសិបឆ្នាំឈ្មោះឆាត ម៉ូខុម (Chat Mokhom) ត្រូវសត្វដំរីព្រេច (ជាន់) រហូតដល់ស្លាប់នៅក្នុងខេត្តបុរីរ៉ាំ ប្រទេសថៃភាគឦសាន។ ហេតុការណ៍នេះកើតឡើងនៅពេលជនរងគ្រោះដឹកដំរីចុះអូរដើម្បីផឹកទឹក ឬងូតទឹកឱ្យវាត្រជាក់ខ្លួន។
សាក្សីនៅកន្លែងកើតហេតុប្រាប់ថាដំរីឈ្មោះមេណាមង៉ាម (Mae Nam-gnam) បានយកប្រមោយរបស់វាថ្ពក់ដងខ្លួនរបស់ម្ចាស់នោះជាប់។ រួចហើយ, វាលើកគ្រវីចុះឡើងៗជាច្រើនលើកច្រើនសា។ បន្ទាប់មក, វាក៏ព្រេចម្ចាស់ខ្លួនឯងរហូតដល់ក្ស័យសង្ខារតែម្ដង។ សមត្ថកិច្ចចុះទៅដល់កន្លែងកើតហេតុ និងឃើញសពជនរងគ្រោះដេកស្ដូកស្ដឹងនៅក្បែរអូរ។ ដៃ និងជើងរបស់ជនរងគ្រោះបាក់ឆ្អឹងខ្ទេចខ្ទីអស់។ កន្លែងដទៃទៀតនៃដងខ្លួនជនរងគ្រោះក៏ត្រូវខ្ទេចខ្ទាំ និងមានស្នាមជាំឡើងសុសសាច់។
តាមដឹងមកថាសត្វដំរីញីនេះកំពុងពពោះកូនប្រាំខែនៅក្នុងផ្ទៃ។ តាមពិតទៅ, ដំរីជាសត្វដែលមានសន្ដានស្លូតបូតពីធម្មជាតិរបស់វា។ ប៉ុន្តែសត្វនេះបើត្រូវកាចក៏កាចសម្បើមណាស់ដែរ។ ជាពិសេសវាមានកំហឹងក្រេវក្រោធភ្លាម១រំពេច បើមានអ្នកដទៃពន្យុះ ឬបង្កការគំរាមកំហែងចំពោះវា។ ចំពោះករណីដំរីជាន់ម្ចាស់ខ្លួនឯងរហូតដល់ស្លាប់នៅបុរីរ៉ាំ ប្រទេសថៃនេះ គេមិនទាន់ដឹងអំពីមូលហេតុពិតប្រាកដនៅឡើយទេ។
មន្ត្រីថ្នាក់មូលដ្ឋាន និងភរិយាជនរងគ្រោះជឿជាក់ថាដោយសារខែនេះជាខែក្ដៅខ្លាំង, សត្វដំរីនេះអាចនឹងមានអារម្មណ៍មួរម៉ៅ និងក្រពុលមុខខ្លាំង។ វាអាចនឹងធ្វើអ្វីម៉្យាងដើម្បីបន្ធូរភាពតានតឹង។ ជាទូទៅ នៅពេលសត្វមានអារម្មណ៍មួរម៉ៅ ឧទាហរណ៍សត្វក្របី ឬសត្វដំរីជាដើម, វានឹងវ័ធដើមចេក ឬដើមឈើនៅក្បែរនោះទាល់តែរលើងដើមឈើទាំងឫសក៏មានដែរ។ ដូចនេះ ទំនងជាគ្មានដើមឈើនៅក្បែរក៏មិនដឹង, ទើបសត្វដំរីញីនេះយកម្ចាស់ខ្លួនឯងធ្វើជារបស់បន្ធូរអារម្មណ៍តានតឹងតែម្ដង។
បន្ទាប់ពីប្រព្រឹត្តអំពើមនុស្សឃាតរួច, ដំរីឈ្មោះមេណាមង៉ាម(Mae Nam-gnam)រត់ចេញពីកន្លែងកើតហេតុ។ ប៉ុន្តែសមត្ថបានចាត់កម្លាំងតាមរករហូតដល់ឃើញ។ បន្ទាប់មកគេបានបាញ់ម្ជុលមានដាក់ថ្នាំសណ្ដំនៅក្នុងនោះដើម្បីចាប់វាឱ្យបាន និងធ្វើយ៉ាងណាមិនឱ្យប៉ះពាល់គភ៌នៅក្នុងផ្ទៃ។ នេះមិនមែនជាកិច្ចការដែលងាយស្រួលប៉ុន្មានទេ ព្រោះវាកំពុងតែក្រពុលមុខខ្លាំងបំផុត ដោយសារតែអាកាសធាតុក្ដៅផង, ទើបតែសម្លាប់មនុស្សហើយថ្មីៗផង និងត្រូវការពារកូនរបស់វានៅក្នុងផ្ទៃផង។
នៅប្រទេសថៃ ប្រជាពលរដ្ឋដែលរស់នៅតំបន់ព្រៃភ្នំនិយមចូលចិត្តចាប់សត្វដំរីព្រៃយកទៅផ្សាំងដើម្បីចិញ្ចឹមជាទំនៀមទម្លាប់តាំងពីយូរលង់ណាស់មកហើយ។ បើតាមការបង្ហើបឱ្យដឹងពីភរិយាជនរងគ្រោះ, ប្ដីគាត់ទើបតែទិញដំរីនេះពីម្ចាស់ដើមនៅខេត្តឆៀងម៉ៃកាលពីជាង១ខែមុន នៅក្នុងតម្លៃ១លាន ៥សែនបាត ស្មើនឹង៤ម៉ឺន ៤ពាន់ដុល្លារ។ ឥឡូវនេះ បើទុកជាចាប់ដំរីនេះបានក៏គេមិនទាន់ដឹងថាសមត្ថកិច្ចនឹងមានវិធានការបែបណានៅឡើយទេ។
សូមរម្លឹកថាមានករណីសត្វសម្លាប់មនុស្សកាលពីពេលថ្មីៗនេះនៅប្រទេសអ៊ីតាលី រហូតដល់ឡើងដល់តុលាការ។ សត្វខ្លាឃ្មុំញី១ក្បាលបានខាំសម្លាប់បុរសជនជាតិអ៊ីតាលីម្នាក់ដែលរត់ហាត់ប្រាណនៅលើជួរភ្នំអាល់(Alps)។ ក្រោយមក សមត្ថកិច្ចបានព័ទ្ធចាប់ខ្លាឃ្មុំនោះ និងយកទៅឃុំឃាំង។ មុនដំបូង ចៅហ្វាយខេត្តត្រេនតូ(Trento)នៃតំបន់កើតហេតុបញ្ជាឱ្យសម្លាប់ខ្លាឃ្មុំនេះចោល ព្រោះវាកាចពេក។
កាលពីពេលកន្លងមក មនុស្ស២នាក់ធ្លាប់ត្រូវខ្លាឃ្មុំនេះខាំ និងខ្វាច បណ្ដាលឱ្យរបួសពេញខ្លួន ស្ទើរស្លាប់ ស្ទើររស់។ ប៉ុន្តែតុលាការសាលាដំបូងបញ្ជាឱ្យពន្យារពេលសម្លាប់ខ្លាឃ្មុំនេះសិន បន្ទាប់ពីក្រុមសកម្មជនខាងសិទ្ធិរបស់សត្វចេញមុខតវ៉ាយ៉ាងគគ្រឹកគគ្រេង។ តុលាការនឹងបើកសវនាការលើសំណុំរឿងនេះនាខែឧសភា ឆ្នាំ២០២៣៕
ប្រភព៖ Newsweek, The Thaiger
ចែករំលែកព័តមាននេះ