ខេត្តស្ទឹងត្រែង ៖ កម្លាំងកងរាជអាវុធហត្ថ ខេត្តស្ទឹងត្រែងបានឃាត់ខ្លួនជនសង្ស័យម្នាក់បញ្ជូនទៅសាលាដំបូងខេត្តដោយចោទប្រកាន់ពីបទប៉ុនប៉ងរំលោភសេពសន្ថវៈលើនារីម្នាក់កាលពីវេលាម៉ោង១១និង២០នាទីយប់ថ្ងៃទី២៩ មីនា ក្នុងសង្កាត់ស្ទឹងត្រែង ក្រុងស្ទឹងត្រែង ។
មន្ត្រីកងរាជអាវុធហត្ថខេត្តបានបញ្ជាក់ឱ្យដឹងថា នៅវេលាម៉ោងខាងលើជនសង្ស័យឈ្មោះឈុន ថា អាយុ២៧ឆ្នាំ ជាអ្នកបើកបរគ្រឿងចក្រ មានស្រុកកំណើតនៅខេត្តកំពង់ធំ មកស្នាក់នៅបណ្តោះអាសន្នក្នុងទីរួមខេត្តស្ទឹងត្រែង បានលួចចូលបន្ទប់កូនស្រីម្ចាស់ហាងលក់កាហ្វេម្នាក់ក្នុងសង្កាត់ស្ទឹងត្រែងប៉ុនប៉ងចាប់រំលោភតែពុំបានសម្រេចដោយសារឪពុកម្តាយនារីនោះឃើញទាន់ ។ គ្រានោះឪពុកម្តាយនារីរងគ្រោះពុំទាន់ដេកលក់ឮស្នូរទ្វារបើកចូលខុសប្លែកពីធម្មតាក៏ស្រែកសួរទៅកូនស្រីរបស់ខ្លួន តែកូនស្រីគាត់មិនបានឆ្លើយតបវិញឡើយព្រោះនាងដេកលក់បាត់ទៅហើយ ទើបមានការសង្ស័យក៏បានចុចពិលចូលទៅក្នុងបន្ទប់កូនស្រីរួចបញ្ចាំងរកមើលស្រាប់តែឃើញជនសង្ស័យពួនសំងំនៅក្រោមគ្រែក៏ហៅឱ្យចេញមកក្រៅ និងប្តឹងសមត្ថកិច្ចកងរាជអាវុធហត្ថខេត្តឱ្យចាប់ខ្លួននាំទៅបញ្ជាការដ្ឋានកងរាជអាវុធហត្ថខេត្ត ភ្លាមៗ ។
តាមការឆ្លើយសារភាពរបស់ជនសង្ស័យឈ្មោះឈុន ថា ប្រាប់សមត្ថកិច្ចថា នៅមុនពេលកើតហេតុនេះពីរបីថ្ងៃខ្លួនបានមកផឹកកាហ្វេនៅហាងដែលមានកូនក្រមុំនេះ ហើយខ្លួនក៏បានចាប់ចិត្តស្រឡាញ់និងសុំលេខទូរស័ព្ទរបស់នាងតែនាងពុំឱ្យលេខឡើយ ។ លុះដល់ថ្ងៃទី២៩ មីនា ខ្លួនបានផឹកស្រាស្រវឹងស្រឿងៗរួចខ្ចីម៉ូតូម៉ាកសង់កូរ៉េពីមេការគ្រឿងចក្រក្រុមហ៊ុនឯកជនជិះសំដៅមកឈប់ក្បែរគុម្ពឫស្សីខាងក្រោយផ្ទះនាងក្រមុំ រួចដោះអាវនិងស្បែកជើងចូលទៅលាក់ខ្លួនក្នុងបន្ទប់ដេករបស់កូនក្រមុំម្ចាស់ហាងកាហ្វេនោះ ។ តែពេលខ្លួនរុញទ្វារចូលទៅក្នុងបន្ទប់នោះធ្វើឱ្យឪពុកម្តាយនាងឮសូរក៏មកមើលក៏ឃើញខ្លួននៅក្រោមគ្រែកូនក្រមុំគាត់ ។ ជនសង្ស័យសារភាពថា ដោយសារតែខ្លួនស្រឡាញ់កូនស្រីរបស់ម្ចាស់ហាងកាហ្វេ ទើបលួចចូលក្នុងបន្ទប់នាងក្នុងបំណងចាប់បង្ខំសេពសន្ថវៈ ។
បុរសម្ចាស់ហាងលក់កាហ្វេក្នុងសង្កាត់ខាងលើបាននិយាយថា លោកមិនបានដឹងថា ជនសង្ស័យរូបនេះលួចចូលបន្ទប់កូនស្រីតាំងពីពេលណាមកទេ ។ នៅយប់នោះលោកបានជួបជុំគ្នាហូបបាយល្ងាចជាមួយមិត្តភក្តិរហូតដល់ម៉ោងជាង៩យប់ក៏ចូលសម្រាកក្នុងបន្ទប់ជាមួយប្រពន្ធដែលមានបន្ទប់ជាប់គ្នាជាមួយកូនស្រីរបស់គាត់។ ក្រោយពីលង់លក់ក្នុងដំណេកមួយភាំងមក ក៏ឮសូរទ្វាររុញប៉ះរបស់ផ្សេងទៀតគួរឱ្យចម្លែកទើបសួរទៅកូនស្រីដែលកំពុងដេកក្នុងបន្ទប់នោះ តែមិនឮកូនស្រីឆ្លើយតបឡើយ។ ដោយមានការសង្ស័យមានមនុស្សចូលទើបបញ្ចាំងភ្លើងពិលរកមើលក៏ឃើញជនល្មើសនៅសំងំក្រោមគ្រែកូនស្រីគាត់ក៏ហៅគេឱ្យចេញក្រៅរួចប្តឹងមន្ត្រីកងរាជអាវុធហត្ថមកឃាត់ខ្លួនតែម្តង ។ ជនសង្ស័យប៉ុនប៉ងចាប់រំលោភកូនក្រមុំគេរូបនេះត្រូវបានកម្លាំងកងរាជអាវុធហត្ថខេត្តស្ទឹងត្រែងកសាងសំណុំរឿងបញ្ជូនទៅសាលាដំបូងខេត្តសម្រេចឃុំខ្លួនក្នុងពន្ធនាគារជាបណ្តោះអាសន្នរង់ចាំបើកសវនាការកាត់ទោសតាមផ្លូវច្បាប់ ៕
ចែករំលែកព័តមាននេះ