រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យចំនួន៣នាក់ត្រូវកម្លាំងសមត្ថកិច្ចខណ្ឌដូនពេញ ឃាត់ខ្លួន បន្ទាប់ពីនាំគ្នាលួចខ្វេះទូរស័ព្ទបានចំនួន១៥គ្រឿង និងខ្សែ.ក រួមទាំងលុយមួយចំនួនទៀតពីប្រជាពលរដ្ឋដើរលេងសង្ក្រាន្តឆ្នាំថ្មីក្នុងបរិវេណវត្តភ្នំ។ ហេតុការណ៍នេះ បង្កឱ្យមានការភ្ញាក់ផ្អើលកាលពីវេលាម៉ោង២និង៥០នាទីរសៀល ថ្ងៃទី១៦ ខែមេសា ឆ្នាំ២០២៣ នៅចំណុចបរិវេណវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
បើយោងតាមការបញ្ជាក់ពីជនរងគ្រោះមានទាំងបុរស ទាំងស្រីជាច្រើននាក់ បានប្រាប់អោយដឹងថា នៅមុនពេលកើតហេតុ ពួកគាត់នាំគ្នាទៅលេងក្នុងសង្ក្រាន្តឆ្នាំថ្មី ដោយលេងបាញ់ទឹកនិងប៉ាតម្សៅ រាំលេងយ៉ាងសប្បាយនៅក្នុងបរិវេណវត្តភ្នំ។ ភ្លាមៗនោះដែរ ស្រាប់តែមានបុរសជាជនសង្ស័យមានគ្នា៣នាក់ អាយុប្រហែលជា២០ឆ្នាំជាង មកបន្លំធ្វើជាលេងបាញ់ទឹក និងប៉ាតម្សៅទៅលើនារីៗ និងបុរស រួចក៏ឆ្លៀតឱកាសខ្វេះយកទូរស័ព្ទ និងខ្សែ.ក រួមទាំងលុយមួយចំនួនទៀត ពីជនរងគ្រោះ។
ប្រភពដដែលបន្តថា មួយសន្ទុះក្រោយមក ជនរងគ្រោះជាច្រើននាក់មានទាំងបុរស និងស្រី ក៏នាំគ្នាទៅកន្លែងទីស្នាក់ការសុំប្រកាស ដើម្បីស្វែងរកសម្ភារៈ និងអោយបងប្អូនដែលមកលេងក្នុងបរិវេណវត្តភ្នំ មានការប្រុងប្រយ័ត្នទាំងអស់គ្នា។
ក្រោយពីជនរងគ្រោះ សុំប្រកាសថា បាត់សម្ភារៈរួចមក កម្លាំងសមត្ថកិច្ចប្រចាំការនៅក្នុងបរិវេណវត្តភ្នំ ក៏បានដើរល្បាត ហើយក៏ប្រទះឃើញបុរសជាជនសង្ស័យទាំង៣នាក់នោះ កាន់កាបូបមួយ ហើយកំពុងតែអង្គុយរាប់ទូរស័ព្ទ។ ភ្លាមៗនោះដែរ សមត្ថកិច្ចក៏ចូលទៅឃាត់ រួចពិនិត្យមើលទៅឃើញថា មានខ្សែ.ក មានបទូរស័ព្ទ១៥គ្រឿង រួមទាំងលុយមួយចំនួនផងដែរ។ ហើយជនសង្ស័យទាំង៣នាក់នោះ នៅមិនទាន់ស្គាល់អត្តសញ្ញាណពិតប្រាកដនៅឡើយ។
បច្ចុប្បន្ន ជនសង្ស័យទាំង៣នាក់ ត្រូវបានបញ្ជូនកាន់ទៅប៉ុស្តិ៍នគរបាលរដ្ឋបាលសង្កាត់វត្តភ្នំ ព្រមទាំងជនរងគ្រោះ ដើម្បីធ្វើការសាកសួរនាំបន្ត និងចាត់ការជនសង្ស័យទាំង៣នាក់ទៅតាមនីតិវិធីផ្លូវច្បាប់៕ ដោយ ៖ រដ្ឋា
ចែករំលែកព័តមាននេះ