ពូកែបាញ់ទឹកដើម្បីធ្វើជាព្រែង (prank) ជាលក្ខណៈលេងបន្លំមែន មែនបន្លំលេង។ មានអីប៉ះចំសមត្ថកិច្ចដែលកំពុងធ្វើការថែរក្សាសន្តិសុខ និងសណ្ដាប់ធ្នាប់ ចាប់វ៉ៃខ្នោះតែម្ដង។ ថតសម្ដែងជាមួយគ្នាឯងដើម្បីបង្ហោះនៅលើបណ្ដាញសង្គមមិនអីទេ។ ប៉ុន្តែព្រែងប៉ះចំអ្នកផ្សេងប្រយ័ត្នបន្តិច។ អ្នកខ្លះគេប្រកាន់។ ដូចករណីបុរសជនជាតិចិន២នាក់នៅទីក្រុងហុងកុង។
ឆ្លៀតពេលដែលប្រទេសថៃកំពុងតែសប្បាយជះទឹក ឬបាញ់ទឹកដាក់គ្នាដើម្បីអបអរសង្ក្រាន្តឆ្នាំថ្មី។ បុរស២នាក់នៅហុងកុងក៏ចូលរួមអបអរសង្ក្រាន្តឆ្នាំថ្មីពីចម្ងាយផងដែរ ដែលគេរៀបចំនៅសង្កាត់កៅលុន (Kowloon)។ ពួកគាត់យកកាំភ្លើងជ័របាញ់ទឹកឈីតៗដាក់អ្នកនេះបន្តិច អ្នកនោះបន្តិច។ ចុងក្រោយ, ពួកគេបាញ់ទឹកដាក់សមត្ថកិច្ចដែលឈរមើលការខុសត្រូវសណ្ដាប់ធ្នាប់សារធារណៈ។
មេប៉ុស្តិ៍នគរបាលប្រចាំសង្កាត់កៅលុនប្រាប់ថាបុរសទាំង២នាក់នោះម្នាក់អាយុ២៥ឆ្នាំ និងម្នាក់ទៀតអាយុ២៦ឆ្នាំ បានបាញ់ទឹកដាក់សមត្ថកិច្ច។ លោកថានេះជាកម្មវិធីសប្បាយៗសម្រាប់មនុស្សគ្រប់គ្នា។ ប៉ុន្តែអ្នកខ្លះឆ្លៀតឱកាសលេងខូច។ ពួកគេបំពានទៅលើសមត្ថកិច្ចដែលមិនមែនជាអ្នកត្រូវការលេងសើចបែបហ្នឹងទេ។ សមត្ថកិច្ចការពារសន្តិសុខជូនប្រជាពលរដ្ឋ។
លោកអធិការប្រាប់ថាអ្នកបាញ់ទឹកដាក់សមត្ថកិច្ចនោះហាក់ដូចជាបានរៀបចំទុកជាមុន។ លោកព្រមានថាឱ្យតែមានអ្នកចូលចិត្តលេងម៉ាកៗហ្នឹង អាចនឹងមានការចាប់ខ្លួនជាបន្តទៀត។ តាមរយៈវីឌីអូឃ្លីបរយៈពេល៣នាទីដែលបង្ហោះនៅលើយូធូប, គេឃើញបុរសទាំង២បាញ់ទឹកដាក់សមត្ថកិច្ច និងក្រុមការងារទូរទស្សន៍ធីវីប៊ី (TVB) ដែលចុះថតព្រឹត្តិការណ៍សង្ក្រាន្ត។
ឥឡូវនេះ គេស៊ើបដឹងថាបុរសអាយុ២៥ឆ្នាំនោះជាបុគ្គលិកសន្តិសុខ និងជាអ្នករកស៊ីខាងយូធូប។ គាត់ធ្លាប់ត្រូវសមត្ថកិច្ចចាប់ខ្លួនកាលពីខែកុម្ភៈ។ កាលនោះ គាត់ដើរស្រែកអាឡេអាឡូ ឆោឡោ ហាក់ដូចជាមានរឿងធំសម្បើមណាស់។ គោលបំណងគឺដើម្បីព្រែង (prank)។ ជួនកាលគាត់ធ្វើជាទៅស្ទាក់ពីមុខអតិថិជនដែលដើរទិញឥវ៉ាន់នៅហាងលក់ចាប់ភួយ។
អ្នកនាំពាក្យនគរបាលជាតិប្រាប់ថាទង្វើរបស់បុរសទាំង២នាក់នេះត្រូវបានគ្នាគេថត និងយកទៅបង្ហោះនៅលើអ៊ីនធឺណិត និងធ្វើអត្ថាធិប្បាយថែមថយរបៀបសន្សំរឿង។ បើសម្រាប់ទំនៀមទម្លាប់របស់ថៃ គេមានជំនឿថាការជះទឹក សាចទឹក ឬបាញ់ទឹកដាក់អ្នកដទៃអាចជួយបណ្ដេញឧបទ្រពចង្រៃ។ ប៉ុន្តែបណ្ដេញឧបទ្រពចង្រៃប៉ះចំសមត្ថកិច្ច មានអីចាប់ខ្លួនតែម្ដង។
សាក្សីនិយាយថាបុរសទាំង២នាក់ និងអ្នកថតរូបម្នាក់ទៀតដើរសំដៅទៅក្រុមការងារទូរទស្សន៍ធីវីប៊ី (TVB) និងបាញ់ទឹកដាក់ពួកគេពេញមុខ។ រកតែគ្នាធ្វើការអីមិនកើត។ ក្រុមការងារទូរទស្សន៍ម្នាក់ប្រាប់ឱ្យបុរសបាញ់ទឹកនោះឈប់បាញ់ទៅ។ ប្រាប់ហើយនៅតែមិនស្ដាប់, គាត់ក៏ស្រែកហៅសមត្ថកិច្ចនៅក្បែរនោះដើម្បីជួយធ្វើអន្តរាគមន៍។ សមត្ថកិច្ចក៏ចុះទៅបំបែកបុរសបាញ់ទឹក ចេញពីក្រុមការងារទូរទស្សន៍។ បុរសនោះក៏ដើរចេញទៅកន្លែងផ្សេងដើម្បីចូលរួមជាមួយនឹងអ្នកដទៃទៀត។
សូមបញ្ជាក់ថាការចាប់ខ្លួននោះគឺចាប់ខ្លួនក្រោយមកទៀតទេ បន្ទាប់ពីអ្នករកស៊ីខាងយូធូបយកវីឌីអូឃ្លីបនោះទៅបង្ហោះ។ ការចាប់ខ្លួនក៏ធ្វើឡើងដោយសមត្ថកិច្ចផ្សេងទៀត មិនមែនសមត្ថកិច្ចនៅក្នុងវីឌីអូឃ្លីបនេះទេ។ សមត្ថកិច្ចយល់ថាជនសង្ស័យហាក់ដូចជារៀបចំសកម្មភាពនេះទុកជាមុន។ ដូច្នេះ ករណីសង្ក្រាន្តឆ្នាំថ្មីនោះគ្រាន់តែជាអ្វីដែលពួកគេយកធ្វើជាលេសតែប៉ុណ្ណោះ។ ប៉ុន្តែធាតុពិត ពួកគេហាក់ដូចជាចង់យកឱកាសនេះដើម្បីធ្វើផ្គើនដាក់សមត្ថកិច្ច៕
ប្រភព៖ The Thaiger, South China Moring Post, YouTube
ចែករំលែកព័តមាននេះ