ទីក្រុងប៊ែឡាំង, ប្រទេសអាល្លឺម៉ង់៖ ថ្ងៃនេះ សត្វស្វាឪប្រភេទហ្គោរីឡា(gorilla)ដែលមានវ័យចំណាស់ជាងគេនៅក្នុងពិភពលោកត្រូវបានអ្នកគ្រប់គ្រងសួនសត្វរៀបចំខួបកំណើតទី៦៦ឆ្នាំសម្រាប់ស្វានេះ។ សត្វស្វាញីឈ្មោះហ្វាទូ (Fatou)ស៊ីយ៉ាងឆ្ងាញ់ពិសានូវផ្លែបឺរី (berry), ផ្លែឈើស្រស់ៗ និងបន្លែមួយគំនរធំ រួមជាមួយគ្រឿងទេសជាច្រើនប្រភេទ។…
ទីក្រុងប៊ែឡាំង, ប្រទេសអាល្លឺម៉ង់៖ ថ្ងៃនេះ សត្វស្វាឪប្រភេទហ្គោរីឡា(gorilla)ដែលមានវ័យចំណាស់ជាងគេនៅក្នុងពិភពលោកត្រូវបានអ្នកគ្រប់គ្រងសួនសត្វរៀបចំខួបកំណើតទី៦៦ឆ្នាំសម្រាប់ស្វានេះ។ សត្វស្វាញីឈ្មោះហ្វាទូ (Fatou)ស៊ីយ៉ាងឆ្ងាញ់ពិសានូវផ្លែបឺរី (berry), ផ្លែឈើស្រស់ៗ និងបន្លែមួយគំនរធំ រួមជាមួយគ្រឿងទេសជាច្រើនប្រភេទ។ សូម្បីតែអ្នកដទៃដែលឈរមើលពីចម្ងាយក៏មានអារម្មណ៍ថាឆ្ងាញ់ផងដែរ។
ពិធីនេះជារៀបចំយ៉ាងដ៏វិសេសវិសាលសម្រាប់សត្វស្វាហ្វាទូ។ នេះបើយោងតាមការបង្ហើបឱ្យដឹងពីអ្នករស់នៅក្នុងសួនសត្វប៊ែឡាំង (Berlin Zoo)។ ជាធម្មតា សត្វស្វានេះទទួលបានចំណីអាហារប្រចាំថ្ងៃប្រភេទបន្លែគ្រប់មុខ។ មូលហេតុដោយសារវាមានវ័យកាន់តែចាស់ជរា។ បើគេផ្ដល់ផ្លែឈើឱ្យវាស៊ី ប្រៀបបាននឹងការធ្វើបាបវាទៅវិញទេ ព្រោះផ្លែឈើមានជាតិស្ករច្រើន។
បើគិតទៅតាមអាយុកាលរស់នៅរបស់ស្វាប្រភេទនេះ, ពួកវាអាចរស់នៅមួយអស់ល្បត់ត្រឹមសែសិបឆ្នាំ។ ដូច្នេះ លទ្ធភាពដែលស្វាហ្វាទូអាចបន្តជីវិតរស់នៅរហូតដល់៦៦ឆ្នាំគឺជាករណីពិសេស។ អាយុប៉ុណ្ណេះអាចចាត់ទុកថាលើសអាយុដែលកំណត់ទៅតាមក្រឹត្យក្រមធម្មជាតិរហូតដល់ទៅជាងម្ភៃឆ្នាំឯណោះ។ មិនមែនសត្វស្វាទូទៅសុទ្ធតែអាចធ្វើបាននោះទេ។ ដូចនេះ ក្រុមអ្នកអភិរក្សសត្វក៏គិតគូរសម្បើមណាស់ដែរអំពីសុខទុក្ខរបស់វា។ ជាពិសេស បញ្ហាសុខភាព និងអាហារូបត្ថម្ភ។
វ័យកាន់តែជ្រេដល់ថ្នាក់នេះហើយ, ហ្វាទូត្រូវការអាហារទន់ៗដែលងាយស្រួលទំពារ និងងាយស្រួលលេប ព្រោះវាបានបាក់ធ្មេញអស់រលីង។ នេះបើយោងតាមបុគ្គលិកសួនសត្វម្នាក់។ ថ្ងៃនេះ ហ្វាទូអាចស៊ីចំណីសម្រាប់ថ្ងៃខួបកំណើតយ៉ាងឆ្ងាញ់ពិសាដោយមិនចាំបាច់ខ្វល់ខ្វាយថាមានសត្វដទៃមកដណ្ដើមទេ។ ថ្វីដ្បិតសួនសត្វនៅទីក្រុងប៊ែឡាំងមានស្វារហ្គោរីឡាប្រភេទនេះរហូតដល់ទៅប្រាំក្បាល, ប៉ុន្តែសួនសត្វរៀបចំទុកដាក់ចំណីអាហារនេះដាច់ដោយឡែកសម្រាប់តែហ្វាទូមួយប៉ុណ្ណោះ។
សព្វថ្ងៃនេះ, បុគ្គលិកសួនសត្វប្រាប់ថាហ្វាទូមានឱកាសប្រាស្រ័យទាក់ទងជាមួយសត្វដែលរស់នៅក្បែរវានៅពេលណាក៏បាន។ ប៉ុន្តែសត្វនេះសុខចិត្តជ្រើសរើសយកការស្នាក់នៅស្ងប់ស្ងាត់តែម្នាក់ឯង ដោយមិនត្រូវការរវីរវល់ជាមួយនឹងសត្វដទៃទៀតទេ។
សត្វស្វាហ្គោរីឡាតំបន់ទំនាបខាងលិច(Western Lowland Gorilla) តួយ៉ាងដូចជាស្វាហ្វាទូនេះ ត្រូវក្រុមអ្នកអភិរក្សសត្វព្រៃចាត់ទុកថាជាស្វាហ្គោរីឡាដ៏កម្រ ។ ពួកវានៅសេសសល់តិចតួចជាទីបំផុតនៅលើភពផែនដី។ មូលហេតុសំខាន់ព្រោះព្រៃឈើដែលជាទីជម្រករបស់ពួកវាបានបាត់បង់អស់យ៉ាងច្រើនសន្ធឹកសន្ធាប់។ ជាទូទៅ សត្វនេះស៊ីរុក្ខជាតិ បន្លែ ផ្លែឈើជាអាហារ និងរស់នៅជាលក្ខណៈគ្រួសារ។
សត្វស្វាហ្វាទូចាប់កំណើតនៅក្នុងព្រៃធម្មជាតិកាលពីឆ្នាំ១៩៥៧, ហើយត្រូវអ្នកធ្វើដំណើរតាមទូកនាំយកស្វានេះពីតំបន់អាហ្វ្រិកខាងលិច។ មុនដំបូង យកទៅចិញ្ចឹមនៅសួនសត្វប្រទេសបារាំងកាលពីឆ្នាំ១៩៥៩។ ក្រោយមក សួនសត្វប៊ែឡាំង ប្រទេសអាល្លឺម៉ង់ ក៏បានចរចាគ្នាដើម្បីនាំយកស្វានេះទៅចិញ្ចឹមរហូតដល់សព្វថ្ងៃ។ ហ្វាទូមានកូន១ក្បាល, ចៅ២ក្បាល, ចៅទួត១៣ក្បាល និងចៅលួត១៦ក្បាល៕
ចែករំលែកព័តមាននេះ