ជិតចូលឆ្នាំហើយ! ក្មួយដុ.តផ្ទះម្តាយមីងឆេះខ្ទេច ព្រោះតែខឹងរឿងម្យ៉ាង
- កំពង់ឆ្នាំង
ខេត្តកំពង់ឆ្នាំង ៖ ដោយសារតែខឹងនឹងម្ដាយមីងស្ដីបន្ទោសរឿងដើរផឹកស៊ី ស្រាប់តែយុវជនជាក្មួយ
ខេត្តកំពង់ឆ្នាំង ៖ ដោយសារតែខឹងនឹងម្ដាយមីងស្ដីបន្ទោសរឿងដើរផឹកស៊ី ស្រាប់តែយុវជនជាក្មួយម្នាក់បានដុតផ្ទះម្ដាយមីង បណ្ដាលឱ្យឆេះខ្ទេចអស់ទាំងស្រុង កាលពីវេលាម៉ោង១និង១៥នាទីរំលងអាធ្រាត្រឈានចូលថ្ងៃទី ១៣ ខែមេសាឆ្នាំ ២០២៣ នៅភូមិដា ឃុំដា ស្រុកកំពង់លែង ខេត្តកំពង់ឆ្នាំង។
លោក ប៉ា ជឿន អធិការនគរបាលស្រុកកំពង់លែងបានឲ្យដឹងថា ជនបង្កឈ្មោះ រីម សុធា ភេទប្រុស អាយុ២៥ឆ្នាំ ត្រូវជាក្មួយបង្កើតម្ចាស់ផ្ទះជនរងគ្រោះ ។
លោកអធិការបានបន្តថា នៅមុនពេលកើតហេតុ នារសៀលថ្ងៃទី១២ ខែមេសា ក្រោយពីត្រឡប់ពីផឹកស៊ីស្រវឹងវិញ ម្ដាយមីងបានស្ដីបន្ទោស ក្មួយប្រុសដែលជាជនបង្ករឿងដើរផឹកស៊ីស្រវឹងរាល់ថ្ងៃ ពេលនោះក្មួយប្រុសដែលកំពុងតែស្រវឹង បានផ្ទុះកំហឹងទៅវា.យពាងរបស់ម្តាយមីងបែកអស់៣ពាង រួចក៏ដើរចេញបាត់ទៅ មិនដឹងថាទៅផឹកបន្តឬយ៉ាងណានោះទេ ប៉ុន្តែពេលកើតហេតុ ម្ចាស់ផ្ទះបានប្តឹងសមត្ថកិច្ចផងដែរ រឿងបង្កហិ.ង្សាវា.យបែកពាងចំនួន៣ ។
លោកអធិការបានបន្តទៀតថា លុះដល់ពេលរំលងអាធ្រាតឈានចូលថ្ងៃទី១៣ ខែមេសា ដោយមិនអស់ចិត្ត និងខឹងម្តាយមីងប្តឹងសមត្ថកិច្ច រឿងវា.យពាងកាលពីល្ងាច ក្មួយប្រុសបានមកដុ.តផ្ទះម្ដាយមីងម្តងទៀត ខណៈដែលគាត់មិននៅផ្ទះ ទៅសម្រាកផ្ទះបងប្អូននៅភូមិដាឡាត់ ឃុំដា បណ្ដាលឱ្យឆេះខ្ទេចអស់ទាំងស្រុងតែម្ដង ។
ពេលកើតហេតុ សមត្ថកិច្ចនគរបាល បានចេញរថយន្តពន្លត់អគ្គីភ័យ អន្តរាគមន៍ ពន្លត់ដែរតែដោយស្ថានភាពផ្ទះនៅឆ្ងាយ បានត្រឹមតែជួយពន្លត់មិនឱ្យរាលដាលដលផ្ទះអ្នកដទៃ ដោយប្រើរថយន្តទឹក អស់៣រថយន្ត។ផ្ទះដែលរងការខូចខាតមាន មានទំលំ៥គុណ៧ម៉ែត្រ សង់អំពីឈើ ដំបូលប្រក់ស័ង្កសី ជញ្ជាំងស័ង្កសី ត្រូវបានឆេះខ្ទេចទាំងស្រុង។
បច្ចុប្បន្ន ជនបង្កត្រូវបានសមត្ថកិច្ចនគរបាលស្រុកកំពង់លែងចាប់ខ្លួនបាននៅព្រឹកថ្ងៃទី១៣ ខែមេសា ហើយបានកសាងសំណុំរឿង បញ្ជូនមកស្នងការនគរបាលខេត្តកំពង់ឆ្នាំងដើម្បីចាត់ការតាមនិតិវិធីបន្ត ៕
ចែករំលែកព័តមាននេះ