រាជធានីភ្នំពេញ ៖ ការលើកទំនប់សណ្តរស្ទឹង ដើម្បីការពារទឹកជំនន់ព្រែកត្នោត រដ្ឋបាលរាជធានីភ្នំពេញ អនុវត្តការងារសម្រេចជិត៥០ភាគរយហើយ និងគ្រោងអោយរួចរាល់នៅមុនរដូវវស្សាខាងមុខនេះ។
ដើម្បីអោយការងារនេះ សម្រេចទៅតាមផែនការ និងត្រឹមត្រូវតាមបទដ្ឋានបច្ចេកទេស នាព្រឹកថ្ងៃទី១៣ ខែមេសានេះ លោក ឃួង ស្រេង អភិបាលនៃគណៈអភិបាលរាជធានីភ្នំពេញ ក្រោយបញ្ចប់ពិធីបង្សុកូលរាប់បាត្រ ឧទ្ទិសកុសលជូនដល់វិញ្ញាណក្ខ័ន្ធបុព្វបុរស និងប្រជាពលរដ្ឋដែលស្លា.ប់ក្នុងរបបប្រល័យពូជសាសន៍ប៉ុល ពត រយៈពេល៣ឆ្នាំ៨ខែនិង២០ថ្ងៃនៅមជ្ឈមណ្ឌលប្រល័យពូជសាសន៍ជើងឯកសង្កាត់ជើងឯក ខណ្ឌដង្កោរួចមក លោកបានដឹកនាំ អាជ្ញាធរ និងមន្ទីរជំនាញចុះពិនិត្យវឌ្ឍនភាពនៃការស្ថាបនាទំនប់សណ្តរស្ទឹង នៅក្នុងសង្កាត់សាក់សំពៅ ខណ្ឌដង្កោ ខណៈការដ្ឋាននេះ សម្រេចបានប្រមាណជិត៥០ភាគរយហើយនោះ។
លោកម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញ បានបញ្ជាក់ឲ្យដឹងនៅព្រឹកថ្ងៃទី១៣ ខែមេសានេះថា ការដ្ឋានស្ថាបនាទំនប់សណ្តរស្ទឹងព្រែកត្នោត នៅក្នុងសង្កាត់សាក់សំពៅ ខណ្ឌដង្កោនេះ មានទទឹង៦ម៉ែត្រ បណ្តោយប្រវែង៦៥៤៦ម៉ែត្រ។ ទំនប់នេះ ក្រៅពីការពារទឹកជំនន់ព្រែកត្នោតហើយ ទំនប់នេះក៏ជាផ្លូវសម្រាប់ប្រជាពលរដ្ឋក្នុងការធ្វើដំណើរផងដែរ។ ទំនប់នេះ បានបើកការដ្ឋាន កាលពីដើមខែមីនា ឆ្នាំ២០២៣នេះ ដោយគ្រោងអោយរួចរាល់នៅមុនរដូវវស្សាខាងមុខ ហើយការដ្ឋាននេះសម្រេចលើការចាក់ដីលើកជាទំនប់ បានប្រមាណ៣០០០ម៉ែត្រ ស្មើនឹង៤៥%។
លោក ឃួង ស្រេង មានប្រសាសន៍លើកឡើងថា ៖ គម្រោងលើកជាទំនប់ សណ្តរស្ទឹងព្រែកត្នោត នៅក្នុងសង្កាត់សាក់សំពៅ ខណ្ឌដង្កោនេះ យើងបានលើកខ្ពស់ជាងមុន ហើយក៏មានទំហំធំជាងមុនផងដែរ។ ទំនប់នេះ មិនត្រឹមតែជាទំនប់ការពារទឹកជំនន់ប៉ុណ្ណោះទេ វាក៏ជាផ្លូវសម្រាប់ប្រជាពលរដ្ឋក្នុងការធ្វើដំណើរផងដែរ។ បន្ថែមពីនេះទៀត ដោយសារទំនប់យើងធំ ពេលមានទឹកជំនន់កើតឡើង យើងអាចទប់លើទំនប់នេះបានហើយ ប្រជាពលរដ្ឋក៏នៅតែអាចធ្វើដំណើរបានជាធម្មតាថែមទៀត៕
ចែករំលែកព័តមាននេះ