រាជធានីភ្នំពេញ ៖ បុរសម្នាក់សង្ស័យថា ប្រើប្រាស់គ្រឿងញៀ.នលើសកម្រិតជិះម៉ូតូមកឈប់កន្លែងងងឹត រួចកាន់កាំបិ.តផ្គាក់ដេញកា.ប់ប្រជាពលរដ្ឋ ធ្វើឲ្យបុរសម្នាក់ដោះស្បែកជើងចោល ហើយរត់គេចខ្លួនឆ្លងផ្លូវទាំងភ័យស្លន់ស្លោ ក៏ស្រាប់តែត្រូវម៉ូតូមិនចាំម៉ាកមួយគ្រឿងបុកត្រូវ បណ្ដាលឲ្យដួលរបួសរលាត់ដៃជើង បង្កឱ្យការភ្ញាក់ផ្អើលដល់ប្រជាពលរដ្ឋនាំគ្នាជួយចាប់ឃាត់ខ្លួនភ្លាមៗតែម្តង។ ហេតុការណ៍នេះកើតឡើងកាលពីវេលាម៉ោង៩និង៣០នាទីយប់ ថ្ងៃទី១០ ខែមេសា ឆ្នាំ២០២៣ នៅចំណុចជិតព្រះវិហារយេស៊ូគ្រិស្ត តាមផ្លូវលេខ៦៣ (ផ្លូវត្រសក់ផ្អែម) ស្ថិតក្នុងសង្កាត់ទន្លេបាសាក់ ខណ្ឌចំការមន ។
បើតាមសម្ដីជនរងគ្រោះដែលសុំមិនបញ្ចេញឈ្មោះ បានអោយដឹងថា នៅមុនពេលកើត គេឃើញបុរសជាជនសង្ស័យខាងលើ ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ បាត់ដំបង 1R-6349 មកឈប់ក្រោមដើមឈើធំមួយកន្លែង ដែលមានសភាពងងឹត និងស្ងាត់ ដោយមិនដឹងថា តើបុរសរូបនោះអង្គុយរង់ចាំអ្នកណានោះទេ?។
ជនរងគ្រោះបន្តថា លុះពេលរូបគាត់ចេញមកអង្គុយលេងលើម៉ូតូខាងមុខផ្ទះ ស្រាប់តែបុរសរូបនោះ កាន់កាំបិ.តផ្គាក់ជាប់ដៃ ហើយរត់សំដៅមករករូបគាត់តែម្ដង ធ្វើឲ្យរូបគាត់ដោះស្បែកជើងចោល រួចរត់គេចខ្លួនឆ្លងផ្លូវ ដោយមិនបានមើលឆ្វេងស្ដាំ ព្រោះកំពុងតែភ័យស្លន់ស្លោ ក៏ត្រូវម៉ូតូមិនចាំម៉ាកមួយគ្រឿងជិះមកបុកត្រូវរូបគាត់ បណ្ដាលឲ្យដួលរបួសរលាត់ដៃជើង ហើយម៉ូតូដែលជិះបុកគាត់នោះ ក៏ជិះរត់គេចខ្លួនបាត់ទៅ។
ជនរងគ្រោះបន្តទៀតថា ភ្លាមៗនោះ គាត់ស្រែកឆោឡោបង្កឱ្យមានការភ្ញាក់ផ្អើលដល់ប្រជាពលរដ្ឋនាំគ្នាចេញមកជួយចាប់ឃាត់ខ្លួនបុរសសង្ស័យ(បុរសកាន់កាំបិ.ត)បាន រួចទាក់ទងសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលទន្លេបាសាក់ ចុះទៅកន្លែងកើតហេតុ និងធ្វើការត្រួតពិនិត្យ ព្រមទាំងមើលឆែកឆេរបុរសសង្ស័យនោះ រកឃើញមានកាំបិ.តផ្គាក់ចំនួន១ដើម, កាំបិ.តប៉័ងតោចំនួន១ដើម និងសម្ភារៈមួយចំនួនទៀត រួចក៏នាំខ្លួនបុរសសង្ស័យរូបនោះយកទៅសាកសួរនៅស្នាក់ការប៉ុស្តិ៍ទន្លេបាសាក់តែម្តង។
ក្រោយពេលឃាត់ជនសង្ស័យដែលសង្ស័យថា ប្រើប្រាស់ថ្នាំញៀ.នលើសកម្រិតនោះ នៅមិនទាន់ស្គាល់អត្តសញ្ញាណទេ និងកំពុងឃាត់ខ្លួនបញ្ជូនទៅប៉ុស្តិ៍ទន្លេបាសាក់ ដើម្បីសាកសួរ និងចាត់ការបន្តតាមជំនាញ ដោយយោងតាមជនរងគ្រោះទៅដាក់ពាក្យបណ្ដឹងនៅស្នាក់ការប៉ុស្តិ៍ផងដែរ៕
ចែករំលែកព័តមាននេះ