ភ្នំពេញ៖ សម្តេចតេជោ ហ៊ុន សែន បាន​ប្រកាសថា «ក្នុងគោលដៅរក្សាស្ត្រី ២រូបនេះ បម្រើវិស័យ​ការពារជាតិរយៈពេលវែងចាំបាច់ ត្រូវរៀបចំជានាយទាហានអាជីពតែម្តង»។

សម្តេចតេជោ ហ៊ុន សែន បានប្រកាសដូច្នេះ ក្នុងពេលសម្តេច​ផ្សព្វផ្សាយនូវព្រះរាជក្រឹត្យ​របស់ព្រះករុណាព្រះមហាក្សត្រ ចុះថ្ងៃទី១២ ខែមេសា ឆ្នាំ២០២៣ នេះ ​បាន​ត្រាស់បង្គាប់ ប្រគល់​ឋានន្តរស័ក្តិ នាយទាហាន ថ្នាក់ឧត្ថមសេនីយ៍ នៃកងយោធពលខេមរភូមិន្ទ៖ ក-ប្រគល់ឋានន្តរស័ក្តិ នាយឧត្តមសេនីយ៍ នាយទាហាន ថ្នាក់ឧត្តមសេនីយ៍ នៃកងយោធពលខេមរភូមិន្ទ ជូនលោកជំទាវ ដាំ ដារីនី អត្តលេខ ០០៤២៩០ រដ្ឋលេខាធិការ ក្រសួងការពារជាតិ។ ខ-ប្រគល់ ឋានន្តរស័ក្តិ ឧត្តមសេនីយ៍ឯក នាយទាហាន ថ្នាក់ឧត្តមសេនីយ៍ នៃកងយោធពលខេមរភូមិន្ទ ជូនលោកជំទាវ ម៉ាលី សុជាតា អត្តលេខ ០០៤២៩១ អនុរដ្ឋលេខាធិការ ក្រសួងការពារជាតិ។

ឯកសារ បង្ហាញថា លោកស្រី ដាំ ដារីនី ​បានកាន់តំណែងជារដ្ឋលេខាធិការក្រសួងការពារជាតិ ចាប់តាំងពីអំឡុងឆ្នាំ២០១៤។ មុនកាន់តំណែង ជារដ្ឋលេខាធិការក្រសួងការពារជាតិ លោកស្រី ដាំ ដារីនី ជាអតីតអនុរដ្ឋលេខាធិការក្រសួងអភិវឌ្ឍន៍ជនបទ​ ចាប់ពីឆ្នាំ២០០៨ ដល់ឆ្នាំ២០១៣​។ លោកស្រី ក៏ធ្លាប់បម្រើការ ជាមន្ត្រីនៃក្រសួងកិច្ចការនារី ក្នុងតួនាទីប្រធានការិយាល័យ​ក្រុមប្រឹក្សាជាតិកម្ពុជា ដើម្បីស្ត្រី នៅឆ្នាំ២០០៦ ដល់ឆ្នាំ២០០៨។

​ក្នុងតួនាទីជារដ្ឋលេខាធិការក្រសួងការពារជាតិ ក្នុងរាជរដ្ឋាភិបាល អាណត្តិទី៦នេះ លោកស្រី ដាំ ដារីនី ទទួលបន្ទុកលើការងារយេនឌ័រ ការងារនាយកដ្ឋាន​នីតិកម្ម និងវិទ្យាស្ថាន​វិទ្យាសាស្រ្ដ​សុខាភិបាលនៃកងយោធពលខេមរភូមិន្ទ។

លោកស្រី ដាំ ដារីនី ​ជាសមាជិកក្រុមការងារយុវជនគណបក្សប្រជាជនកម្ពុជា ថ្នាក់កណ្តាល ទទួលបន្ទុកជាប្រធានផ្នែកសិល្បៈ និងកីឡា ព្រមទាំងជាអនុប្រធានក្រុមការងារចុះជួយមូលដ្ឋាន​ស្រុកត្បូងឃ្មុំ។

​​លោកស្រី ដាំ ដារីនី ដែលទើបតែបញ្ចប់​ថ្នាក់បណ្ឌិត នៅរាជ្យបណ្ឌិតសភាកម្ពុជា កាលពីឆ្នាំ២០២២ ក៏ជាអនុប្រធានសហភាពសហព័ន្ធយុវជនកម្ពុជា (ស.ស.យ.ក) ដែលមាន​លោក ហ៊ុន ម៉ានី ជាប្រធាន។

​លោកស្រី ដាំ ដារីនី បាន​បញ្ចប់​ការសិក្សាថ្នាក់​បរិញ្ញាបត្រ​នីតិសាស្ត្រ និងបរិញ្ញាបត្រជាន់ខ្ពស់​រដ្ឋបាលសាធារណៈ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ហើយបានបញ្ចប់បរិញ្ញាបត្រភាសាអង់គ្លេស នៅវិទ្យាស្ថានភាសាបរទេស (IFL)។ លោកស្រី ក៏​បានបញ្ចប់សញ្ញាបត្របណ្ឌិត រដ្ឋបាលសាធារណៈ នៅរាជបណ្ឌិត្យសភាកម្ពុជា កាលពីថ្ងៃទី២៦ ខែសីហា ឆ្នាំ២០២២។

ដោយឡែក លោកស្រី ម៉ាលី សុជាតា មុនកាន់តំណែង​ជាអនុរដ្ឋលេខាធិការ​ ក្រសួងការពារជាតិ លោកស្រី គឺជាមន្ត្រីនៅក្រសួងកិច្ចការនារី​។ លោកស្រី ម៉ាលី សុជាតា គឺជាភរិយារបស់​លោក គង់ ភោគ រដ្ឋលេខាធិការក្រសួងការបរទេស​៕