ADផ្ទាំងផ្សព្វផ្សាយពាណិជ្ជកម្ម

Picture

ធ្វើខុស​ព្រះមិនជួយ! លួច​រថយន្ត​បែន​ដឹក​ដី ​បើក​រត់​គេចខ្លួន បែរជា​​ក្រឡាប់​ធ្លាក់​ចូល​​ប្រឡាយ

11 ខែ មុន
  • តាកែវ

មន្ត្រី​នគរបាល​ស្រុក​បាទី ​ឃាត់ខ្លួន​ជនសង្ស័យ​ម្នាក់ ពាក់​ព័ន្ធ​ករណី​លួច​រថយន្ត​បែន​ដឹក​​ដី​បាន​សម្រេច ហើយ​បើក​រត់​​គេច​​ខ្លួន​មក​ដល់​ស្រុក​សំរោង ក៏​ស្រាប់តែ​​

ខេត្តតាកែវ ៖ មន្ត្រី​នគរបាល​ស្រុក​បាទី ​ឃាត់ខ្លួន​ជនសង្ស័យ​ម្នាក់ ពាក់​ព័ន្ធ​ករណី​លួច​រថយន្ត​បែន​ដឹក​​ដី​បាន​សម្រេច ហើយ​បើក​រត់​​គេច​​ខ្លួន​មក​ដល់​ស្រុក​សំរោង ក៏​ស្រាប់តែ​​ក្រឡាប់​រថយន្ត​ធ្លាក់​ចូល​ប្រឡាយតែម្តង។ ករណី​លួច​រថយន្ត​បែន​ដឹក​ដី​​នេះ កើតឡើង​នៅ​វេលា​ម៉ោង​៤​ទៀប​ភ្លឺ ​ថ្ងៃ​ទី​៦ ខែមេសា ឆ្នាំ​២០២៣ នៅ​ចំណុច​ភូមិ​តា​នប់ ស្ថិត​ក្នុង​ឃុំ​ត្នោត ស្រុក​បាទី ខេត្តតាកែវ ។

ជនសង្ស័យ​ដែល​ត្រូវ​​ចាប់ខ្លួន​​ខាងលើ​នេះ មាន​ឈ្មោះ លុន វ​ណ្ណា ភេទ​ប្រុស អាយុ​២៣​ឆ្នាំ មុខរបរ​មិន​ពិត​ប្រាកដ ជា​មុខសញ្ញា​ប្រើប្រាស់​គ្រឿងញៀ.ន មាន​ទីលំនៅ​​ស្ថិត​ក្នុង​ភូមិ​រំចេក ឃុំ​ត្នោត ស្រុក​បាទី ខេត្តតាកែវ ។

មន្ត្រី​នគរបាល​ស្រុក​បាទី​ បានឱ្យ​ដឹងថា ជនសង្ស័យ​​ខាងលើ​ បាន​ធ្វើ​សកម្មភាព​ចូល​លួច​រថយន្ត​បែន​​ធុន​ធំ​ម៉ាក NISSAN DUMP ពណ៌​បៃតងខ្ចី ស៊េរី​ឆ្នាំ​២០០០ ពាក់​ផ្លា​ក​លេខ ចង្កូត​ស្តាំ KPS-8388 របស់​ជន​រង​គ្រោះ​ឈ្មោះ ហួ វូ​ច​ង៉ែត ភេទ​ស្រី អាយុ​៤៧​ឆ្នាំ មាន​ទីលំនៅ​ភូមិ​តា​នប់ ឃុំ​ត្នោត ស្រុក​បាទី ខេត្តតាកែវ ។

មន្ត្រី​នគរបាល​ស្រុក​បាទី​ ឱ្យ​ដឹង​​ទៀត​ថា ក្រោយ​លួច​រថយន្ត​បាន ជនសង្ស័យ​បើក​រត់គេច​ខ្លួន លុះដល់​​មក​ចំណុច​ភូមិ​ក្រាំងធ្នង់ ឃុំរ​វៀង ស្រុក​សំរោង ខេត្តតាកែវ ក៏​ក្រឡាប់​រថយន្ត​ធ្លាក់​ចូល​ប្រឡាយ​តែ​ម្តង។

ប្រភពដដែល​បន្តថា លុះ​រហូត​មក​ដល់​វេលា​ម៉ោង​៩​ព្រឹក​ថ្ងៃ​ដដែល កម្លាំង​ជំនាញ​របស់​អធិការដ្ឋាន​នគរ​បាល​ស្រុក​បាទី សហការ​ជាមួយ​កម្លាំង​ជំនាញ​របស់​អធិការដ្ឋាន​នគរបាល​ស្រុក​សំរោង រួម​សហ​ការ​ជាមួយ​កម្លាំង​ប៉ុស្តិ៍​នគរបាល​រដ្ឋបាល​រវៀង និង​កម្លាំង​ប្រជា​ការពារ ទើប​ឃាត់ខ្លួន​​ជនសង្ស័យ​នៅ​ត្រង់​ចំណុច​ក្នុង​ព្រៃ​ ស្ថិត​នៅ​​ក្នុង​ភូមិ​បឹង​ក​ន្ទ្រ​ន់ ឃុំ​ស្លា ស្រុក​សំរោង ខេត្តតាកែវ រួច​នាំ​ខ្លួន​យក​មក​អធិ​ការដ្ឋាន​នគរបាល​ស្រុក​បាទី​ ដើម្បី​សាកសួរ ។

ក្រោយ​ពេល​ឃាត់​ខ្លួន ​ជនសង្ស័យ​ត្រូវ​កសាង​សំណុំរឿង​បញ្ជូន​ទៅ​សាលាដំបូង​ខេត្តតាកែវ​ ដើម្បី​ចាត់ការ​​តាម​នីតិ​វី​ធី​។ ដោយ​សារ​មាន​បញ្ជា​ពី​ព្រះរាជអាជ្ញា​អម​សាលាដំបូង​ខេត្តតាកែវ កម្លាំង​ជំនាញ​ក៏​បាន​ប្រគល់​រថយន្ត​បែន​ធុន​ធំ ​ឲ្យ​ទៅ​ម្ចាស់​វិញ ដើម្បី​យក​ទៅ​ប្រើប្រាស់ ៕

អត្ថបទសរសេរ ដោយ

កែសម្រួលដោយ