រថយន្តកូរ៉េបុកកៀរម៉ូតូដួលចូលក្រោមតុលក់បបរនៅមុខរោងចក្រ
រាជធានីភ្នំពេញ ៖ បុរសម្នាក់បែកក្បាលសន្លប់ស្តូកស្តឹង ខណៈពេលកំពុងតែជិះម៉ូតូត្រូវរថយន្តកូរ៉េមួយគ្រឿង បើកកៀរឲ្យដួលខ្ទាតចូលក្រោមតុលក់បបរ ដែលគរនៅជាប់របងរោងចក្រ
រាជធានីភ្នំពេញ ៖ បុរសម្នាក់បែកក្បាលសន្លប់ស្តូកស្តឹង ខណៈពេលកំពុងតែជិះម៉ូតូត្រូវរថយន្តកូរ៉េមួយគ្រឿង បើកកៀរឲ្យដួលខ្ទាតចូលក្រោមតុលក់បបរ ដែលគរនៅជាប់របងរោងចក្រ ហើយរថយន្តបើករត់បាត់ស្រមោល ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី១១ ខែតុលា ឆ្នាំ២០១៧ តាមបណ្តោយផ្លូវជាតិលេខ៥ នៅចំណុចមុខវិទ្យាល័យឬស្សីកែវ ស្ថិតនៅក្នុងសង្កាត់ឬស្សីកែវ ខណ្ឌឬស្សីកែវ ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញបុរសម្នាក់ជិះម៉ូតូម៉ាកហុងដាឌ្រីម ពណ៌ខ្មៅ ស៊េរី២០១៥ ពាក់ស្លាកលេខ កំពង់ស្ពឺ ១G-៤០៣៧ ធ្វើដំណើរមកតាមបណ្តោយផ្លូវជាតិលេខ៥ ទិសដៅពីត្បូងទៅជើងក្នុងល្បឿនលឿន ខណៈពេលមកដល់ចំណុចកើតហេតុខាងលើក៏ស្រាប់តែមានរថយន្តកូរ៉េមួយតោនកន្លះមួយគ្រឿង ពណ៌ខៀវ បើកយ៉ាងលឿនកៀរម៉ូតូហុងដាឌ្រីម បណ្តាលឲ្យបុរសរងគ្រោះរេចង្កូតម៉ូតូទៅបុកចូលក្រោមតុលក់បបរដែលគេគរនៅជាប់របងមុខរោងចក្រ ឬឯអ្នកបើកម៉ូតូវិញដួលបែកក្បាលហូរឈាមស្រោចពេញខ្លួនសន្លប់ស្តូកស្តឹងនៅនឹងកន្លែងកើតហេតុ ភ្លាមៗនោះដែលរថយន្តបង្កបានរត់ចូលទៅតាមច្រកចូលវិទ្យាល័យឬស្សីកែវបាត់ស្រមោល ។
ក្រោយពេលកើតហេតុ រថយន្តសង្គ្រោះរបស់គ្លីនិកឯកជនមួយ ដឹកយកទៅព្យាបាល ឬឯម៉ូតូជនរងគ្រោះវិញ ត្រូវសមត្ថកិច្ចយកទៅរក្សាទុកឲ្យនៅប៉ុស្តិ៍រដ្ឋបាលនគរបាលឬស្សីកែវ ៕
ចែករំលែកព័តមាននេះ