ខ្យល់កន្ត្រាក់បោកបក់ ធ្វើឱ្យផ្ទះជាង១០០ខ្នង ក្នុងភូមិចំនួន២ រងការខូចខាត
- ពោធិ៍សាត់
យ៉ាងហោចណាស់ លំនៅឋានចំនួន ១៦៧ខ្នង ខ្លះត្រូវដួលរលំ ខ្លះទ្រេត និងខ្លះរបើកដំបូល ដោយសារខ្យល់កន្ត្រាក់
ខេត្តពោធិ៍សាត់ ៖ យ៉ាងហោចណាស់ លំនៅឋានចំនួន ១៦៧ខ្នង ខ្លះត្រូវដួលរលំ ខ្លះទ្រេត និងខ្លះរបើកដំបូល ដោយសារខ្យល់កន្ត្រាក់ កាលពីថ្ងៃទី២៩ ខែមីនា ឆ្នាំ២០២៣កន្លងទៅ វេលាម៉ោងប្រមាណ៤រសៀល នៅភូមិចំនួន២គឺ ភូមិប្រហាលនិងភូមិសំសាន្ត ស្រុកតាលោសែនជ័យ។
លោកអធិការនគរបាលស្រុកតាលោសែនជ័យបានឲ្យដឹងថា នៅថ្ងៃទី២៩ ខែមីនា ឆ្នាំ២០២៣នោះ ចន្លោះ ពីម៉ោង៤ដល់ម៉ោង៥ល្ងាច នៅស្រុកតាលោសែនជ័យមានភ្លៀងធ្លាក់បន្តិចបន្តួច ប៉ុន្តែខ្យល់ខ្លាំងណាស់ បណ្ដាលឲ្យប៉ះពាល់ផ្ទះសម្បែងអ្នកស្រុក ខ្លះប៉ើងដំបូលទាំងផ្ទាំងធ្លាក់ចូលស្រះទឹក ខ្លះរបើកដំបូលធ្លុះធ្លាយ ដួលរលំ និងទ្រេតធ្លាក់ពីលើជើងតាង ប៉ុន្តែមិនបណ្ដាលឲ្យមានគ្រោះថ្នាក់ដល់អាយុជីវិតមនុស្សទេ ។
លោកអធិការឲ្យដឹងទៀតថា ខ្យល់កន្ត្រាក់នៅស្រុកតាលោសែនជ័យនេះ ប៉ះពាល់ភូមិចំនួន២គឺភូមិប្រហាលនិងភូមិសំសាន្ត ។ នៅភូមិប្រហាលខូចខាតផ្ទះចំនួន ២៤ខ្នង ក្នុងនោះធ្ងន់ ១៣ខ្នងមធ្យម ៩ខ្នង និងស្រាល២ខ្នង ។ នៅភូមិសំសាន្ដ ខូចខាតផ្ទះចំនួន១៤៣ខ្នង ក្នុងនោះធ្ងន់ ៦២ខ្នង មធ្យម ៥០ខ្នង និងស្រាល ៣១ខ្នង។ ក្នុងចំណោមនោះដែរ ផ្ទះអតីតយុទ្ធជនមានចំនួន៣០ខ្នង ខូចធ្ងន់ ១៥ខ្នង មធ្យម ២ខ្នង និងស្រាល ១៣ខ្នង ។
លោកអធិការបន្តថា ក្រោយពេលខ្យល់កន្ត្រាក់កើតឡើងប្រមាណ៣០នាទី លោក សំ ណារិទ្ធ អភិបាលស្រុកតាលោកសែនជ័យ បានចាត់ចែងអង្ករ និងមី ដែលឯកឧត្ដម ខូយ រីដា អភិបាលខេត្ត ត្រៀមបម្រុងទុកសម្រាប់ដោះស្រាយបន្ទាន់ដល់ជនងាយរងគ្រោះ បាននាំយកទៅចែកជូនបងប្អូនរងគ្រោះដល់ទីកន្លែងភ្លាមៗតែម្ដង ៕
ចែករំលែកព័តមាននេះ