កូនភ្លោះប្រុសពីរនាក់ដែលម្តាយបង្កើតមិនទាន់ទាំងកាត់ទងផ្ចិតផង ក៏បានយកមកប្លុងចោល នៅក្បែរចិញ្ចើមថ្នល់មួយកន្លែងក្នុងឃុំស្ដើងជ័យ ស្រុកជើងព្រៃ
ខេត្តកំពង់ចាម ៖ កូនភ្លោះប្រុសពីរនាក់ដែលម្តាយបង្កើតមិនទាន់ទាំងកាត់ទងផ្ចិតផង ក៏បានយកមកប្លុងចោល នៅក្បែរចិញ្ចើមថ្នល់មួយកន្លែងក្នុងឃុំស្ដើងជ័យ ស្រុកជើងព្រៃ កាលពី៥ថ្ងៃមុននោះមានសំណាងល្អត្រូវបានយុវជនរៀនភាសាកូរ៉េប្រទះឃើញពេលឈប់ម៉ូតូបត់ជើងតូច នៅវេលាម៉ោងជិត៧យប់ ក៏រើសបានទៅចិញ្ចឹមនៅឯផ្ទះរបស់ខ្លួនក្នុងភូមិតាអុក ឃុំបឹងណាយ ស្រុកព្រៃឈរ បន្ទាប់ពីនាំកូនភ្លោះតូចៗនេះចូលមណ្ឌលសុខភាពឱ្យពេទ្យកាត់ទងផ្ចិតនិងសម្អាតរួចរាល់ ។
ការរើសបានកូនភ្លោះដែលគេប្លុងចោលនេះបានបង្កឱ្យមានការភ្ញាក់ផ្អើលហើយក៏មានអ្នកជិតខាងមកសុំចង់យកទៅចិញ្ចឹម តែយុវជនរូបនោះមិនព្រមឲ្យឡើយ ។
លោក ជុំ សៅ មេភូមិតាអុកមានប្រសាសន៍ប្រាប់ឲ្យដឹងតាមទូរស័ព្ទនារសៀលថ្ងៃទី២៩ មីនា ឆ្នាំ២០២៣ថា យុវជនដែលរើសបានកូនភ្លោះប្រុសពីរនាក់ឈ្មោះ ឈឹម សុខហ៊ុយ អាយុ២២ឆ្នាំ រស់នៅភូមិតាអុក ឃុំបឹងណាយ ស្រុកព្រៃឈរ ខេត្តកំពង់ចាម ជាសិស្សរៀនភាសាកូរ៉េនៅស្គន់ ស្រុកជើងព្រៃ ។ យុវជនរូបនេះជាកូនទី៣ ក្នុងចំណោមបងប្អូន៧នាក់ រាល់ថ្ងៃរស់នៅជាមួយឪពុកឈ្មោះ សារឿន ។
លោកមេភូមិតាអុកបានប្រាប់បន្តឲ្យដឹងទៀតថា ក្រោយពីអ្នកជិតខាងបានពន្យល់ពីផលវិបាក និងរូបលោកជាមេភូមិផ្ទាល់លើកហេតុផលពីការចិញ្ចឹមកូនភ្លោះ ដែលមិនគ្រប់គីឡូគឺមិនស្រួលនោះទេ ត្រូវតែមានការថែទាំឱ្យបានត្រឹមត្រូវ ។ ដោយស្ដាប់ការណែនាំរួចមកទើបយុវជនរូបនេះបានសម្រេចចិត្តនាព្រឹកថ្ងៃទី២៩ មីនា ឆ្នាំ២០២៣ ដោយប្រគល់កូនភ្លោះទាំងពីរនោះឲ្យទៅលោកស្រីភរិយារបស់លោក ហាន កុសល អភិបាលរងខេត្តកំពង់ចាមជាអ្នកចិញ្ចឹមរក្សាបន្ត ។
លោកមេភូមិបានលើកឡើងថា យុវជនដែលរើសបានកូនភ្លោះពីរនាក់នេះក៏បានទៅជួសឈាមនៅស្រុកជើងព្រៃ ដើម្បីត្រៀមខ្លួនចេញទៅបម្រើការងារជាពលករនៅប្រទេសកូរ៉េ ។ ហើយកូនភ្លោះប្រុសពីរនាក់កើតមកមិនគ្រប់គីឡូ ក៏កំពុងត្រូវបានក្រុមគ្រូពេទ្យដាក់ចិញ្ចឹមក្នុងកែវវិទ្យាសាស្ត្រនៅឡើយ។ កូនភ្លោះទាំង២ត្រូវបានយុវជនដែលរើសបានដាក់ឈ្មោះឱ្យ ១-ឈ្មោះ សុភ័ក្ត្ររតនៈ ២-ឈ្មោះ សុភ័ក្ត្ររតនា ។
ចំពោះជោគវាសនាកូនភ្លោះអភ័ព្វទាំង២ដែលគេបោះបង់ចោលដូចសត្វធាតុកំពុងទទួលបានការរក្សាក្នុងកែវដើម្បីឱ្យសុខភាពរបស់គេបានរឹងមាំ ។
បើតាមលោកអភិបាលស្រុកព្រៃឈរបានប្រាប់ព្រឹកថ្ងៃទី៣០ មីនា បន្ថែមថាកូនភ្លោះប្រុសទាំងពីរដែលកំពុងត្រូវបានចិញ្ចឹមក្នុងកែវវិទ្យាសាស្ត្រនៅមន្ទីរពេទ្យខេត្តនេះ បើពេលដែលសុខភាពរបស់ពួកគេរឹងមាំនោះនឹងត្រូវប្រគល់ឱ្យលោកជំទាវបានស្រីមុំអភិបាលខេត្តប៉ៃលិន ដើម្បីយកទៅចិញ្ចឹមបន្ត ។ បើព័ត៌មានក្លាយជាការពិត ចាត់ទុកថាកូនភ្លោះទាំង២មានវាសនាខ្ពស់ណាស់ ។ សូមឱ្យពួកគេមានសុខភាពល្អនិងអនាគតត្រចះត្រចង់ទៅចុះ។
គួររំលឹកថា ៖ សិស្សរៀនភាសាកូរ៉េម្នាក់ ជិះម៉ូតូមកផ្ទះវិញ រើសបានកូនភ្លោះប្រុសបង្កឲ្យមានការភ្ញាក់ផ្អើល ៕
ចែករំលែកព័តមាននេះ