ពេលចូលឆ្នាំ! អ្នកនៅភ្នំពេញ បើមិនទៅណា សូមកុំភ្លេចទៅលេងសង្ក្រាន្តវត្តភ្នំ!
- ភ្នំពេញ
ភ្នំពេញ៖ ពិធីបួងសួង សុំសេចក្តីសុខ ក្នុងដំណើរការតុបតែង រៀបចំសង្ក្រាន្តវត្តភ្នំ បានចាប់ផ្តើមហើយ នៅពេលនេះ។ រាជធានីភ្នំពេញ នឹងរៀបចំសង្ក្រាន្តវត្តភ្នំ រយៈពេល…
ភ្នំពេញ៖ ពិធីបួងសួង សុំសេចក្តីសុខ ក្នុងដំណើរការតុបតែង រៀបចំសង្ក្រាន្តវត្តភ្នំ បានចាប់ផ្តើមហើយ នៅពេលនេះ។ រាជធានីភ្នំពេញ នឹងរៀបចំសង្ក្រាន្តវត្តភ្នំ រយៈពេល ៣ថ្ងៃ ក្នុងអំឡុងពេលពិធីបុណ្យចូលឆ្នាំថ្មី ប្រពៃណីជាតិ នាថ្ងៃទី១៤-១៦ ខែមេសា ឆ្នាំ២០២៣។
លោក ជុំ វុទ្ធី ប្រធានមន្ទីរវប្បធម៌ និងវិចិត្រសិល្បៈ រាជធានីភ្នំពេញ បានប្រាប់កោះសន្តិភាពថា នៅថ្ងៃទី២៩ ខែមីនានេះ ដោយមានការណែនាំពីលោក ឃួង ស្រេង អភិបាលរាជធានីភ្នំពេញ លោក បានដឹកនាំក្រុមការងារជំនាញ ធ្វើពិធីដុតធូប បួងសួង សុំម្ចាស់ទឹកម្ចាស់ដី សុំសេចក្តីសុខសប្បាយ និងជោគជ័យ ដើម្បីចាប់ដំណើរការតុបតែងរៀបចំ នៅក្នុងបរិវេណរមណីយដ្ឋានវប្បធម៌ប្រវត្តិសាស្ត្រ វត្តភ្នំ ដើម្បីធ្វើពិធីសង្ក្រាន្តវត្តភ្នំ ក្នុងអំឡុងពេលចូលឆ្នាំថ្មី ប្រពៃណីជាតិ។
លោកបន្តថា សង្ក្រាន្តវត្តភ្នំ ឆ្នាំនេះ ប្រព្រឹត្តិទៅ នៅថ្ងៃទី១៤.១៥.១៦ ខែមេសា។ សម្រាប់ថ្ងៃទី១៤មេសា ជាថ្ងៃចូលឆ្នាំថ្មី ប្រពៃណីជាតិខ្មែរយើង នៅវេលាម៉ោង ៤រសៀល។
លោក ជុំ វុទ្ធី បានឱ្យដឹងទៀតថា សង្ក្រាន្តវត្តភ្នំ នៅឆ្នាំនេះ មានរៀបចំ «ភូមិខ្ញុំ» ឬ «ភូមិខ្មែរយើង» ដែលរៀបចំជាផ្នែកៗ ក្នុងនោះ មានការតាំងបង្ហាញ ភូមិមួយផលិតផលមួយ ជារបស់ខ្មែរយើង រៀបចំកន្លែងប្រគុំតន្ត្រីសម័យ កន្លែងរាំវង់ កន្លែងស្រង់ព្រះ ពូនភ្នំខ្សាច់។ ចំណែកទីតាំងលេងល្បែងប្រជាប្រិយ នៅផ្នែកខាងលិចឆៀងខាងត្បូង ព្រោះទីតាំងធំទូលាយ។
លោកប្រធានមន្ទីរ បន្តថា សម្រាប់ល្បែងប្រជាប្រិយ មានដូចជា ចោលឈូង ទាញព្រ័ត្រ បោះអង្គុញ ឬលាក់កន្សែង ជាដើម។ល។ ក្នុងនោះ ក៏មានការតាំងលក់ផលិតផលនានាជាច្រើនទៀត តែជាចំណីអាហារក្រៀមៗ ដែលរៀបចំព័ទ្ធជុំវិញវត្តភ្នំតែម្តង ហើយក៏មានការតុបតែងក្លោងទ្វារច្រកចូលវត្តភ្នំផងដែរ។
លោកបន្តថា សង្ក្រាន្តវត្តភ្នំ ឆ្នាំនេះ មានរយៈពេល ៣ថ្ងៃ ចាប់ពីម៉ោង ៨ព្រឹកទៅ មានការលេងល្បែងប្រជាប្រិយ និងចាប់ពីម៉ោង ៤រសៀលទៅ មានការប្រគុំតន្ត្រី ជារៀងរាល់ថ្ងៃ។ ដោយឡែក សម្រាប់ថ្ងៃចូលឆ្នាំទី៣ ត្រូវនឹងថ្ងៃទី១៦មេសា ចាប់ពីរសៀលម៉ោង ២ និង ៣០នាទី នឹងមានពិធីដង្ហែព្រះ ដោយនិមន្តព្រះសង្ឃ ៥អង្គ សូត្រធម៌ ដង្ហែ និមន្ត ៣ជុំ ជុំវិញព្រះវិហារវត្តភ្នំ និងមានពិធីស្រង់ព្រះ តាមប្រពៃណីផងដែរ៕
ចែករំលែកព័តមាននេះ