លាហើយ Camry! Toyota ប្រកាសឈប់លក់រថយន្តម៉ូដែលនេះក្នុងទីផ្សារជប៉ុន
ជប៉ុន ៖ ក្រុមហ៊ុនយក្សផលិតរថយន្តរបស់ប្រទេសជប៉ុន Toyota បានប្រកាសបញ្ឈប់ការលក់រថយន្តម៉ូ
ជប៉ុន ៖ ក្រុមហ៊ុនយក្សផលិតរថយន្តរបស់ប្រទេសជប៉ុន Toyota បានប្រកាសបញ្ឈប់ការលក់រថយន្តម៉ូ
ជប៉ុន ៖ ក្រុមហ៊ុនយក្សផលិតរថយន្តរបស់ប្រទេសជប៉ុន Toyota បានប្រកាសបញ្ឈប់ការលក់រថយន្តម៉ូដែល Camry ដ៏ល្បីល្បាញជាប្រវត្តិសាស្ត្ររបស់ខ្លួន នៅក្នុងទីផ្សារក្នុងស្រុក បន្ទាប់ពីរយៈពេល៤៣ឆ្នាំនៃការលក់រថយន្តទ្វារ៤ម៉ូដែលនេះដ៏ល្បីរន្ទឺនៅទូទាំងពិភពលោក។
យ៉ាងណាមិញ Camry នឹងនៅតែមានលក់នៅទីផ្សារសហរដ្ឋអាមេរិក និងទីផ្សារពិភពលោក ខណៈដែលក្រុមហ៊ុន Toyota បានលក់រថយន្តម៉ូដែលនេះ សរុបចំនួន៦០ម៉ឺនគ្រឿងកាលពីឆ្នាំមុន ដោយជាង ២៩៥,០០០គ្រឿងក្នុងចំណោមនោះ ស្ថិតនៅទីផ្សារសហរដ្ឋអាមេរិក។
យោងតាមប្រភពពីសារព័ត៌មានរបស់ជប៉ុន Nikkei បានធ្វើការកត់សម្គាល់ឃើញថា រថយន្តធុនតូចកំពុងមានប្រជាប្រិយភាពតិចនៅក្នុងទីផ្សារប្រទេសជប៉ុន ខណៈដែលអ្នកប្រើប្រាស់ងាកមករករថយន្ត SUV និងរថយន្ត Minivans (លក្ខណៈគ្រួសារ) ជំនួសវិញ។ ស្របពេលដែលនៅសហរដ្ឋអាមេរិក ក៏កំពុងផ្លាស់ប្តូរលើតម្រូវការប្រើប្រាស់រថយន្តពីរប្រភេទនេះផងដែរ។
បើទោះជាបញ្ឈប់ការលក់ម៉ូដែល Camry នៅទីផ្សារក្នុងស្រុកក៏ពិតមែន ប៉ុន្តែក្រុមហ៊ុន Toyota នៅតែបន្តលក់រថយន្តម៉ូដែល Century, Corolla, និង Mirai Sedan នៅទីផ្សារក្នុងស្រុក រួមនិងរថយន្តធុនតូចៗផ្សេងទៀតផងដែរ។
នៅក្នុងលិខិតមួយ ក្រុមហ៊ុន Toyota បានបញ្ជាក់ប្រាប់អ្នកចែកចាយរបស់ខ្លួននៅក្នុងប្រទេសជប៉ុនថា ខ្លួននឹងបិទការផលិតរថយន្តម៉ូដែល Camry សម្រាប់ទីផ្សារប្រទេសជប៉ុននៅចុងឆ្នាំនេះ។ ការលក់កំពុងបញ្ចប់ជាដំណាក់កាល ប៉ុន្តែដោយសារអ្នកចែកចាយភាគច្រើនបានទទួលការបញ្ជាទិញម៉ូដែល Camry ពីអតិថិជនរួចហើយ ដូច្នេះក្រុមហ៊ុនចង់ផ្តល់ជូនអតិថិជននូវម៉ូដែល Crown Sedan ស៊េរីថ្មីជំនួសវិញ។
ក្នុងរយៈពេលជាច្រើនទសវត្សរ៍ចាប់តាំងពីក្រុមហ៊ុន Toyota បានប្រកាសការលក់រថយន្តម៉ូដែល Camry ទៅកាន់ទីផ្សារជប៉ុននៅក្នុងឆ្នាំ១៩៨០ ក្រុមហ៊ុនផលិតរថយន្តយក្សរបស់ជប៉ុនមួយនេះ បានលក់រថយន្តម៉ូដែលនេះបានប្រហែល ១.៣លានគ្រឿង។ រថយន្តម៉ូដែលនេះ បានឆ្លងកាត់ការផលិត១០ជំនាន់ ហើយលក់បានជាង២១លានគ្រឿងនៅជាង១០០ប្រទេសជុំវិញពិភពលោក ដោយនៅក្នុងនោះប្រហែល១៣លានគ្រឿងត្រូវបានលក់នៅសហរដ្ឋអាមេរិក៕ (ដកស្រង់ចេញពី Car And Driver)
ចែករំលែកព័តមាននេះ