ត្រាំត្រូវចាប់ខ្លួន? ពូទីនជាប់ពន្ធនាគារ? បណ្តារូបក្លែងក្លាយកំពុងអុកឡុកបណ្តាញសង្គមពិភព លោក
សហរដ្ឋអាមេរិក ៖ រូបភាព និងព័ត៌មានមិនពិតអំពីអតីតប្រធានាធិបតីសហរដ្ឋអាមេរិក លោក ដូ
សហរដ្ឋអាមេរិក ៖ រូបភាព និងព័ត៌មានមិនពិតអំពីអតីតប្រធានាធិបតីសហរដ្ឋអាមេរិក លោក ដូ
សហរដ្ឋអាមេរិក ៖ រូបភាព និងព័ត៌មានមិនពិតអំពីអតីតប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ត្រូវបានចាប់ខ្លួនដោយក្រុមប៉ូលិសកុបកម្មប្រចាំទីក្រុងញូវយ៉ក រួមនឹងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ជាប់ក្នុងពន្ធនាគារពណ៌ប្រផេះពីក្រោយរបារបន្ទប់បេតុងដែលមានពន្លឺតិចៗ កំពុងតែវាយលុកលើបណ្តាញសង្គមពិភពលោក ដែលធ្វើឱ្យអ្នកតាមដានមួយចំនួនមានការភាន់ច្រឡំយ៉ាងខ្លាំង។
រូបភាពដ៏លម្អិត និងដំណឹងដ៏ភ្ញាក់ផ្អើលកំពុងវាយលុកយ៉ាងខ្លាំងលើបណ្តាញសង្គម Twitter និងវេទិកាផ្សេងទៀតក្នុងរយៈពេលប៉ុន្មានថ្ងៃថ្មីៗនេះ ចំពេលមានព័ត៌មានថា លោក ត្រាំ ប្រឈមមុខនឹងការចោទប្រកាន់បទព្រហ្មទណ្ឌ ហើយស្របពេលដែលតុលាការឧក្រិដ្ឋកម្មអន្តរជាតិ ICC បានចេញដីកាចាប់ខ្លួនលោកពូទីនផងដែរ។
ព័ត៌មាន ព្រមទាំងរូបភាពមិនពិតជាច្រើន ត្រូវបានបង្កើតឡើងដោយប្រើកម្មវិធីកែច្នៃរូបភាពដែលកាន់តែទំនើប និងអាចចូលប្រើបានយ៉ាងទូលំលើប្រព័ន្ធអ៊ីនធឺណិត។ អ្នកជំនាញខាងផ្នែកព័ត៌មានមិនពិតបានព្រមានថា រូបភាពទាំងនោះគឺជាការពិតថ្មីមួយដែលបង្ហាញពីរលកនៃរូបភាព និងវីដេអូក្លែងក្លាយ ដែលកំពុងលិចលង់លើប្រព័ន្ធផ្សព្វផ្សាយសង្គម បន្ទាប់ពីព្រឹត្តិការណ៍ព័ត៌មានសំខាន់ៗ ការបំភ័ន្តការពិត និងការច្នៃប្រឌិតបន្ថែមទៀតក្នុងពេលវេលាដ៏សំខាន់សម្រាប់សង្គម។
លោក Jevin West សាស្ត្រាចារ្យនៃសាកលវិទ្យាល័យ Washington មូលដ្ឋានក្នុងទីក្រុងស៊ីតថល (Seattle) ដែលផ្តោតលើការផ្សព្វផ្សាយព័ត៌មានមិនពិតបាននិយាយថា «វាកំពុងបន្ថែមសំលេងរំខានអំឡុងពេលព្រឹត្តិការណ៍វិបត្តិ ដែលកើតមាននៅលើពិភពលោក ហើយវាក៏បង្កើនកម្រិតនៃការមើលងាយសិទ្ធិបុគ្គលផងដែរ។ ជាលទ្ធផល អ្នកចាប់ផ្តើមបាត់បង់ទំនុកចិត្តលើប្រព័ន្ធផ្សព្វផ្សាយសង្គម និងព័ត៌មានដែលអ្នកកំពុងទទួលបាន ខណៈដែលសមត្ថភាពក្នុងការរៀបចំ និងបង្កើតរូបភាពក្លែងក្លាយមិនមែនជារឿងថ្មីនោះទេ ប៉ុន្តែឧបករណ៍បង្កើតរូបភាពដោយកម្មវិធី Midjourney, DALL-E និងកម្មវិធីផ្សេងទៀតគឺងាយស្រួលប្រើ និងបង្កើតរូបភាពដូចជាការពិត។ ពួកគេអាចបង្កើតរូបភាពជាក់ស្តែងបានយ៉ាងឆាប់រហ័ស ពេញលេញជាមួយនឹងផ្ទៃខាងក្រោយដ៏លម្អិតជាទីបំផុត»។
រូបភាពថ្មីៗមួយចំនួន ត្រូវបានជំរុញដោយការចេញផ្សាយនៅក្នុងខែនេះ សម្រាប់កំណែថ្មីនៃគំរូសំយោគអត្ថបទទៅនឹងរូបភាពរបស់កម្មវិធី Midjourney ដែលបង្កើតរូបគួរឱ្យជឿជាក់ ដែលធ្វើត្រាប់តាមរចនាបទនៃរូបថតទីភ្នាក់ងារសារព័ត៌មាន។
នៅក្នុងបណ្តាញ Twitter ដែលផ្សព្វផ្សាយយ៉ាងទូលំទូលាយដោយគណនី Eliot Higgins ស្ថាបនិកនៃក្រុមអ្នកកាសែតស៊ើបអង្កេត មានមូលដ្ឋាននៅប្រទេសហូឡង់ បានប្រើកំណែចុងក្រោយបំផុតនៃឧបករណ៍នេះ ដើម្បីបញ្ចូលរូបភាពប្រឌិតជាច្រើននៃការចាប់ខ្លួនលោកត្រាំ។ រូបភាពដែលត្រូវបានចែករំលែក និងអ្នកចុច Like រាប់ម៉ឺនដង បានបង្ហាញឱ្យឃើញក្រុមប៉ូលិសពាក់ឯកសណ្ឋានបានចាប់ខ្លួនអតីតប្រធានាធិបតីសហរដ្ឋអាមេរិករូបនេះ ហើយទាញគាត់ដោយហិង្សាទៅលើចិញ្ចើមផ្លូវ។
គណនីដដែលនេះ ក៏ជាអ្នកនៅពីក្រោយរូបភាពលោកពូទីន ដែលត្រូវបានចាប់ខ្លួន យកទៅកាត់ទោស និងដាក់ពន្ធនាគារផងដែរនោះ បានអះអាងថា ខ្លួនបង្ហោះរូបភាពទាំងនោះ មិនមានចេតនាអាក្រក់នោះទេ។ ដោយថែមទាំងបានបញ្ជាក់យ៉ាងច្បាស់ទៀតថា រូបភាពទាំងនោះ ត្រូវបានបង្កើតឡើងដោយ AI (បញ្ញាសិប្បនិម្មិត)។
ពាក់ព័ន្ធបញ្ហានេះ លោកស្រី Shirin Anlen អ្នកបច្ចេកទេសប្រព័ន្ធផ្សព្វផ្សាយនៅ Witness ដែលជាអង្គការសិទ្ធិមនុស្សមានមូលដ្ឋាននៅទីក្រុងញូវយ៉កបាននិយាយថា វាមិនទាន់គ្រប់គ្រាន់ទេ ដែលអ្នកប្រើប្រាស់ដូចជា Higgins បញ្ជាក់យ៉ាងច្បាស់នៅក្នុងការបង្ហោះរបស់ពួកគេថា រូបភាពត្រូវបានបង្កើតឡើងដោយ AI និងសម្រាប់តែការកម្សាន្តតែប៉ុណ្ណោះ ហើយជាញឹកញាប់ រូបភាពដែលមើលឃើញត្រូវបានអ្នកផ្សេងទៀត ចែកចាយបន្តយ៉ាងឆាប់រហ័ស ដោយគ្មានបរិបទសំខាន់នោះទេ៕ (ដកស្រង់ចេញពីទីភ្នាក់ងារសារព័ត៌មាន AP)
ចែករំលែកព័តមាននេះ