ខេត្តព្រៃវែង ៖ ប្រជាពលរដ្ឋជាច្រើនពាន់នាក់បាននាំគ្នាមកទស្សនា ការប្រណាំងអុំទូក ដែលត្រូវបានប្រារព្ធឡើងនៅមាត់ទន្លេខាងមុខសាលាខេត្តព្រៃវែង នាព្រឹកថ្ងៃទី០៤ ខែតុលា ឆ្នាំ២០១៧ ដែលមានទូកចូលរួមសរុបចំនួន៣០ទូក ក្នុងនោះទូកខ្នាតវែង ចំនួន១១ទូក និងទូកខ្នាតអន្តរជាតិចំនួន១៩ទូក និងមានអ្នកចូលរួមអុំ ចំនួន១២១៥នាក់ និងត្រៀមចំនួន២៧៩នាក់ សរុបទាំងអស់ចំនួន១៤៩៤នាក់ ។
បើតាមលោក សួន ម៉ាលីន អភិបាល នៃគណៈអភិបាលរងខេត្តព្រៃវែង បានឱ្យដឹងថា ពិធីប្រណាំងទូកនេះ និងប្រារព្ធទៅរយៈពេលពីថ្ងៃ គឺចាប់ពីថ្ងៃទី០៤ និងបិទបញ្ចប់ទៅវិញនាព្រឹកទី០៥ ខែតុលា ឆ្នាំ២០១៧ ហើយគោលបំណងដែលរដ្ឋបាលព្រៃវែងរៀបចំកម្មវិធីនេះឡើង គឺដើម្បីអបអរសាទរពិធីបុណ្យចេញព្រះវស្សា ។
នៅក្នុងឱកាសបើកកម្មវិធីអុំទូកនេះដែរ លោក ជា សុមេធី បានមានប្រសាសន៍ផ្តាំផ្ញើដល់បងប្អូនក្រុមកីឡាករចំណុះទូកទាំងអស់ ត្រូវមើលថែសុខភាពរបស់ខ្លួនឱ្យបានល្អ ព្រោះមួយរយៈនេះអាកាសធាតុពុំសូវអំណោយផង ជាពិសេសបងប្អូនទាំងត្រូវហូបឱ្យបានគ្រប់គ្រាន់ និងសម្រាកឱ្យបានគ្រប់គ្រាន់ ដើម្បីមានកម្លាំងអាចអុំឈ្នះដៃគូប្រកួតបាន ។
ក្នុងពេលនោះដែរ តំណាងក្រុមចំណុះទូកទាំងអស់ ក៏បង្ហាញពីការប្ដេជ្ញាចិត្តក្នុងការចូលរួមនៃពិធីអុំទូកនេះផងដែរ ថាពួកគាត់នឹងខិតខំធ្វើយ៉ាងណា ដើម្បីបានឈ្នះក្នុងការប្រកួតនៅថ្ងៃស្អែកនេះផង និងគោរពបទបញ្ជាផ្ទៃក្នុងរបស់គណៈកម្មាធិការ របៀបចំការប្រណាំងទូកនេះផងដែរ ។
គួរបញ្ជាក់ដែរថា កាលពីនាល្ងាចថ្ងៃទី០៣ ខែតុលា ឆ្នាំ២០១៧ នេះ រដ្ឋបាលខេត្តព្រៃវែង ក៏បានរៀបចំផ្តល់អំណោយមួយចំនួនដល់តំណាងចំណុះទូកដែលមកចូលរួមក្នុងការប្រណាំងទូកនាថ្ងៃទី០៤ និងទី០៥ ខែតុលា ឆ្នាំ២០១៧ ផងដែរ ដើម្បីជួយសម្រួលដល់ការហូបចុករបស់បងប្អូនក្រុមចំណុះទូកផងដែរ ហើយអំណោយទាំងអស់នេះ គឺជាអំណោយរបស់សប្បុរសជនមួយចំនួន និងមួយចំនួនទៀតជាអំណោយដោយផ្ទាល់ពី សម្តេចក្រឡាហោម ស ខេង និងលោក ជា សុមេធី អភិបាលខេត្តព្រៃវែង ។
អំណោយដែររដ្ឋបាលខេត្តបានរៀបចំជូនដល់ក្រុមទូកទាំងអស់មានដូចជា ៖ សម្រាប់ទូកខ្នាតអន្តរជាតិ ក្នុងមួយទូកទទួលបានថវិការចំនួន២០ម៉ឺនរៀល អង្ករ៤បាវ ស្មើរ១០០គីឡូ ទឹកសុទ្ធចំនួន២០យួរ មីចំនួន១កេសធំ អាវ និងមួកចំនួន៣០ ។ ឬឯទូកងខ្នាតវែង ក្នុងមួយទូកទទួលបានថវិការចំនួន៣០ម៉ឺនរៀល អង្ករ៨បាវ ស្មើរ២០០គីឡូ ទឹកសុទ្ធចំនួន៤០យួរ មីចំនួន២កេសធំ អាវ និងមួកចំនួន៨៥ ៕
ចែករំលែកព័តមាននេះ