ខេត្តតាកែវ ៖ ពលរដ្ឋក្រុងដូនកែវ ខេត្តតាកែវ លើកឡើងថា ក្រុងដូនកែវសឹងទាំងមូលមានគ្របទៅដោយផ្សែងដុតសំរាមទាំងយប់ទាំងថ្ងៃពិបាករស់នៅរាប់ខែរាប់ឆ្នាំមកហើយ។
ដោយអត់ទ្រាំ និងការហិតក្លិន ហិតផ្សែងចេញពីទីតាំងចោលសំរាមមួយកន្លែង ដែលកំពុងបង្កផលប៉ះពាល់រាប់ឆ្នាំមកហើយនោះលែងបានពេលនេះប្រជាពលរដ្ឋ តាអាចារ្យ ព្រះសង្ឃ និងមេភូមិ នាំគ្នាផ្តិតមេដៃស្នើទៅលោកអភិបាលខេត្តតាកែវឲ្យជួយរកដំណោះស្រាយ។
ប្រភពពីប្រជាពលរដ្ឋលើកឡើងថា ទីតាំងចោលសំរាមនេះ គឺនៅក្បែរវត្ត អមរា ស្ថិតនៅភូមិស្នោរ សង្កាត់រកាក្រៅ ក្រុងដូនកែវ ខេត្តតាកែវ ត្រូវបានគេយកកាកសំណល់ផ្សេងៗពីមន្ទីរពេទ្យ អាហារដ្ឋាន និងយកពីទីតាំងដទៃទៀត ក្នុងក្រុងដូនកែវមកចោលទីនេះ។
ពួកគាត់បន្តថា ក្លិនស្អុយ ឆ្អេះឆ្អាប សាយភាយពីទីតាំងចោលសំរាមនេះ រាល់ថ្ងៃរាប់ឆ្នាំមកហើយ លុះដល់ពេលយប់មានអ្នកទៅលួចដុតសំរាមចោលឆេះហុយផ្សែងទ្រលោមពេញមេឃទុកឲ្យពលរដ្ឋហិតផ្សែងស្អុយសំរាមរាប់ឆ្នាំមកហើយ។
ប្រជាពលរដ្ឋដែលកំពុងប្រឈមផលប៉ះពាល់នៃទីតាំងចោលសំរាមខាងលើ បានធ្វើការស្នើសុំទៅមន្ត្រីជំនាញពាក់ព័ន្ធ និងលោកអភិបាលខេត្តតាកែវ ជួយដោះស្រាយបញ្ហានេះផង កុំទុកឲ្យពួកគាត់រាប់រយគ្រួសារហិតក្លិនស្អុយ និងផ្សែង ពិសេសកុំឲ្យក្រុងដូនកែវ គ្របដណ្តប់ទៅដោយផ្សែងដុតសំរាមដូចរាល់ថ្ងៃនេះទៀត៕
ចែករំលែកព័តមាននេះ