អត្ថប្រយោជន៍ដែលស្មានមិនដល់របស់ដំឡូងពណ៌ស្វាយ
ការស្រាវជ្រាវថ្មីមួយបានបង្ហាញថា
ការស្រាវជ្រាវថ្មីមួយបានបង្ហាញថា ការទទួលទានដំឡូងពណ៌ស្វាយអាចបន្ថយហានិភ័យនៃការវិវឍ្ឍទៅជាជំងឺមហារីកពោះវៀនធំ ។
សត្វជ្រូកដែលត្រូវបានគេឲ្យស៊ីបន្លែនេះបង្ហាញថាកម្រិតនៃប្រូតេអ៊ីនបង្កការបំផ្លាញមួយប្រភេទដែលជំរុញឱ្យមានដុំមហារីក និងជំងឺរលាកពោះវៀនដទៃទៀតត្រូវបានកាត់បន្ថយចំនួន៦ដង ។
ក្រុមអ្នកស្រាវជ្រាវនិយាយថាផ្លែឈើ និងបន្លែចម្រុះពណ៌ដូចជាប្រូខូលី និងផ្លែទំពាំងបាយជូរក្រហមអាចនាំមកនូវផលប្រយោជន៍ដូចគ្នា ។
ការរកឃើញនេះបន្ថែមទៅលើការស្រាវជ្រាវដែលបង្ហាញថារបបអាហារឥន្ទធនូមានសារធាតុគីមីជាច្រើនប្រឆាំងនឹងការរលាកដែលអាចបង្ការជំងឺរ៉ាំរ៉ៃ ។
ក្រុមអ្នកស្រាវជ្រាវពីសាកលវិទ្យាល័យរដ្ឋ Pennsylvania និយាយថាការយល់ដឹងពីសមាសធាតុអាហារទាំងនេះមានប្រតិកម្មកម្រិតម៉ូឡេគុលអាចនាំឱ្យមានការបង្កើតថ្នាំថ្មីសម្រាប់ជំងឺមហារីក និងជំងឺធ្ងន់ដទៃទៀត ។
អ្នកវិទ្យាសាស្ត្រឯកទេសចំណីអាហារលោកសាស្ត្រាចារ្យ Jairam Vanamala ពន្យល់ថា ៖ «សុភាសិតបុរាណក៏ដូចជាភស្តុតាងក្នុងសម័យទំនើបបង្ហាញថារបបអាហារដែលភាគច្រើនបានមកពីរុក្ខជាតិអាចបង្ការជំងឺ ផ្សេងៗជាច្រើន ដូចជាជំងឺទឹកនោមផ្អែមប្រភេទទី២ ជំងឺបេះដូង និងសូម្បីតែជំងឺមហារីក ។
ការសិក្សានៅលើសត្វជ្រូកដែលមានប្រព័ន្ធរំលាយអាហារស្រដៀងទៅនឹងមនុស្សបានរកឃើញថាដំឡូង ពណ៌ស្វាយអាចទប់ស្កាត់ការរីករាលដាលនៃកោសិកាមហារីកពោះវៀនធំ សូម្បីតែជាផ្នែកមួយនៃរបបអាហារដែលមានកាឡូរីខ្ពស់ ។
ការស្រាវជ្រាវដែលត្រូវបានចេញផ្សាយនៅក្នុង Journal of Nutrition Biochemistry បញ្ជាក់ថា ការស្រាវជ្រាវ ថ្មីៗបានលើកឡើងថាអាហារភាគច្រើនដែលមានប្រភពពីរុក្ខជាតិមានទំនោរធ្វើឲ្យអត្រានៃការកើតជំងឺមហារីកពោះវៀនធំទាបជាងអ្នកដែលចូលចិត្តបរិភោគសាច់ច្រើន ។
ជំងឺមហារីកពោះវៀនធំគឺជាមូលហេតុនៃការស្លាប់ទី២ទាក់ទងនឹងជំងឺមហារីកនៅក្នុងសហរដ្ឋអាមេរិក និងជាឃាតករនាំមុខគេនៅក្នុងប្រទេសលោកខាងលិចដទៃទៀតដែលក្នុងប្រទេសទាំងនោះប្រជាជនភាគច្រើនបរិភោគសាច់ច្រើន និងផ្លែឈើ និងបន្លែតិចតួច ៕
ចែករំលែកព័តមាននេះ