អត្តពលិករត់ភ្លើងគប់ស៊ីហ្គេម បង្ហាញក្តីរំភើបរហូតដល់ស្រក់ទឹកភ្នែកដោយមិនដឹងខ្លួន
- សៀមរាប
ខេត្តសៀមរាប ៖ អត្តពលិកកម្ពុជាដែលចូលរួមកាន់ភ្លើងគប់ នៅខេត្តសៀមរាប នាថ្ងៃទី២១ ខែមីនា
ខេត្តសៀមរាប ៖ អត្តពលិកកម្ពុជាដែលចូលរួមកាន់ភ្លើងគប់ នៅខេត្តសៀមរាប នាថ្ងៃទី២១ ខែមីនា ឆ្នាំ២០២៣ បានបង្ហាញក្តីរំភើបចិត្តជាខ្លាំង រហូតដល់ស្រក់ទឹកភ្នែកមិនដឹងខ្លួន ក្រោយពីទទួលបានការប្រោសព្រះរាជទាន«ព្រះអគ្គិជ័យកីឡា» ពីព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដើម្បីជាកិច្ចរត់ភ្លើងគប់ ឆ្ពោះទៅកាន់បណ្ដាប្រទេសជាសមាជិកទាំងអស់ នៅក្នុងតំបន់អាស៊ីអាគ្នេយ៍ មុនព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។
កីឡាករតេក្វាន់ដូ WT វ៉ា មិថុនា បានលើកឡើងថា ការរត់ភ្លើងគប់បែបនេះ គឺជាកិត្តិយសដ៏ខ្ពង់ខ្ពស់បំផុត ដែលក្នុង១ជីវិត អាចមានតែម្តងប៉ុណ្ណោះ។ លោកមានសេចក្តីរីករាយ និងមានកិត្តិយសខ្លាំងណាស់ ដែលទទួលការប្រោសព្រះរាជទានព្រះអគ្គិជ័យកីឡា ពីអង្គព្រះមហាក្សត្រ។
ជាមួយនឹងអារម្មណ៍ដ៏រំភើបរីករាយឥតឧបមាបែបនេះ អត្តពលិកតេក្វាន់ដូ WT រូបនេះ ក៏បានបង្ហាញការប្តេជ្ញាខ្ពស់បន្ថែមថា នឹងបន្តការហ្វឹកហាត់ឱ្យខ្លាំងក្លា ដើម្បីត្រៀមប្រកួតប្រជែងមេដាយជូនជាតិក្នុងព្រឹត្តិការណ៍កីឡាស៊ីហ្គេមលើកទី៣២ នាខែឧសភា ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។ លោកបានដាក់គោលដៅដណ្តើមឱ្យបានមេដាយមាស ជាថ្មីម្តងទៀត ក្នុងស៊ីហ្គេម នៅកម្ពុជា ដើម្បីថែរក្សាការពារមេដាយមាស ក្នុងនាមជាកីឡាករម្ចាស់ផ្ទះ។
បន្ថែមពីលើនេះ អត្តពលិកម្ចាស់មេដាយមាសស៊ីហ្គេមរូបនេះបានសំណូមពរដល់ប្រជាពលរដ្ឋ យុវជនចូលរួមគាំទ្រ និងអបអរសាទរពិធីរត់ភ្លើងគប់នៅកម្ពុជា ក៏ដូចជាការរត់ភ្លើងគប់នៅគ្រប់ប្រទេសនៃតំបន់អាស៊ីអាគ្នេយ៍ឱ្យបានផុសផុល ហើយចូលរួមគាំទ្រការប្រកួតកីឡាស៊ីហ្គេម និងការប្រកួតកីឡាអាស៊ានប៉ារ៉ាហ្គេម នាខែឧសភា និងខែមិថុនា ឆ្នាំ២០២៣ ឱ្យបានច្រើនកុះករ។
កីឡាករជម្រើសជាតិតេក្វាន់ដូ វ៉ា មិថុនា ដែលបានឈ្នះមេដាយមាស សម្រាប់ការប្រកួត
ស៊ីហ្គេម លើកទី៣១ ឆ្នាំ២០២២ នៅប្រទេសវៀតណាមលើទម្ងន់ក្រោម៧៤គីឡូក្រាមនោះ
បានបញ្ជាក់ថា៖ «ប្រជាពលរដ្ឋ គឺជាកម្លាំងចិត្ត ដែលជំរុញលើកទឹកចិត្តដល់កីឡាករ កីឡាការិនីកម្ពុជា ឱ្យកាន់តែមានស្មារតី ទឹកចិត្ត ដើម្បីដណ្តើមមេដាយ ។ ក្នុងនាមខ្ញុំជាកីឡាករជម្រើស
ជាតិកម្ពុជា ខ្ញុំប្តេជ្ញាថា នឹងខិតខំដណ្តើមមេដាយជូនជាតិមាតុភូមិឱ្យទាល់តែបាន»។
ដោយឡែក ចំពោះកីឡាការិនីពិការ វ៉ិត ចន្ថា ម្ចាស់មេដាយមាសអាស៊ានប៉ារ៉ាហ្គេម លើកទី១១ នៅប្រទេសឥណ្ឌូណេស៊ី ដែលទទួលបានកិត្តិយសរត់ដង្ហែភ្លើងគប់ជាមួយកីឡាករ វ៉ា មិថុនា នោះ បានបង្ហាញក្តីរំភើបរកពាក្យអ្វីប្រៀបផ្ទឹមពុំបាននោះទេ ។ នាងមិននឹកស្មានថា ខ្លួនជាកីឡាការិនីពិការ អាចឈានដល់ចំណុចនេះនោះទេ ។ នាងរំភើបខ្លាំងរហូតដល់ស្រក់ទឹកភ្នែកមិនដឹងខ្លួន ។ នេះជាកិត្តិយសដ៏ធំធេងសម្រាប់ប្រទេសជាតិរបស់យើង ក៏ដូចជាខ្លួនឯងផ្ទាល់។ កាលពីពេលមុន នាងមិនធ្លាប់គិតទេថា ខ្លួនទទួលបានកិត្តិយសបែបនេះទេ ។ នាងធ្លាប់ជាក្មេងស្នាក់នៅជាមួយគេ ធ្លាប់លាងចាន បោកខោអាវ បម្រើនៅផ្ទះគេ ។ ម្យ៉ាងទៀតជាក្មេងមានពិការភាព មិនធ្លាប់ស្រមៃថា នឹងបានក្លាយខ្លួនទទួលបានកិត្តិយសបែបនេះទេ។
កីឡាការិនីរត់ចម្ងាយ វ៉ិត ចន្ថា បានបន្ថែមថា៖«ជាមួយគ្នានេះ ខ្ញុំក៏ធ្លាប់គិតដែរថា កើតមកជាមនុស្សពិការជើង មិនមែនជាបញ្ហាធំទេ ត្រូវតែតស៊ូក្រាញននៀលនឹងជីវិត កុំឱ្យគេថា ខ្លួនពិការហើយ ធ្វើអ្វីមិនកើត ។ ដូច្នេះនាងខ្ញុំប្តេជ្ញាចិត្តថា ខិតខំតស៊ូប្រឹងប្រែងនឹងជីវិត បើទោះបីជាត្រូវជួបនឹងការលំបាកបែបណាក៏ដោយ ក៏ត្រូវតែតស៊ូពុះពារទៅមុខជានិច្ច ។ ជាក់ស្តែងពេលបានចូលប្រឡូកក្នុងវិស័យកីឡា គឺនាងខ្ញុំជោគជ័យ»។
គួរបញ្ជាក់ថា កីឡាការិនីអត្តពលកម្មជនពិការ វ៉ិត ចន្ថា ជាម្ចាស់មេដាយមាសលើវិញ្ញាសារត់ចម្ងាយ ៤០០ម៉ែត្រ នៃព្រឹត្តិការណ៍អាស៊ានប៉ារ៉ាហ្គេម លើកទី១១ នាទីក្រុងសូឡូ ប្រទេសឥណ្ឌូនេស៊ី កាលពីថ្ងៃទី៣ ខែសីហា ឆ្នាំ២០២២ ៕
ចែករំលែកព័តមាននេះ