បញ្ជារបស់លោកស្នងការខេត្តព្រៃវែង ដាច់ខាតត្រូវតែបញ្ជូនក្មេងទំនើងដែលបង្កហិ.ង្សាទៅតុលាការ ឈប់អប់រំហើយ
ខេត្តព្រៃវែង ៖ លោកឧត្តមសេនីយន៍ទោ ឈឿន ប៊ុនឆន ស្នងការ នៃស្នងការដ្ឋាននគរបាលខេត្តព្រៃវែង នៅយប់ថ្ងៃទី ២១ ខែ…
ខេត្តព្រៃវែង ៖ លោកឧត្តមសេនីយន៍ទោ ឈឿន ប៊ុនឆន ស្នងការ នៃស្នងការដ្ឋាននគរបាលខេត្តព្រៃវែង នៅយប់ថ្ងៃទី ២១ ខែ មីនា ឆ្នាំ ២០២៣ បានដាក់បទបញ្ជាឲ្យគ្រប់អធិការដ្ឋានក្រុង-ស្រុក និងគ្រប់ប៉ុស្តិ៍រដ្ឋបាលទាំងអស់ នៅពេលឃាត់ខ្លួនក្មេងទំនើងបង្កហិង្សាបាន គឺមិនត្រូវប្រើវិធានការអប់រំណែនាំទៀតនោះទេ ដាច់ខាតត្រូវកសាងសំណុំរឿងបញ្ជូនទៅតុលាការតាមនីតិវិធី ដោយអនុវត្តចាប់ពីថ្ងៃនេះតទៅ ។
ជាមួយគ្នានេះ លោកស្នងការនគរបាលខេត្តព្រៃវែង ក៏បានណែនាំដល់គ្រប់អធិការដ្ឋានក្រុង-ស្រុក និងគ្រប់ប៉ុស្តិ៍រដ្ឋបាលនគរបាល ត្រូវប្រកាសព័ត៌មាននេះ ដល់គ្រប់ច្រកល្ហកទូទាំងខេត្តព្រៃវែង ដើម្បីឲ្យយុវជនទាំងអស់បានភ្ញាក់ដឹងខ្លួន និងខិតខំប្រឹងប្រែងរៀនសូត្រឡើងវិញ ហើយបញ្ឈប់កុំឲ្យមានអំពើហិង្សា ការប្រើប្រាស់គ្រឿងញៀន ឬប្រព្រឹត្តិអំពើល្មើសច្បាប់ផ្សេងៗ ជាបន្តទៅទៀត ។
កន្លងមក មន្ត្រីនគរបាលក្រុងព្រៃវែង ធ្លាប់បានអប់រំ ជាច្រើនករណីរួចមកហើយ ជាក់ស្ដែងកាលពីថ្ងៃទី១៦ ខែមីនានេះ ក្មេងទំនើង ៣នាក់ ដែលគប់កញ្ចក់រថយន្ត ត្រូវបានអប់រំ និងដោះលែងឱ្យត្រឡប់ទៅផ្ទះវិញ ក្រោមលក្ខខណ្ឌចំនួន២ ។
ហើយការសម្រេចប្រើប្រាស់វិធានការអប់រំនេះ គឺយោងទៅលើទិដ្ឋភាពចំនួន៣ រួមមាន ៖
ទី១- ការឯកភាពពីឯកឧត្តមព្រះរាជអាជ្ញា, ឯកឧត្តមអភិបាលខេត្ត និងឯកឧត្តមប្រធានក្រុមប្រឹក្សាខេត្ត ។
ទី២- មានការស្រុះស្រួលគ្នារវាងភាគីរងគ្រោះ និងភាគីបង្ក ដោយយល់ព្រមទទួលសំណងដើម្បីបញ្ចប់រឿង ។
ទី៣- ដោយយល់ឃើញថា យុវជនបង្កទាំង៣នាក់ មិនធ្លាប់មានប្រវត្តិប្រព្រឹត្តិបទល្មើស ហើយជាយុវជនដែលកំពុងពេញវ័យសិក្សារៀនសូត្រ និងទទួលយកបទពិសោធថ្មីៗ នៅក្នុងជីវិត ពិសេស គ្រួសាររបស់ពួកគេមានជីវភាពទីទាល់ក្រ ត្រូវការកម្លាំងពលកម្ម ដើម្បីជួយដល់ក្រុមគ្រួសារ ។
ដោយឡែក កាលពីថ្ងៃទី២១ ខែមីនា ឆ្នាំ២០២៣នេះ លោកវរសេនីយ៍ឯក នុត ប៊ុនឌឿន អធិការ នគរបាលក្រុងព្រៃវែង បានធ្វើការអប់រំ ដល់ក្មេងទំនើងចំនួន ១០នាក់ ដែលមានជម្លោះជិះម៉ូតូដេញជេរគ្នា បង្កភាពអាណាធិបតេយ្យ ធ្វើឲ្យមានការភ្ញាក់ផ្អើលដល់ប្រជាពលរដ្ឋ ។
បច្ចុប្បន្ន ក្មេងទំនើងទាំង ១០នាក់ ត្រូវបានធ្វើកិច្ចសន្យាអប់រំ និងបានអញ្ជើញអាណាព្យាបាល ដើម្បីមកធានាយកទៅអប់រំបន្ត ៕
ចែករំលែកព័តមាននេះ