ខេត្តសៀមរាប៖ នៅព្រឹកថ្ងៃទី២១ ខែមីនា ឆ្នាំ២០២៣នេះ មានភ្ញៀវទេសចរជាតិ និងអន្តរជាតិ ប្រមាណជាជាង ១ម៉ឺននាក់ បានចូលរួមទស្សនាថ្ងៃរះចំកណ្តាលកំពូលប្រាសាទអង្គរវត្ត។ នេះបើតាមការបញ្ជាក់របស់មន្ត្រីក្រសួងទេសចរណ៍។

សូមរម្លឹកថា នៅព្រឹកថ្ងៃទី២១មីនានេះ ក៏មានប្រារព្ធព្រះរាជពិធី​សុំ​ភ្លើង «ព្រះអគ្គិជ័យ​កីឡា» នៅមុខប្រាសាទអង្គរវត្ត សម្រាប់ព្រឹត្តិការណ៍កីឡាស៊ីហ្គេម ផងដែរ​។ ព្រះរាជពិធីនេះ ប្រារព្ធឡើង ក្រោមព្រះរាជាធិបតីព្រះករុណា ព្រះមហាក្សត្រ អមព្រះរាជដំណើរដោយ​ថ្នាក់ដឹកនាំកំពូលៗ រួមមាន៖ សម្តេចតេជោ ហ៊ុន សែន សម្តេចក្រឡាហោម ស ខេង សម្តេច ទៀ បាញ់ និងថ្នាក់ដឹកនាំជាច្រើនទៀត។

ក្រសួងទេសចរណ៍ បានប្រកាស​ថា បាតុភូតព្រះអាទិត្យ រះចំកណ្តាលកំពូលប្រាសាទអង្គរវត្ត (EQUINOX) កើតឡើង ជារៀងរាល់ឆ្នាំ ចំនួន ២លើក គឺ​នៅខែមីនាម្ដង និងខែកញ្ញាម្ដងទៀត។

ព្រឹត្តិការណ៍ដ៏អស្ចារ្យនេះ ស្តែងឱ្យឃើញពីអច្ឆរិយភាពនៃប្រាសាទ​អង្គរវត្ត ដែលបុព្វបុរសខ្មែរបានកសាងឡើង ដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិរវាងផែនដី និងព្រះអាទិត្យយ៉ាងច្បាស់លាស់ គួរស្ញប់ស្ញែងជាទីបំផុត។

ក្រសួងទេសចរណ៍ បានបញ្ជាក់ថា នៅឆ្នាំ២០២៣ បាតុភូតព្រះអាទិត្យរះចំកណ្តាលកំពូល​ប្រាសាទអង្គរវត្ត អាចនឹងកើតឡើង នៅចន្លោះថ្ងៃទី២០ដល់ថ្ងៃទី ២៣ ខែមីនា ចាប់ពីម៉ោង៥៖៣០នាទីព្រឹក ដល់ម៉ោង ៧៖០០នាទីព្រឹក ដែលជារៀង រាល់ឆ្នាំ តែងមានភ្ញៀវទេសចរជាតិ-អន្តរ ជាតិរាប់ម៉ឺននាក់បានចូលរួមទស្សនា និងផ្តិតយករូបភាពព្រឹត្តិការណ៍ដ៏អស្ចារ្យនេះ។

ក្រសួងទេសចរណ៍ បានអំពាវនាវដល់គ្រប់សមាគមទេសចរណ៍ ស្ថាប័នពាក់ព័ន្ធ អ្នកសារព័ត៌មាន ភ្ញៀវទេសចរជាតិ-អន្តរ​ជាតិ និងសាធារណជនទូទៅចូលរួមផ្សព្វផ្សាយ ឲ្យបានទូលំទូលាយ​ដល់ដៃគូពាក់ព័ន្ធ និងទៅទស្សនា ផ្តិតយករូបភាពព្រឹត្តិការណ៍ដ៏អស្ចារ្យនេះ ដែលជាផ្នែកមួយ​នៃយុទ្ធនាការ «ឆ្នាំទស្សនាកម្ពុជា ២០២៣» ក្រោមពាក្យស្លោក «គ្រប់ថ្ងៃ គឺជាអច្ឆរិយភាព»៕ ​ ច័ន្ទ រស្មី