រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី៣០ ខែកញ្ញា បានសម្រេចចេញដីកាឃុំខ្លួនគ្រូអគ្គីនេត្រ ដែលល្បីល្បាញក្នុងសង្គមហ្វេសប៊ុកដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបជួញដូរគ្រឿងញៀនដោយខុសច្បាប់ ។
ជនសង្ស័យខាងលើត្រូវសមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃ ឃាត់ខ្លួននៅចំណុចបណ្តោយផ្លូវ២៧១ ក្រោយវិទ្យាល័យ ជា ស៊ីម សាមគ្គី កាលពីថ្ងៃទី២៧ កញ្ញា ពាក់ពន្ធជួញដូរគ្រឿងញៀនប្រភេទមេតំហ្វេតាមីន (ម៉ាទឹកកក) ទម្ងន់២.៦៨ក្រាម ។ លុះថ្ងៃទី២៩ កញ្ញា សមត្ថកិច្ចបានកសាងសំណុំរឿងបញ្ជូនគ្រូមន្តអាគមន៍រូបនេះទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ ។ រហូតដល់ល្ងាចថ្ងៃទី៣០ កញ្ញា ទើបតំណាងអយ្យការធ្វើការចោទប្រកាន់ជាផ្លូវការ និងចាត់បញ្ជូនទៅចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ។
សូមរំលឹកថា ថ្មីៗនេះយុវជន វ៉ាន់ សុខសីហា ហៅ ហោរ៉ាអាគី្គនេត្រ នេត្រ ភេទប្រុស អាយុ២១ឆ្នាំ និងហៅប្រុសស្អាតប្រចាំភូមិជ្រោងចង្វា បានតាំងខ្លួនធ្វើជាគ្រូអូមអាមចេះមន្តអាគមន៍កាប់មិនមុត ដុតមិនឆេះបង្ហោះតាមសង្គមហ្វេសប៊ុកធ្វើឲ្យមានការភ្ញាក់ផ្អើល Share និង Like តៗគ្នា តាមរយៈអាខោនផ្ទាល់ខ្លួនរបស់យុវជននេះ ថែមទាំងអួតក្អេងក្អាងពីភាពអស្ចារ្យរបស់ខ្លួនធ្វើឲ្យក្រុមអ្នកនិយមលេងហ្វេសប៊ុកខ្លះស្ងប់ស្ងែង ខ្លះមានការរិះគន់នូវទង្វើនោះ ។ ប៉ុន្តែមិនបានប៉ុន្មានផង ស្រាប់តែគេឃើញយុវជនវ័យក្មេងនេះជាប់ខ្នោះដៃពាក់ព័ន្ធករណីជួញដូរគ្រឿងញៀន ហើយបណ្តើរទៅកាន់សាលាដំបូងរាជធានីភ្នំពេញ រហូតដល់ចៅក្រមសម្រេចចេញដីការឃុំខ្លួនដាក់ពន្ធនាគារ ជាងនេះទៀតគេពិនិត្យឃើញគូរកនគ្រូអាគ្គីនេត្រម្នាក់ដែលនៅជឿស្លុងបានតាមទៅថតរូបគ្រូអគ្គីនេត្រដល់សាលាដំបូងយកទៅបង្ហោះលើបណ្តាញសង្គមហ្វេសប៊ុក ៕
ចែករំលែកព័តមាននេះ