រថយន្តបុកស្លាកសញ្ញាចរាចរណ៍ហើយរារាំងមិនឲ្យសមត្ថកិច្ចស្ទួចទៀត
រាជធានីភ្នំពេញ ៖ រថយន្តរបស់អគ្គបញ្ជាការកងទ័ពមួយគ្រឿងបើកបុកបង្គាល
រាជធានីភ្នំពេញ ៖ រថយន្តរបស់អគ្គបញ្ជាការកងទ័ពមួយគ្រឿងបើកបុកបង្គាលស្លាកសញ្ញាចរាចរណ៍បាក់អស់២ដើមហើយម្ចាស់រថយន្តរារាំងមិនឲ្យសមត្ថកិច្ចស្ទួចយកទៅដោះស្រាយទេ បង្កឲ្យមានការភ្ញាក់ផ្អើលកាលពីវេលាម៉ោង៩នឹង២០នាទីយប់ថ្ងៃទី៣០ ខែកញ្ញា ឆ្នាំ២០១៧ នៅចំណុចមុខហាងលក់ចាប់ហួយ តែតិចឡុង តាមផ្លូវ១៩៩កែងផ្លូវ៣៣៨ ស្ថិតនៅភូមិ៤ សង្កាត់ទួលស្វាយព្រៃទី២ ខណ្ឌចំការមន ។
ប្រភពព័ត៌មានពីអាជ្ញាធរមូលដ្ឋានបានប្រាប់ថា កម្លាំងសមត្ថកិច្ចល្បាតក្នុងភូមិសាស្ត្រប្រទះឃើញរថយន្ត ពណ៌ត្រេអ៊ី ពាក់ស្លាកលេខ ខេមរភូមិ 02 2.5870 ចតនៅកណ្ដាលផ្លូវក៏ឈប់មើលបានឃើញស្លាកសញ្ញាហាមចត និងស្លាកបង្ហាញផ្លូវបំបែកជាបួនបាក់ដល់ដីតែមិនបានឃើញម្ចាស់រថយន្តបើកបង្កហេតុទេ ឃើញតែរថយន្តដាច់កាឡេកង់មុខខាងស្ដាំបើកទៅមុខលែងរួច ។
បើតាមប្រជាពលរដ្ឋដែលឃើញហេតុការណ៍បានឲ្យដឹងថា រថយន្តបង្កក្រោយកើតហេតុឃើញអ្នកបើករថយន្តជាបុរសម្នាក់អាយុជាង៤០ឆ្នាំបានចុះពីលើរថយន្តឡើងជិះម៉ូតូឌុបគេចខ្លួនបាត់បន្សល់ទុករថយន្តដាច់កង់នៅកន្លែងកើតហេតុ ។
នគរបាលផ្នែកជំនាញវាស់វែងខណ្ឌចំការមនបានឲ្យដឹងថា រថយន្តបង្កជារបស់អង្គភាពអគ្គបញ្ជាការកងទ័ពបង្កហេតុបុកបង្គាលផ្លាកសញ្ញាចំនួន២បណ្ដាលបាក់ដួលដល់ដីធ្វើឲ្យរថយន្តដាច់កាឡេកង់មុខខាងស្តាំបើកទៅមុខលែងរួច ។ ក្រោយកើតហេតុការិយាល័យនគរបាលផ្នែកវាស់វែងបានមក
ស្ទួចរថយន្តយកទៅរក្សាទុក ស្រាប់តែមានបុរសម្នាក់មករារាំងមិនឱ្យសមត្ថកិច្ចយករថយន្តបង្កទៅទេ ដោយអះអាងថាជាម្ចាស់រថយន្តតែគាត់មិនមែនជាអ្នកបើកបរទេគឺកូនចៅរបស់គាត់ជាអ្នកបើកបរ ហើយកូនចៅរបស់គាត់បានប្រាប់ថា រថយន្តគាត់មិនបានបុកស្លាកសញ្ញាចរាចរណ៍ទេ កូនចៅគាត់បើករថយន្តមកដល់កន្លែងកើតហេតុស្រាប់តែរថយន្តបើកសុខៗដាច់ក្រឡេកង់មុខតែម្តង ។ ទោះបីជាមានការរារាំងពីបុរសម្នាក់ដែលអះអាងថាជាម្ចាស់រថយន្តមិនព្រមឲ្យសមត្ថកិច្ចស្ទួចយករថយន្តបង្កទៅរក្សាទុកទើបសមត្ថកិច្ចបានសុំកម្លាំងអន្តរាគមន៍ខណ្ឌឃាត់បុរសជាម្ចាស់រថយន្តចេញពីមុខរថយន្តស្ទួច ហើយស្ទួចរថយន្តបង្កយកទៅការិយាល័យនគរបាលចរាចរណ៍ផ្លូវគោកដើម្បីធ្វើការដោះស្រាយ ៕
ចែករំលែកព័តមាននេះ