រថយន្ត LEXUS RX-300 បុកម៉ូតូកង់បី រុញចូលផ្ទះមួយកន្លែង តែបានដើមពុទ្ទ្រាជួយទប់
រាជធានីភ្នំពេញ ៖ រថយន្ត LEXUS RX-300 មួយគ្រឿង បើកបរក្នុងល្បឿន ជ្រុលទៅបុកពីក្រោយម៉ូតូកង់បី ហើយរុញចូលផ្ទះមួយកន្លែង ប៉ុន្តែសំណាងល្អ…
រាជធានីភ្នំពេញ ៖ រថយន្ត LEXUS RX-300 មួយគ្រឿង បើកបរក្នុងល្បឿន ជ្រុលទៅបុកពីក្រោយម៉ូតូកង់បី ហើយរុញចូលផ្ទះមួយកន្លែង ប៉ុន្តែសំណាងល្អ បានដើមពុទ្ទ្រា ១ដើម ជួយទប់ម៉ូតូកង់បីនោះជាប់ កុំអីបុកចូលដល់ក្នុងផ្ទះ បង្កឲ្យម្ចាស់ផ្ទះរងរបួស ឬស្លា.ប់មិនខានឡើយ ខណៈនោះម៉ូតូកង់បី រងកាខូចខាតយ៉ាងដំណំ ហើយអ្នកបើកបររងរបួសស្រាល បន្ទាប់មករថយន្តបង្ក បានបន្ថែមល្បឿនបើកគេចបាត់ ដោយពុំដឹងថា អ្នកបើកបរនោះ ងងុយដេក ឬស្រវឹងស្រានោះឡើយ ។
គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង១១និង៤៥នាទីថ្ងៃត្រង់ ថ្ងៃទី០៨ ខែឧសភា ឆ្នាំ២០២៤ ស្ថិតតាមបណ្តោយជាតិលេខ៣ ក្នុងភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
អ្នកភូមិខាងលើ បាននិយាយថា នៅមុនពេលកើតហេតុ ពួកគាត់បានឃើញបុរសម្នាក់ បើកបរម៉ូតូកង់បី១គ្រឿង ពណ៍ស ពាក់ស្លាកលេខ ភ្នំពេញ 1JR-5374 ធ្វើដំណើរតាមបណ្តោយផ្លូវជាតិលេ៣ ក្នុងទិសដៅពីត្បូងទៅជើង។ ដោយខណៈនោះ គាត់បើកមិនសូវលឿនប៉ុន្មាននោះទេ ហើយពេលមកដល់ត្រង់ចំណុចកើតហេតុ ក៏ស្រាប់តែមានរថយន្ត ១គ្រឿង ម៉ាក LEXUS RX-300 ពណ៍ទឹកប្រាក់ បើកបរក្នុងល្បឿនលឿន ដូចហោះ ក្នុងទិសដៅស្របគ្នា ទៅដល់បុកពីក្រោយពេញទំហឹងតែម្ដង បណ្ដាលឲ្យម៉ូតូកង់បីជ្រុលសំដៅបុកចូលផ្ទះមួយកន្លែងនៅជិតនោះ ប៉ុន្តែដោយសារតែនៅមុខផ្ទះខាងលើ មានដើមពុទ្ទ្រា ១ដើម ទើបម៉ូតូកង់បីបុកដើមពុទ្ទ្រានោះ ពុំជ្រុលចូលដល់ក្នុងផ្ទះ ដែលមានមនុស្សច្រើននាក់ កំពុងនៅទីនោះទេ បន្ទាប់មករថយន្តបង្ក បានបើកគេចទៅបាត់ស្រមោល ។
បុរសអ្នកបើកបរម៉ូតូកង់បីរងរបួសស្រាល គាត់បាននិយាយថា នៅមុនពេលកើតហេតុ រូបគាត់បានបើកម៉ូតូកង់១គ្រឿងខាងលើធ្វើដំណើរតាមបណ្តោយផ្លូវជាតិ លេខ៣ ក្នុងទិសដៅពីត្បូងទៅជើង។ ស្រាប់តែមានរថយន្ត១គ្រឿង បុកម៉ូតូកង់បីគាត់ពីក្រោយ ប៉ុន្តែខណៈនោះ គាត់ពុំដឹងថា ជារថយន្តម៉ាកអ្វីឡើយ ព្រោះមិនបានឃើញ។ ម្យ៉ាងរវល់តែភ័យ ពេលត្រូវរថយន្តបុករុញផ្ទប់ដើមពុទ្ទ្រាបែបនេះ ប៉ុន្តែក្រោយពេលកើតហេតុ អ្នកភូមិខាងលើបានប្រាប់គាត់ថា រថយន្តដែលបុកគាត់ម៉ូតូកង់បីគាត់ពីក្រោយនោះ គឺម៉ាកLEXUS RX-300 ។
ក្រោយពេលឧប្បត្តិហេតុនេះកើតឡើង កម្លាំងនគរបាលប៉ុស្តិ៍ចោមចៅទី២ ខណ្ឌពោធិ៍សែនជ័យ បានចុះទៅពិនិត្យមើលភ្លាមៗ ហើយដោយឃើញថា ពុំមានបង្កឲ្យគ្រោះថ្នាក់ដល់មនុស្សណាម្នាក់ ឬខូចខាតផ្ទះសម្បែងអ្នកភូមិនោះ ទើបនគរបាលសម្រេចឲ្យម្ចាស់នាំយកម៉ូតូកង់បី ទៅធ្វើការជួសជុលឡើងវិញ ដោយខ្លួនឯង ៕
ចែករំលែកព័តមាននេះ