ក្រុមប្រឹក្សាធម្មនុញ្ញ និងសមិទ្ធផល២៤ឆ្នាំនៃការអនុវត្តរដ្ឋធម្មនុញ្ញ
រាជធានីភ្នំពេញ៖ ក្រុមប្រឹក្សាធម្មនុញ្ញនៅព្រឹកថ្ងៃទី២៧ ខែកញ្ញា បានប្រារព្ធសន្និសីទស្តីពី
រាជធានីភ្នំពេញ៖ ក្រុមប្រឹក្សាធម្មនុញ្ញនៅព្រឹកថ្ងៃទី២៧ ខែកញ្ញា បានប្រារព្ធសន្និសីទស្តីពីសមិទ្ធផល២៤ឆ្នាំនៃការអនុវត្តរដ្ឋធម្មនុញ្ញនៃព្រះរាជាណាចក្រកម្ពុជា។ លោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញបានមានប្រសាសន៍ថា ការប្រារព្ធសន្និសីទនេះ ក្នុងស្មារតីដើម្បីរំលឹកខួបលើទី២៤ នៃការអនុវត្តរដ្ឋធម្មនុញ្ញក្នុងគោលបំណងដើម្បីបង្ហាញឱ្យឃើញនូវគោលគំនិតធំចំនួនពីរ គឺទី១-លទ្ធផលនៃការកសាង និងអនុវត្តប្រព័ន្ធច្បាប់ និងបទដ្ឋានគតិយុត្តដែលបានធានាបរិស្ថាន អំណោយផលសម្រាប់ការអនុវត្តយុទ្ធសាស្ត្រអភិវឌ្ឍន៍ប្រទេសជាតិ និងទី២-លទ្ធលផលចម្បងៗក្នុងការអភិវឌ្ឍន៍ប្រទេសរបស់ស្ថាប័នជាតិនានាក្នុងរយៈពេល២៥ឆ្នាំកន្លងទៅ។
លោកបន្តថា ចាប់ពីឆ្នាំ១៩៩៣ មកដល់ឆ្នាំ២០១៧ រាជរដ្ឋាភិបាល រដ្ឋសភា និងព្រឹទ្ធសភា បានកសាងមូលដ្ឋានគតិយុត្តប្រមាណ៤៧០ ដែលក្នុងនោះមានច្បាប់ជាតិបានចំនួន ២៨១ និងផ្តល់សច្ចាប័នលើលិខិតតូបករណ៍ និងកិច្ចព្រមព្រៀងអន្តរជាតិប្រមាណ១៨៩។ លោកប្រធានក្រុមប្រឹក្សារដ្ឋធម្មនុញ្ញក៏បានឱ្យដឹងថា ក្នុងដែនសមត្ថកិច្ចក្រុមប្រឹក្សារដ្ឋធម្មនុញ្ញបានធានាការគោរពរដ្ឋធម្មនុញ្ញបកស្រាយរដ្ឋធម្មនុញ្ញក្នុងច្បាប់ដែលស្ថាប័ននីតិប្បញ្ញត្តិបានពិនិត្យអនុម័តចប់សព្វគ្រប់ ហើយនិងសមត្ថកិច្ចពិនិត្យ និងសម្រេចអំពីវិវាទកម្មទាក់ទងនឹងការបោះឆ្នោតជ្រើសតាំងតំណាងរាស្ត្រ និងបោះឆ្នោតជ្រើសតាំងសមាជិកព្រឹទ្ធសភាក្រុមប្រឹក្សារដ្ឋធម្មនុញ្ញបានបំពេញភារកិច្ចរបស់ខ្លួនចាប់តាំងពីឆ្នាំ១៩៩៨ ជាឆ្នាំបង្កើតរដ្ឋធម្មនុញ្ញដោយសម្រេចបានសមិទ្ធផលជាច្រើន រួមមាន ៖ ថ្វាយមតិព្រះមហាក្សត្រ១២ករណី, បកស្រាយរដ្ឋធម្មនុញ្ញ១១ករណី, បកស្រាយច្បាប់១០ករណី, ពិនិត្យធម្មនុញ្ញភាពនៃច្បាប់៨១ករណី និងដោះស្រាយបណ្តឹងនៃកាតបោះឆ្នោត១០៤ករណី។
លោក អ៊ឹម ឈុនលឹម បានលើកឡើងទៀតថា ការគ្រប់គ្រងករណីសើរើ និងវិសោធនកម្មរដ្ឋធម្មនុញ្ញចំនួន៧លើកដែលត្រូវបានធ្វើ ដោយមានសំណូមពរចាំបាច់សម្រាប់ដំណើរការជាប្រក្រតីនៃស្ថាប័នជាតិ គឺសុទ្ធតែធានាបាននូវការគោរពគោលការណ៍គ្រឹះទាំងឡាយដែលមានចែងក្នុងរដ្ឋធម្មនុញ្ញ ជាពិសេសលក្ខខណ្ឌដែលមិនអាចកែប្រែបាន រួមមានប្រព័ន្ធប្រជាធិបតេយ្យ សេរីពហុបក្ស របបរាជានិយមអាស្រ័យរដ្ឋធម្មនុញ្ញ និងសើរើ ឬវិសោធនកម្មរដ្ឋធម្មនុញ្ញនៅពេលប្រទេសជាតិស្ថិតក្នុងភាពអាសន្ន ៕
ចែករំលែកព័តមាននេះ