បុរស២នាក់កំពុងតែដើរតាមផ្លូវសុខៗ ស្រាប់តែមនុស្សមួយក្រុមមកឆ្មក់អស់រាប់ពាន់ដុល្លារ
- ភ្នំពេញ
បុរសជាជនជាតិចិនចំនួន២នាក់ បានដើរថ្មើរជើងតាមដងផ្លូវ ហើយក៏ត្រូវបានជនសង្ស័យមួយក្រុម ជិះម៉ូតូធ្វើសកម្មភាព
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាជនជាតិចិនចំនួន២នាក់ បានដើរថ្មើរជើងតាមដងផ្លូវ ហើយក៏ត្រូវបានជនសង្ស័យមួយក្រុម ជិះម៉ូតូធ្វើសកម្មភាពឆក់យកកាបូបស្ពាយបានសម្រេច រួចជិះរត់គេចខ្លួនបាត់ស្រមោលដោយសុវត្ថិភាព បង្កឱ្យមានការភ្ញាក់ផ្អើលកាលពីវេលាម៉ោង១១និង២០នាទីយប់ ថ្ងៃទី១៥ ខែមីនា ឆ្នាំ២០២៣ នៅត្រង់ចំណុចត្រង់ចំណុចជាប់របងវាលព្រះមេរុហ៍ តាមបណ្ដោយផ្លូវ១៧៨ ស្ថិតក្នុងសង្កាត់ជ័យជម្នះ ខណ្ឌដូនពេញ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេបានឃើញបុរសជាជនជាតិចិនចំនួន២នាក់បានធ្វើដំណើរថ្មើរជើង តាមបណ្ដោយផ្លូវ១៧៨ ទិសដៅពីលិចទៅកើត។ លុះពេលមកដល់ចំណុចកើតហេតុ ក៏ស្រាប់តែលេចមុខជនសង្ស័យមួយក្រុម ជិះម៉ូតូចំនួន៤គ្រឿង ដោយមួយគ្រឿងម៉ាកស្កុបភី ពណ៌ស មិនចាំស្លាកលេខ និង៣ម៉ូតូទៀតមិនចាំម៉ាក ។
ប្រភពដដែលបន្តថា ហើយក្រុមជនសង្ស័យទាំងនោះ បានជិះម៉ូតូតាមពីក្រោយបុរសជនជាតិចិនទាំង២នាក់នោះ បន្ទាប់មកជនសង្ស័យដែលជិះម៉ូតូស្កុបភីនោះ ក៏បានធ្វើសកម្មភាពឆក់យកកាបូបស្ពាយពីជនរងគ្រោះម្នាក់ ក្នុងចំណោម២នាក់ ដែលបានស្ពាយនៅចំហៀងខ្លួន បណ្តាលដាច់ខ្សែកាបូបបានសម្រេច រួចក្រុមជនសង្ស័យទាំងនោះក៏បាននាំគ្នាជិះយកកាបូបស្ពាយរបស់ជនរងគ្រោះ រត់គេចខ្លួនបាត់ស្រមោលដោយសុវត្ថិភាពតែម្តង។
បន្ទាប់មក ក៏មានសមត្ថកិច្ចមូលដ្ឋាន បានចុះមកធ្វើការអន្តរាគមន៍ភ្លាមៗ និងបានធ្វើការសាកសួរជនរងគ្រោះ ហើយជនរងគ្រោះបានប្រាប់ឱ្យដឹងថា នៅក្នុងកាបូបដែលជនសង្ស័យឆក់យកទៅនោះ មាន ៖ ទូរស័ព្ទដៃចំនួន២គ្រឿង ក្នុងនោះ iPhone14pro mex មួយគ្រឿង និង iPhone 7plas មួយគ្រឿង ព្រមទាំងលុយចំនួន១៣០០ដុល្លារ និងឯកសារមួយចំនួនទៀត។
ក្រោយពេលកើតហេតុ សមត្ថកិច្ចមូលដ្ឋានក៏បាននាំជនរងគ្រោះទៅប៉ុស្ដិ៍នគរបាលរដ្ឋបាលជ័យជម្នះ ធ្វើការដាក់ពាក្យបណ្ដឹង ដើម្បីឲ្យសមត្ថកិច្ចធ្វើការស្រាវជ្រាវតាមចាប់ក្រុមជនសង្ស័យយកមកផ្តន្ទាទោសទៅតាមផ្លូវច្បាប់ជាបន្តទៀត៕
ចែករំលែកព័តមាននេះ