ADផ្ទាំងផ្សព្វផ្សាយពាណិជ្ជកម្ម

Picture

អភិបាល​រាជធានី​ជំរុញ​សមត្ថកិច្ច​ពាក់ព័ន្ធ​ទាំងអស់​យកចិត្តទុកដាក់​ខ្ពស់​ក្នុង​កិច្ច​ការពារ​រក្សា​សន្តិសុខ​សណ្តាប់ធ្នាប់​សម្រាប់​ព្រឹត្តិការណ៍​កីឡា​ស៊ី​ហ្គេ​ម​២០២៣

2 ខែ មុន
  • ភ្នំពេញ

រាជធានី​ភ្នំពេញ ៖ ប្រធាន​គណៈ​បញ្ជាការ​ឯកភាព​រាជធានី​ភ្នំពេញ ឯកឧត្តម ឃួ​ង ស្រេង បាន​ជំរុញ​

រាជធានី​ភ្នំពេញ ៖ ប្រធាន​គណៈ​បញ្ជាការ​ឯកភាព​រាជធានី​ភ្នំពេញ ឯកឧត្តម ឃួ​ង ស្រេង បាន​ជំរុញ​អាជ្ញាធរ​ខណ្ឌ​ទាំង​១៤ និង​កម្លាំង​មាន​សមត្ថកិច្ច​ទាំងអស់ យកចិត្តទុកដាក់​ខ្ពស់​ក្នុង​កិច្ច​ការពារ​រក្សា​សន្តិសុខ សុវត្ថិភាព សណ្តាប់ធ្នាប់ និង​របៀបរៀបរយ​សាធារណៈ ខណៈ​ដែល​កម្ពុជា​នឹង​ត្រូវធ្វើ​ជា​ម្ចាស់ផ្ទះ​នៃ​ការ​ប្រកួត​កីឡា​ស៊ី​ហ្គេ​ម និង​អាស៊ាន​ប៉ា​រ៉ា​ហ្គេ​ម ឆ្នាំ​២០២៣ ខាង​មុខ​នេះ ដោយ​ព្រឹត្តិការណ៍​កីឡា​ស៊ី​ហ្គេ​ម​នេះ នៅ​សល់​តែ​៥២​ថ្ងៃ​ទៀត​ប៉ុ​ណ្ណោះ​។

Picture

ឯកឧត្តម ឃួ​ង ស្រេង បាន​ជំរុញ​បែប​នេះ​នា​រសៀល​ថ្ងៃ​ទី​១៤ ខែមីនា ឆ្នាំ​២០២៣ ក្នុង​កិច្ចប្រជុំ​គណៈ​បញ្ជាការ​ឯកភាព​រដ្ឋបាល​រាជធានី​ភ្នំពេញ នៅ​សាលា​រាជធានី​ភ្នំពេញ​។

ឯកឧត្តម​អភិបាល​រាជធានី​ភ្នំពេញ​បាន​មានប្រសាសន៍​លើក​ឡើង​ថា កិច្ចប្រជុំ​នេះ​ធ្វើ​ឡើង​មួយ​ផ្នែក​ដើម្បី​ពិនិត្យ​ពី​វឌ្ឍនភាព​ការងារ​ត្រៀមសហការ​រៀបចំ​ការ​ប្រកួត​កីឡា​ស៊ី​ហ្គេ​ម និង​អាស៊ាន​ប៉ា​រ៉ា​ហ្គេ​ម ឆ្នាំ​២០២៣ ជាមួយ​អនុគណៈកម្មការ​ចំពោះ​កិច្ច និង​ការ​ពង្រឹង​កិច្ចការងារ​ការពារ​រក្សា​សន្តិសុខ សុវត្ថិភាព សណ្តាប់ធ្នាប់ និង​របៀបរៀបរយ​សាធារណៈ ក្នុង​ការ​ប្រកួត​កីឡា​នេះ ។

Picture

ឯកឧត្តម ឃួ​ង ស្រេង បាន​បន្ត​ទៀត​ថា ការងារ​ធំ​របស់​យើង​គឺ​កិច្ច​ការពារ​រក្សា​សន្តិសុខ សុវត្ថិភាព សណ្តាប់ធ្នាប់ និង​របៀបរៀបរយ​សាធារណៈ ។ ដូច្នេះ​ទេ អាជ្ញាធរ​ខណ្ឌ​ទាំង​១៤ និង​កម្លាំង​មាន​សមត្ថកិច្ច​ទាំងអស់​ត្រូវ​យកចិត្តទុកដាក់​ឱ្យ​បាន​ខ្ពស់​បំផុតកុំឱ្យ​មាន​បទល្មើស​កើតឡើង​នៅ​ក្នុង​មូលដ្ឋាន​របស់​ខ្លួន ។ ពិសេស​ថែម​ទៀត​នោះ គឺ​កិច្ច​ការពារ សន្តិសុខ ជូន​ប្រតិភូ កីឡាករ ភ្ញៀវ​ជាតិ អន្តរជាតិ ដែល​មក​ចូលរួម​ក្នុង​ពិធី​ដ៏​ធំ​នេះ ។

Picture

ឯកឧត្តម​បាន​បន្ត​ទៀត​ថា ចំពោះ​មន្ទីរ​សាធារណការ​និង​ដឹក​ជញ្ជូន​រាជធានី​ភ្នំពេញ ត្រូវ យកចិត្តទុកដាក់​ក្នុង​ការ​ជួសជុល​ផ្លូវ តុបតែង​ភ្លើង​បំភ្លឺ​សាធារណៈ ដើម្បី​លើក​សោភ័ណ​ភាព​រាជធានី​ភ្នំពេញ​ឲ្យ​កាន់តែ​មាន​ភាព​ស្រស់បំព្រង ពិសេស​ផ្លូវ​សំខាន់​ចូល​ទៅ​ក្នុង​ពិធី ដូច​ជា​ផ្លូវជាតិ​លេខ​៥ លេខ​៦ ផ្លូវ​២​ខ្សែ​ថ្មី​ចូល​ទៅ​កាន់​មហាវិថី​ឈ្នះ​ឈ្នះ និង​មហាវិថី​ឈ្នះ​ឈ្នះ​នេះ​តែ​ម្តង ។ ចំពោះ​អាជ្ញាធរ​ខណ្ឌ​ទាំង​១៤ ក្រៅពី​ពង្រឹង​សន្តិសុខ សណ្តាប់ធ្នាប់​ហើយ ការ​សម្អាត អនាម័យ​បរិស្ថាន​ក៏​ត្រូវ​យកចិត្តទុកដាក់ ជា​មួយនឹង​ការ​ចលនា​ប្រជាពលរដ្ឋ​ឱ្យ​ដាក់​ទង់ជាតិ ព្រោះ​នេះ​ជា​មុខមាត់​របស់​ប្រទេស​យើង​ទាំងមូល​។

Picture

គួរ​បញ្ជាក់​ថា ការ​រៀបចំ​ការ​ប្រកួត​កីឡា​ស៊ី​ហ្គេ​ម និង​អាស៊ាន​ប៉ា​រ៉ា​ហ្គេ​ម ឆ្នាំ​២០២៣​ខាងលើ​នេះ រដ្ឋបាល​រាជធានី​ភ្នំពេញ មិន​បាន​អនុវត្ត​ការងារ​ដាច់​ដោយឡែក​តែឯង​នោះ​ទេ តែ​ជា​ការងារ​ដែល​ត្រូវ​សហការ​ជាមួយ​អនុ​គណៈកម្មការ​ចំពោះ​កិច្ច មាន​ទាំង​ការ​រៀបចំ​សណ្តាប់ធ្នាប់ ការងារ​អនាម័យ​បរិស្ថាន ការ​ជួសជុល​កែ​លម្អ​ផ្លូវ និង​ការងារ​ចរាចរណ៍​ជាដើម បើ​ទោះបី​ការងារ​នេះ ស្ថិត​ក្នុង​ការ​គ្រប់គ្រង​និង​ទទួលខុសត្រូវ​ទាំងស្រុង​របស់​អាជ្ញាធរ​រាជធានី​ភ្នំពេញ​ក្តី ៕

Picture
Picture
Picture
Picture
Picture
Picture