គ្រោះថ្នាក់ចរាចរណ៍ម៉ូតូ និងរថយន្តរាប់រយគ្រឿងកកស្ទះ
ខេត្តព្រៃវែង ៖ ដោយសារតែការធ្វេសប្រហែសតែបន្តិចសោះ បានធ្វើឲ្យកើតមានហេតុការណ៍គ្រោះថ្នាក់ចរាចរណ៍ដ៏ធំមួយ
ខេត្តព្រៃវែង ៖ ដោយសារតែការធ្វេសប្រហែសតែបន្តិចសោះ បានធ្វើឲ្យកើតមានហេតុការណ៍គ្រោះថ្នាក់ចរាចរណ៍ដ៏ធំមួយ
ខេត្តព្រៃវែង ៖ ដោយសារតែការធ្វេសប្រហែសតែបន្តិចសោះ បានធ្វើឲ្យកើតមានហេតុការណ៍គ្រោះថ្នាក់ចរាចរណ៍ដ៏ធំមួយ ដែលបណ្តាលឲ្យស្ត្រីម្នាក់បានរងរបួសធ្ងន់ ត្រូវដឹកយកទៅសង្គ្រោះបន្ទាន់នៅឯមន្ទីរពេទ្យ ព្រមទាំងធ្វើឲ្យម៉ូតូ និងរថយន្តអ្នកដំណើររាប់រយគ្រឿងត្រូវកកស្ទះទៅមុខមិនរួច អស់រយៈពេលជាង១ម៉ោង។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១ និង៣៥នាទីរសៀល ថ្ងៃទី២៤ កញ្ញានេះ នៅលើកំណាត់ផ្លូវជាតិលេខ១ ត្រង់ចំណុចផ្លូវឡើងស្ពានហ្សឹបាសា ហៅស្ពានអ្នកលឿង ដែលស្ថិតក្នុងភូមិឧត្តម ឃុំព្រែកខ្សាយ(ក) ស្រុកពាមរក៍ ខេត្តព្រៃវែង។ ស្ត្រីដែលរងគ្រោះនៅក្នុងហេតុការណ៍នោះមានឈ្មោះ ក្រូច សារ៉េត អាយុ២២ឆ្នាំ មានទីលំនៅក្នុងភូមិកណ្តាល ឃុំឈើកាច់ ស្រុកបាភ្នំ ខេត្តព្រៃវែង។
យោងតាមការបំភ្លឺពីសាក្សីនៅកន្លែងកើតហេតុ ព្រមទាំងរបាយការណ៍របស់សមត្ថកិច្ចផងនោះបានឲ្យដឹងថា មុនពេលកើតហេតុស្ត្រីរងគ្រោះបានជិះម៉ូតូ១គ្រឿងម៉ាកហុងដា សេ125ពណ៌ខ្មៅពាក់ស្លាកលេខ ព្រៃវែង1L-5100 ធ្វើដំណើរជាមួយប្តីឈ្មោះ ឈិន ហួន អាយុ២៧ឆ្នាំ ក្នុងទិសដៅពីកើតទៅលិច គោលដៅទៅធ្វើការនៅភ្នំពេញ។ ប៉ុន្តែពេលមកដល់ចំណុចកើតហេតុ ស្រាប់តែម៉ូតូជ្រុលទៅបុកគូទម៉ូតូរ៉ឺម៉កកង់បី១គ្រឿង ដែលឈប់ចតស្ងៀមនៅចិញ្ចើមផ្លូវ បណ្តាលឲ្យម៉ូតូដួលបោកទៅនឹងថ្នល់ គ្រវាត់ស្ត្រីរងគ្រោះទៅកណ្តាលថ្នល់ គាប់ជួនពេលនោះក៏មានរថយន្តយីឌុបមួយគ្រឿងទៀត ម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ ៣C-១៥៣៦ បើកមកដល់ពីក្រោយដែរ ដោយខ្លាចកិននារីរងគ្រោះដែលខ្ទាតទៅនៅពីមុខរថយន្ត អ្នកបើកបរបានកាច់ចង្កូតគេចទៅឆ្វេងដៃតែគេចមិនផុត ធ្វើឲ្យកង់ខាងស្តាំផ្នែកមុខកិនបញ្ឆិតលើនារីរងគ្រោះ រួចក៏ជ្រុលទៅបុកជាមួយនឹងរថយន្តបាឡែន ១គ្រឿងផ្សេងទៀត ដែលបើកមកបញ្ច្រាសទិសគ្នា បណ្តាលឲ្យរថយន្តបាឡែន រងការខូចខាតតួរថយន្តផ្នែកខាងឆ្វេងយ៉ាងដំណំ។
ប្រភពព័ត៌មានដដែលនេះបានបន្តទៀតថា ក្រោយកើតហេតុភ្លាម អ្នកបើកបររថយន្តយីឌុបនោះបានឈប់រថយន្តនៅចំកណ្តាលថ្នល់ត្រង់កន្លែងកើតហេតុ ហើយរត់គេចយករួចខ្លួន តែរត់មិនរួចត្រូវអ្នកដំណើរព្រួតគ្នាស្ទាក់ចាប់យកមកវិញ ហើយដោយសារតែរថយន្តយីឌុបនោះឈប់ចំកណ្តាលថ្នល់ផង ឯអ្នកដំណើរខ្លះនាំគ្នាឈប់មើលជនរងគ្រោះដែលដេកស្តូកស្តឹងនៅលើថ្នល់ផង ទើបធ្វើឲ្យកកស្ទះចរាចរណ៍ទៅមុខលែងរួច រហូតដល់ចម្ងាយជាង១គីឡូម៉ែត្រ សូម្បីតែរថយន្តសាមុយរបស់មន្ទីរពេទ្យក៏ចូលទៅដឹកជនរងគ្រោះមិនរួចដែរ គឺស្ទះជាប់គាំងតែម្តង ប៉ុន្តែដោយមើលឃើញស្ថានភាពស្ត្រីរងគ្រោះ កាន់តែធ្ងន់ធ្ងរខ្លាំងទើបសមត្ថកិច្ចបញ្ជាឲ្យម៉ូតូដឹកយកស្ត្រីរងគ្រោះ ទៅកាន់មន្ទីរពេទ្យបង្អែកអ្នកលឿងតែម្តង ដើម្បីឲ្យក្រុមគ្រូពេទ្យជួយសង្គ្រោះ។
គួរបញ្ជាក់ថា ក្រោយពីកើតហេតុភ្លាម កម្លាំងសមត្ថកិច្ចក៏បានទៅដល់កន្លែងកើតហេតុភ្លាម ហើយបានជួយអន្តរាគមន៍សម្រួលចរាចរណ៍អស់រយៈពេលជាង១ម៉ោង ទើបអាចធ្វើចរាចរណ៍បានធម្មតាឡើងវិញ ចំណែកឯម៉ូតូ រ៉ឺម៉កកង់៣ និងរថយន្តទាំង២គ្រឿង ត្រូវបានសមត្ថកិច្ចនាំយកទៅរក្សាទុក ដើម្បីឲ្យភាគីទាំងអស់ចូលខ្លួនទៅធ្វើការដោះស្រាយនៅពេលក្រោយ៕
ចែករំលែកព័តមាននេះ