តារាសម្ដែងស្រីល្បីឈ្មោះកញ្ញា នី មុន្នីនាថ បានធ្វើអោយមហាជនអ្នកគាំទ្ររបស់នាង នាំគ្នាសម្ដែងការភ្ញាក់ផ្អើល និងផ្ទុះការចាប់អារម្មណ៍យ៉ាងខ្លាំង ក្រោយពីបានឃើញតារាសម្ដែងស្រីដែលត្រូវបានគេដាក់រហ័សនាមអោយថា
រាជធានីភ្នំពេញ ៖ តារាសម្ដែងស្រីល្បីឈ្មោះកញ្ញា នី មុន្នីនាថ បានធ្វើអោយមហាជនអ្នកគាំទ្ររបស់នាង នាំគ្នាសម្ដែងការភ្ញាក់ផ្អើល និងផ្ទុះការចាប់អារម្មណ៍យ៉ាងខ្លាំង ក្រោយពីបានឃើញតារាសម្ដែងស្រីដែលត្រូវបានគេដាក់រហ័សនាមអោយថា «តារាទឹកភ្នែក» រូបនេះ ចេញមុខមកបើកបង្ហាញនៅវីដេអូការតុបតែង លាបខ្លួនឱ្យ.ស បិទសក់ដូចកោជុក ស្លៀកពាក់ឈុតគ្រងមកុដបុរាណ ពិតជាប្លែកភ្នែកខ្លាំង និងកម្របានឃើញពីមុនមកខ្លាំងណាស់ ស្ទើរតែមិនគួរអោយជឿតែម្ដង។
មិនតែប៉ុណ្ណោះ ជាមួយនឹងការតុបតែងខ្លួនស្លៀកឈុតគំនូរបុរាណរបស់តារាស្រីរូបនេះផងដែរ ត្រូវបានអ្នកនិយមលេងនៅក្នុងបណ្ដាញទំនាក់ទំនងសង្គមហ្វេសប៊ុកទាំងប្រុសទាំងស្រី ហាក់កំពុងតែផ្ទុះការចាប់អារម្មណ៍យ៉ាងភ្លូកទឹកភ្លូកដី រហូតដល់ថ្នាក់មានការស៊ែរចែករំលែកជាហូរហែ និងបានភ្ជាប់ជាមួយមតិសរសើរមិនដាច់ពីមាត់ លើកអំពីរូបសម្រស់របស់នាងជាមួយនឹងការតែងតួដ៏ស្អាតប្លែកនេះដែរ។
ក្រោយទទួលបានការចាប់អារម្មណ៍ និងសរសើរខ្លាំងពីមហាជន ជាមួយនឹងការតុបតែងខ្លួនជានារីគំនូរបុរាណដ៏ល្អនេះ កញ្ញា នី មុន្នីនាថ ក៏បានបញ្ចេញវីដេអូនៃសកម្មភាពតុបតែងខ្លួន និង រៀបរាប់ពីផលលំបាកខ្លាំងក្នុងការតុបតែងខ្លួន ទម្រាំតែចេញជារូបរាងដ៏ប្រណីតស្អាតក្នុងឈុតមួយនេះ ទាំងការលាបខ្លួន.ស និងបិទសក់ឱ្យដូចកោជុក គឺត្រូវចំណាយពេលជាង៣ម៉ោងឯណោះ។
ដោយក្នុងនោះផងដែរ កញ្ញា នី មុន្នីនាថ ក៏បាននិយាយរៀបរាប់ខ្ទេចគ្មានសល់អំពីអត្ថន័យនៃឈុត និងការតុបតែងខ្លួនជានារីគំនូរបុរាណនេះថា «តើអ្នកដឹងទេថា បុព្វបុរសខ្មែរយើងបានបន្សល់ទុកកេរ្តិ៍ដំណែលច្រើនណាស់ មកដល់កូនចៅជំនាន់ក្រោយ ក្នុងនាមជាកូនខ្មែរត្រូវថែរក្សា និងហ៊ានបង្ហាញឱ្យគេស្គាល់ នេះជានារីគំនូរបុរាណ ជាផ្នែកមួយនៃការបង្ហាញវប្បធម៌ខ្មែរ ដល់កូនចៅជំនាន់ក្រោយឱ្យបានដឹង និងស្វែងយល់ឈុតដកស្រង់ចេញពីគំនូរបុរាណ ដែលស្ថិតនៅលើជញ្ជាំងព្រះវិហារ ព្រះកែវមរកត នៃព្រះបរមរាជវាំង ដោយប្រើប្រាស់គ្រឿងទាំងស្រុងនៃរូបគំនូរ ផាត់មុខបុរាណ លាបខ្លួន.ស និងប្រើប្រាស់តិចនិច បិទសក់ឱ្យដូចកោជុក តាមបែបបុរាណ ដែលស្ទើរតែគ្មានអ្នកដឹង និងស្គាល់នាពេលកន្លងមក»។
កញ្ញា នី មុន្នីនាថ បន្តទៀតថា «ការលាបខ្លួនឱ្យ.សតំណាងឱ្យភាពបរិសុទ្ធ ស្មោះស នៅសម័យបុរាណគេលាបខ្លួនឱ្យ.ស ដើម្បីថ្វាយខ្លួនឱ្យព្រះរាជជា ឬលាបខ្លួនឱ្យ.ស ដើម្បីរាំថ្វាយ អាទិទេព ជាដើម។ ការលាបខ្លួនឱ្យ.សនេះ មានអត្ថន័យផ្សេងៗគ្នាទៅតាមពេលវេលាសម័យកាល និងទៅតាមប្រទេសនីមួយៗនៃប៉ែកអាស៊ី តើមានមនុស្សប៉ុន្មាននាក់ ដែលស្គាល់ការតុបតែង និងស្លៀកពាក់បែបនេះ? ខ្ញុំព្យាយាមបង្ហាញអ្វីដែលខ្មែរមាន ខ្ញុំមិនបានជួយអ្វីក្រៅពីការចែករំលែក និងថែរក្សាវប្បធម៌ដ៏មានតម្លៃតាមអ្វីដែលអាចធ្វើទៅបាននោះទេ។ ខ្ញុំគ្រាន់តែសង្ឃឹមថា ជាប្រយោជន៍ដល់វប្បធម៌ខ្ញុំ បើយើងមិនស្គាល់ មិនថែ មិនបង្ហាញទេ នោះថ្ងៃណាមួយយើងនឹងបាត់បង់»។
បន្ទាប់ពីបានឃើញតារាស្រីរូបនេះ និយាយរៀបរាប់ចប់រួចមក ក៏ឃើញថា មានមហាជន ក៏ដូចជាអ្នកគាំទ្រមិនតិចនាក់នោះទេ បាននាំគ្នាចូលទៅខមិនគ្រប់ៗគ្នាថា «គាំទ្រប្អូនស្រី ក៏ដូចតារាផ្សេងទៀតដែរ តែងតែលើកយកឈុតបុរាណជាកេរ្តិ៍មរតកខ្មែរយើង មកបង្ហាញឲ្យកូនចៅជំនាន់ក្រោយបានស្គាល់ និងឈប់យល់ច្រលំថា ជារបស់ប្រទេសជិតខាងទៀត» «ស្អាតណាស់បង បងដាក់ស្បៃក្រោមខ្សែ.ក ទើបមើលទៅទំនងស្អាតជាង ហើយនឹងខ្សែឆៀងត្រូវនៅលើស្បៃ ទើបមើលទៅល្អឥតខ្ចោះ អគុណបង» «អគុណបង ដែលបានបង្ហាញអំពីឈុតទំរង់ដើមរបស់ជាតិយើង»។
ហ្វេនៗខ្លះទៀតបានបញ្ចេញមតិថា «បងគ្រងឈុតនេះហើយ លែងជាតួស្លូតហើយ ទៅតួកាចម្ដង ខ្ញុំមិនដែលឃើញអ្នកណាតែងបែបនឹងទេ អគុណបងដែលបានបង្ហាញ» «អគុណបងនាថ ដែលបានធ្វើឱ្យខ្ញុំបានស្គាល់ឈុតមួយនេះ ខ្ញុំមានអារម្មណ៍រំភើបណាស់ ពេលឃើញបងតែងឈុតមួយនេះ» «ស្អាតខ្លាំងណាស់ idol ក្មេងជំនាន់សម័យដូចខ្ញុំមិនដែលឃើញឈុតបុរាណនេះទេ លើកទី១ ធ្លាប់លឺចាស់ៗនិយាយរឿងសក់កោសជប់ ទើបឃើញ អរនេះកោសជប់បែបនឹងតើ»។ ចំណែកអ្នកខ្លះទៀតក៏បានខមិនលើកឡើងយ៉ាងដូច្នេះថា «Idol ជាមនុស្សរបស់មហាជន ចឹងកាបង្ហាញពីវប្បធម៌ និងអរិយធម៌ គឺជារឿងល្អ ព្រោះពេលដែលបង្ហាញមានគេស្គាល់បានលឿន»៕ ដោយ ៖ សុភា ដានេត
ចែករំលែកព័តមាននេះ