រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានចំអកទៅកាន់ក្រុមប្រឆាំងថា នឹងច្រណែនចំពោះការចូលមើលតាមប្រព័ន្ធតេឡេក្រាមសម្តេច ខណៈតេឡេក្រាម ដែលអ្នកភ្ជាប់ចូលមើលច្រើនជាងគេ…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានចំអកទៅកាន់ក្រុមប្រឆាំងថា នឹងច្រណែនចំពោះការចូលមើលតាមប្រព័ន្ធតេឡេក្រាមសម្តេច ខណៈតេឡេក្រាម ដែលអ្នកភ្ជាប់ចូលមើលច្រើនជាងគេ គឺប្រធានធិបតីអ៊ុយក្រែន ។
ថ្លែងក្នុងពិធីសំណេះសំណាល់ជាមួយប្រជាពលរដ្ឋ ដែលបានផ្លាស់ប្តូរទីលំនៅទៅទីតាំងថ្មី និងត្រួតពិនិត្យការដ្ឋានសាងសង់ វារីអគ្គិសនី ស្ទឹងពោធិ៍សាត់១ ស្ថិតនៅឃុំប្រម៉ោយ ស្រុកវាលវែង ខេត្តពោធិ៍សាត់ នាព្រឹក ថ្ងៃទី១៤ ខែមីនា ឆ្នាំ២០២៣ សម្តេចតេជោបញ្ជាក់ថា ខ្សែភាគយន្ត «កូនប្រុសក្រោមពន្លឺព្រះចន្ទពេញបរមីណ៌» នឹងចាប់ផ្តើមបញ្ចាំងតាមកញ្ចក់ទូរទស្សន៍បាយ័ន ចាប់ពីថ្ងៃទី២០ ខែមីនា ឆ្នាំ២០២៣ ដោយក្នុងមួយសប្តាហ៍ចាក់បញ្ចាំង ៣ភាគ។ ហើយនៅក្រោយបញ្ចាំងតាមទូរទស្សន៍ហើយ សម្តេចនឹងបង្ហោះតាមប្រព័ន្ធតេឡេក្រាមសម្តេច ដោយមានភាពងាយស្រួលជាងទូរទស្សន៍ ដោយមិនរងចាំការផ្សាយពាណិជ្ជកម្ម ដូចទូរទស្សន៍នោះទេ ។
សម្តេច ក៏បានបញ្ជាក់ថា ៖ «អ៊ីចឹងអ្នកចង់មើល អាចមើលតាមតេឡេក្រាមបាន ដោយភ្ជាប់ជាមួយតេឡេក្រាមសម្តេចបាន ខ្ញុំឃោសនាឲ្យភ្ជាប់តេឡេក្រាមទេ ។ តែតិចទៀត មានក្រុមអ្នកច្រណែនហើយ។ អានោះ គ្រាន់តែលេងហ្វេសប៊ុកចាញ់ខ្ញុំ ក៏វារករឿងខ្ញុំដែរ ឥឡូវឆាណែលតេឡេក្រាមខ្ញុំ មានចំនួន ៦១៧,២២០នាក់ ស្ថិតក្នុងចំណាត់ថ្នាក់លេខ២ លើពិភពលោក ប៉ុន្តែអ្នកដែលច្រើនជាងខ្ញុំ គឺមានជាង៩០ម៉ឺននាក់ គឺប្រធានាធិបតីអ៊ុយក្រែន ជាប់លេខ១» ។
សម្តេចបានលើកឡើងថា មូលហេតុដែលប្រធានាធីបតីអ៊ុយក្រែន មានចំនួនអ្នកតាមដានមើលតេឡេក្រាមរបស់ប្រធានាធីបតីអ៊ុយក្រែនច្រើន ដោយសារប្រទេសអ៊ុយក្រែន កំពុងមានសង្គ្រាម។ ការភ្ជាប់ឆាណែលតេឡេក្រាមនេះ មិនមែនសម្រាប់ផ្ញើសារទៅសម្តេចផ្ទាល់នោះទេ គឺគ្រាន់តែអាចតាមដានព័ត៌មានរបស់សម្តេច។ ជាក់ស្តែងទូរទស្សន៍ មិនទាន់បញ្ចាំងផងដែរ ។
ជាមួយគ្នានោះដែរ សម្តេចតេជោ ហ៊ុន សែន បានលើកឡើងថា នៅពេលខាងមុខនេះ អាចមើលខ្សែភាពយន្ត តាមឆាណែលតេឡេក្រាម បានដោយមិនចាំបាច់ស្ពាយទូរទស្សន៍ តាមខ្លួននោះទេ។ ហើយអ្នកក្រុមប្រឆាំង ក៏ដោយអាចភ្ជាប់តេឡេក្រាមសម្តេចបាន ។ អ្នកប្រឆាំងមិនអាចមកឆាឆៅ តាមតេឡេក្រាមបាននោះទេ គឺមានតែអ៊ែតមីន និងសម្តេចផ្ទាល់ ដែលអាចបង្ហោះបាន ៕
ចែករំលែកព័តមាននេះ