ខេត្តប៉ៃលិន៖ ជនជាតិថៃម្នាក់ រងរបួស ធ្លាយពោះវៀនទ្រេល ដេកដួល ក្នុងថ្លុកឈាម ត្រូវបានគេបញ្ជូនទៅសង្គ្រោះនៅមន្ទីរពេទ្យប្រទេសថៃ ខណ:ជនដៃដល់ ត្រូវបាននគរបាល ចាប់ឃាត់ខ្លួន ដោយសារតែទាស់ពាក្យសម្តីគ្នាបន្តិចបន្តួច ក៏ឈានដល់ចាក់គ្នាតែម្តង។

ហេតុការណ៍នេះ បានកើតឡើង កាលពីវេលាម៉ោង ០៣ និង ៤០នាទីរសៀល ថ្ងៃទី១៤ ខែមីនា ឆ្នាំ២០២៣ នៅចំណុចបន្ទប់ជួលយីហោ ពេជ្របុប្ផាអង្គរ ស្ថិតនៅភូមផ្សារព្រំជើង ឃុំស្ទឹងកាយ ស្រុកសាលាក្រៅ ខេត្តប៉ៃលិន។

ជនរងគ្រោះ មាន​ឈ្មោះ ប៊ូនវិសេត រ៉ាវិស៊ូត (BOONWISET RAWISUT) ភេទប្រុស អាយុ ២២ឆ្នាំ ជនជាតិថៃ ជាបុគ្គលិកកាស៊ីណូ Grand Pailin ស្នាក់នៅបណ្ដោះអាសន្ន ក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅខេត្តប៉ៃលិន រងរបួសធ្ងន់ធ្លាយពោះវៀន។

ចំណែកជនសង្ស័យ មាន​ឈ្មោះ លីកែវ ភីនីខន (LEEKAEW PINIKORN) ភេទប្រុស អាយុ ៣០ឆ្នាំ ជនជាតិថៃ ជាបុគ្គលិក កាស៊ីណូGrand Pailin ស្នាក់នៅបណ្ដោះអាសន្នភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយបានយកកូនកាំបិត ចាក់ទៅលើជនរងគ្រោះចំនួន ០១កាំបិត បណ្តាលឲ្យធ្លាយពោះវៀនតែម្តង។

មុនពេលកើតហេតុ គេឃើញជនជាតិថៃ ជាបុគ្គលិកកាស៊ីណូ ២នាក់ បានប្រកែកតឹងសរសៃក​ ដាក់គ្នា។ ភ្លាមៗនោះ ស្រាប់តែជនរងគ្រោះ ស្រែកហៅឱ្យគេជួយ ដោយធ្លាយពោះ ឈាមហូរជោកខ្លួន។

ក្រោយកើតហេតុ នគរបាលបានចាប់ឃាត់ខ្លួនជនដៃដល់ភ្លាមៗ ដើម្បីយកទៅសួរនាំ។ រីឯជនរងគ្រោះ ត្រូវបានបញ្ជូនទៅកាន់មន្ទីរពេទ្យ ក្នុងប្រទេសថៃ។ ជនសង្ស័យ ត្រូវបានឃាត់ខ្លួនជាបណ្តោះអាសន្ន ដើម្បីអនុវត្តនីតិវិធីច្បាប់៕ នីយ៉ា