រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានគូសបញ្ជាក់ថា ដោយអំពាវនាវដល់អ្នកដែលកែសម្ផស្ស គួរកុំធ្វើការសម្ផស្សឲ្យហួសហេតុពេក ហើយអ្នកដែលកែសម្ផស្សនោះ…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានគូសបញ្ជាក់ថា ដោយអំពាវនាវដល់អ្នកដែលកែសម្ផស្ស គួរកុំធ្វើការសម្ផស្សឲ្យហួសហេតុពេក ហើយអ្នកដែលកែសម្ផស្សនោះ បើសម័យ ប៉ុល ពត កើតឡើងវិញ គឺពិបាកជាងគេហើយ មិនដឹងស្លា.ប់ប៉ុន្មាននាក់ទេ ។
ថ្លែងក្នុងពិធីសំណេះសំណាលជាមួយប្រជាពលរដ្ឋ ដែលបានផ្លាស់ប្តូរទីលំនៅទៅទីតាំងថ្មី និងត្រួតពិនិត្យការដ្ឋានសាងសង់វារីអគ្គិសនី ស្ទឹងពោធិ៍សាត់១ ស្ថិតនៅ ឃុំប្រម៉ោយស្រុកវាលវែង ខេត្តពោធិ៍សាត់ នាព្រឹកថ្ងៃទី១៤ ខែមីនា ឆ្នាំ២០២៣ សម្តេចបានថ្លែងយ៉ាងដូច្នេះថា ៖ «អំពាវនាវដល់ស្ត្រីទាំងឡាយ កុំដល់ថ្នាក់ហ្នឹងពេក ដោយកែសម្ផស្សជ្រុលហួស វាធម្មជាតិរបស់វា ឲ្យវាទៅអីចឹងចុះ ប្តីស្រឡាញ់មិនស្រឡាញ់ទេ ក៏វាហីទៅ ចាំបាច់ទៅយកកម្ម យកពារអី ចាក់ថ្នាំសន្លប់ រួចហើយទៅវះ មាត់ ច្រមុះ ទេវាឲ្យប៉ុណ្ណាមក យកប៉ុណ្ណឹងទៅ ធ្វើម៉េចរូបរាងយើងវាប៉ុណ្ណឹង ប៉ុន្តែអ្នកនិយម ក៏និយម យើងក៏មិនដឹងធ្វើម៉េចដែរ សិទ្ធិរបស់គេ តែយើងគ្រាន់តែយកចិត្តទុកដាក់ ជាមួយនឹងសុខភាពអ្នកទាំងនោះ» ។
សម្តេចតេជោ បានបន្តថា អ្នកមួយចំនួន ដែលធ្វើការកែសម្ផស្ស បើសិនជារបប ប៉ុល ពត កើតឡើងវិញ នឹងស្លា.ប់ប៉ុន្មានអ្នកទេ ព្រោះថា មុខមាត់កែអស់ហើយ បើសិនរបប ប៉ុល ពត កើតឡើងវិញ គេនឹងឲ្យកាប់ដី ហាលក្តី មិនមែននៅក្រោមឆត្រ តាំងយូនោះទេ ។ ដូច្នេះ នឹងរបកមុខមាត់អស់ហើយ ចំណែកអ្នកមិនកែសម្ផស្ស គេត្រូវកំដៅថ្ងៃ គេមិនប៉ះពាល់អ្វីនោះទេ ។
សូមជម្រាបថា ការថ្លែងរបស់សម្តេចតេជោ ហ៊ុន សែន បន្ទាប់ពីក្រសួងសុខាភិបាល កាលពីថ្ងៃទី០៤ ខែមីនា ឆ្នាំ២០២៣ បានចេញសេចក្តីសម្រេចបិទមជ្ឈមណ្ឌលកែសម្ផស្ស អឹម ២៥ ប៊ីយូធី ដែលស្ថិតសង្កាត់ស្រះចក ខណ្ឌដូនពេញ បន្ទាប់ពីមានករណីស្ត្រីម្នាក់ស្លាប់ភ្លាមៗ ក្រោយវះកាត់កែសម្ផស្ស នៅមជ្ឈមណ្ឌលនេះ ។
ក្រសួងសុខាភិបាល បានបញ្ជាក់ថា ការបិទមជ្ឈមណ្ឌលកែសម្ផស្សឯកជន ដែលមានទីតាំង នៅផ្ទះលេខ៧៣B ផ្លូវលេខ៧០ សង្កាត់ស្រះចក ខណ្ឌដូនពេញ រាជធានីភ្នំពេញ ជារបស់លោកវេជ្ជបណ្ឌិត គោគ ចន្ទី ជាអ្នកទទួលខុសត្រូវ ដោយសារតែបុគ្គលិកគ្មានគុណវុឌ្ឍ និងគ្មានជំនាញវិជ្ជាជីវៈសុខាភិបាល បណ្ដាលឱ្យមនុស្សស្លា.ប់ ។
ក្រសួងសុខាភិបាល នឹងបន្តនីតិវិធីច្បាប់ ដែលមានជាធរមាន ចំពោះបុគ្គលដែលបានប្រព្រឹត្ត រួមជាមួយនឹងអ្នកទទួលខុសត្រូវ ក៏ដូចជាម្ចាស់មជ្ឈមណ្ឌលកែសម្ផស្ស អឹម ២៥ ប៊ីយូធី ៕
ចែករំលែកព័តមាននេះ