ខេត្តព្រៃវែង ៖ កូនគោឈ្មោលចម្លែកមួយក្បាលកើតមកមានជើងប្រាំមួយ ធ្វើឱ្យមានការភ្ញាក់ផ្អើលយ៉ាងខ្លាំងពីមនុស្សម្នាភូមិមួយទៅ ភូមិមួយនាំគ្នាផ្អើលមកមើល ហើយមានជំនឿថា កូនគោចម្លែកមួយនេះមានបារមីកាន់ ក៏នាំគ្នាអុជធូបអុជទៀន បន់ស្រន់សុំសេចក្តីសុខសប្បាយអ្នកខ្លះសុំឱ្យរកស៊ីកាក់កបទៀតផង ។
កូនគោចម្លែកមានជើងប្រាំមួយនេះកើតនៅភូមិក្រាំងលាវ ឃុំចាម ស្រុកកំពង់ត្របែក។
ខេត្តព្រៃវែង ៖ កូនគោឈ្មោលចម្លែកមួយក្បាលកើតមកមានជើងប្រាំមួយ ធ្វើឱ្យមានការភ្ញាក់ផ្អើលយ៉ាងខ្លាំងពីមនុស្សម្នាភូមិមួយទៅភូមិមួយនាំគ្នាផ្អើលមកមើល ហើយមានជំនឿថា កូនគោចម្លែកមួយនេះមានបារមីកាន់ ក៏នាំគ្នាអុជធូបអុជទៀន បន់ស្រន់សុំសេចក្តីសុខសប្បាយអ្នកខ្លះសុំឱ្យរកស៊ីកាក់កបទៀតផង ។
កូនគោចម្លែកមានជើងប្រាំមួយនេះកើតនៅភូមិក្រាំងលាវ ឃុំចាម ស្រុកកំពង់ត្របែក។ ទាក់ទិនកូនគោជើងប្រាំមួយមានបារមីកាន់នេះ លោកនុត សារឿន អាយុ៤៧ឆ្នាំ នៅភូមិក្រាំង លាវ ដែលជាម្ចាស់គោបានប្រាប់កោះសន្តិភាពថា រូបគាត់ជាកសិករ មានប្រពន្ធឈ្មោះយូ សាំ អាយុ៤៧ឆ្នាំ មានកូន៤នាក់សុទ្ធតែស្រី ។ ពួកគាត់បានចិញ្ចឹមមេគោចំនួន២ក្បាល ហើយអ្វីគួរឱ្យភ្ញាក់ផ្អើលនោះគឺមេគោមួយក្បាលបានផើម ហើយកើតកូនជាលើកដំបូង ក៏ប៉ះចំកូនគោចម្លែក មានជើងរហូតដល់ទៅប្រាំមួយគឺជើងក្រោយពីរ ជើងមុខពីរ តែមានដុះជើងចេញពីលើបូកខាងមុខចំនួនពីរទៀត ដែលមានភ្លៅ ជង្គង់ និងក្រចក ធ្លាក់មកដល់កខាងមុខ សំបុរស-ក្រហម ។ វាកើតបានរយៈ ពេលជាង៤ខែមកហើយ គឺកើតនៅថ្ងៃទី១ ធ្នូ ២០១០ វេលាម៉ោង៩យប់ ។
លោកនុត សារឿន បន្តទៀតថា ពេលមេគោមួយក្បាលនេះផើម ប្រពន្ធគាត់បានយល់សប្តិឃើញគេយកខ្សែ.កមាស កងដៃ កងជើងមាស ចិញ្ចៀនត្បូងយ៉ាងច្រើនសន្ធឹកសន្ធាប់ឱ្យទៅរូបគាត់ ហើយអ្វីដែលកាន់តែចម្លែកនោះ គឺនៅយប់មុនពេលកូនគោចម្លែកនេះកើត មេគោផើមចេះតែស្រែកខុសពីធម្មតានៅពេលពាក់កណ្តាលអធ្រាត្រ ។ នៅយប់ថ្ងៃមេគោកើត កូនគោចម្លែកនោះ ក្រុមគ្រួសាររបស់គាត់កំពុងអង្គុយមើលទូរទស្សន៍ទាំងអស់គ្នា រហូតដល់ចប់កម្មវិធីក៏នាំគ្នាចូលសម្រាកនៅលើផ្ទះ ។ មួយសន្ទុះស្រាប់តែមេគោស្រែកខុសពីធម្មតាទៀតទាំងកណ្តាលយប់ ធ្វើឱ្យរូបគាត់មានការងឿងឆ្ងល់យ៉ាងខ្លាំង បន្ទាប់មករូបគាត់ក៏ចុះមកខាងក្រោមផ្ទះឃើញមេគោកើតកូនចេញក្បាលមកមុនផុតត្រឹមស្មាមុខ រីឯជើងមុខបត់ទៅក្រោយ ចំណែកជើងចម្លែកទាំងពីរបត់អោបខ្លួនទៅក្រោយដែរ ប៉ុន្តែមួយសន្ទុះមក ក៏កើតរួចរាល់។
រហូតដល់ពេលព្រលឹមឡើង ក៏មានការភ្ញាក់ផ្អើលដល់អ្នកភូមិថា មានកូនគោចម្លែកកើតមកមានជើងប្រាំមួយ ក៏នាំគ្នាមកចោមរោមមើល ហើយនិយាយតៗគ្នាពីភូមិមួយទៅភូមិមួយ ធ្វើឱ្យមនុស្សម្នាភ្ញាក់ផ្អើលនាំគ្នាមកមើលជារៀងរាល់ថ្ងៃ និងអុជធូបទៀនបន់ស្រន់សុំសេចក្តីសុខ ខ្លះសុំឱ្យការរកស៊ីបានកាក់កប ហើយអ្នកខ្លះបានយកប្រាក់ដាក់បន់ស្រន់ថែមទៀតផង ។
បើតាមជំនឿអ្នកដែលមកបន់ស្រន់ ហើយត្រឡប់ទៅវិញតែងតែនិយាយតៗគ្នាថា កូនគោចម្លែកមានជើងប្រាំមួយនេះពិតជាមានបារមីខ្លាំងក្លាណាស់ ធ្វើឱ្យអ្នកស្រុក អ្នកភូមិមានជីវភាពធូរធា ជាពិសេសក្រុមគ្រួសារដែលមានកូនគោចម្លែកជើងប្រាំមួយបានសេចក្តីសុខ សប្បាយគ្មានជំងឺ អ្វីមកបៀតបៀនឡើយ ។ អ្នកភូមិរំលឹកថា រយៈពេលដែលកូនគោចម្លែកកើតមក គឺមានផុសជំងឺអុតក្តាម ពាសពេញស្រុកភូមិ ប៉ុន្តែចំពោះកូនគោជើងប្រាំមួយ និងមេគោពុំមានជំងឺអ្វីមកបៀតបៀនអ្វីទេ មានសុខភាពធម្មតានេះ ។ នៅក្នុងអំឡុងបុណ្យចូលឆ្នាំខ្មែរ៣ថ្ងៃ មនុស្សម្នា បាននាំគ្នាទៅមើល ហើយមានដាក់ប្រាក់បួងសួងសុំសេចក្តីសុខទៅតាមជំនឿរបស់ពួកគាត់ ។ លោកនុត សារឿន ម្ចាស់កូនគោចម្លែកឱ្យដឹងថា មកដល់ពេលនេះ វាមានអាយុជាង៤ខែកន្លះហើយ និងមានកម្លាំង សុខភាពធម្មតា ហើយ
អ្នកស្រុកគិតថា ជាកូនគោដែលមានបារមីកាន់ខ្លាំង ។
ទោះបីជាបែបណា នេះគឺជាអបិយជំនឿរបស់អ្នកស្រុក អ្នកភូមិដែលកាន់ព្រះពុទ្ធសាសនា និងមិនអាចកាត់ផ្តាច់ចេញបានពីសង្គមខ្មែរតាំងពីយូរលង់មកហើយ ។ អ្វីក៏ដោយឱ្យឮថា ផ្តល់សេចក្តីសុខនោះ ប្រជាជនខ្មែរ ដែលជាជាតិសាសន៍សន្សំសុខ តែនាំគ្នាទៅបន់ស្រន់ហើយ ព្រោះចង់បានសេចក្តីសុខ មានជីវភាពធូរធារ មានសុភមង្គលក្នុងជីវិតគ្រួសារ និងសង្គមជាតិ តែក៏មិនត្រូវភ្លេចឡើយថា ចង់បានសេចក្តីសុខពិតប្រាកដនោះ គឺការធ្វើអំពើល្អនេះឯង ឬនាំគ្នាប្រកាន់ខ្ជាប់សីល៥ ទើបអាចចៀសផុតពីបាបកម្មផ្សេងៗ មិនមែនទៅចូលបុណ្យគោជើងប្រាំមួយសុំសេចក្តីសុខ ហើយចិត្តនៅតែបង្កមន្ទិលហ្មងសៅទៅលើអ្នកដទៃទៀតនោះ ក៏មិនបានទទួលសេចក្តីសុខនោះទេ ៕
ចែករំលែកព័តមាននេះ