ខេត្តបន្ទាយមានជ័យ ៖ គួរឲ្យអនិច្ចាណាស់ កូនកំលោះបែរជាស្លា.ប់នៅពេលបញ្ជូនដល់មន្ទីរពេទ្យ បន្ទាប់ពីជួបគ្រោះថ្នាក់ចរាចរណ៍ ខណៈជិះគោយន្តកន្ត្រៃជាមួយបងជីដូនមួយ យកលុយទៅប្រគល់ជូនខាងស្រី ដើម្បីរៀបមង្គលការនៅថ្ងៃទី២២ ខែមីនា ឆ្នាំ២០២៣ ខាងមុខនេះ ដោយសារគោយន្តដាច់ដៃចង្កូត ហើយក៏រ៉េធ្លាក់ចូលប្រឡាយទឹកក្រឡាប់តែម្តង ចំណែកបងស្រីជីដូនមួយស្លា.ប់នៅនឹងកន្លែងកើតហេតុ ។
![](https://kohsantepheapdaily.com.kh/wp-content/uploads/2023/03/a8baa56554f96369ab93e4f3bb068c22-4.jpg)
បើតាមនគរបាលស្រុកថ្មពួក បានឲ្យដឹងថា នៅថ្ងៃទី៨ ខែមីនា ឆ្នាំ២០២៣ វេលាម៉ោង០៣និង៤០នាទីទៀបភ្លឺ មានករណីគ្រោះថ្នាក់ចរាចរណ៍បង្កឡើងដោយខ្លួនឯង ខណៈគោយន្តកន្ត្រៃធ្លាក់ប្រឡាយទឹក នៅចំណុចកំណាត់ផ្លូវលេខ២៥៦៣ (ថ្មពួកបឹងត្រកួន) ខាងកើតវត្តគោករមៀត ប្រហែល៣០០ម៉ែត្រ ចន្លោះគីឡូម៉ែត្រលេខ១២-១៣ ស្ថិតក្នុងភូមិគោករមៀត ឃុំគោករមៀត ស្រុកថ្មពួក ខេត្តបន្ទាយមានជ័យ ។
![](https://kohsantepheapdaily.com.kh/wp-content/uploads/2023/03/903ce9225fca3e988c2af215d4e544d3-4.jpg)
នគរបាលបានបញ្ជាក់ថា មុនពេលកើតហេតុ ឈ្មោះ ឡាត់ សុខា ភេទប្រុស អាយុ៣៦ឆ្នាំ រស់នៅភូមិបឹងតាស្រី ឃុំគោករមៀត ស្រុកថ្មពួក ខេត្តបន្ទាយមានជ័យ បានបើកបរគោយន្ដកន្ត្រៃយកលុយទៅប្រគល់ឲ្យម្តាយឪពុកខាងស្រី នៅភូមិគោកត្រាច ឃុំគោកស្នួល ស្រុកក្រឡាញ់ ខេត្តសៀមរាប ក្នុងទិសដៅពីលិចទៅកើត និងរួមដំណើរមានគ្នា០៧នាក់ (កូនកំលោះ-កូនក្រមុំ) និងមានដាក់អុសផងដែរ។ ខណៈពេលបើកមកដល់ចំណុចកើតហេតុខាងលើ គោយន្តកន្ត្រៃក៏បានជាប់កាំលាវ (ចង្កូត) ហើយក៏រ៉េក្បាលគោយន្តកន្ត្រៃធ្លាក់ចូលប្រឡាយជ្រៅខាងឆ្វេង ក្រឡាប់តែម្ដង បណ្ដាលអោយអ្នកបើកររួមដំណើរ ៖
![](https://kohsantepheapdaily.com.kh/wp-content/uploads/2023/03/0a09c8844ba8f0936c20bd791130d6b6-5.jpg)
១/- ឈ្មោះ ព្រឿន មឹក ភេទស្រី អាយុ៣៣ឆ្នាំ (ស្លា.ប់) នៅនឹងកន្លែងកើតហេតុ, ២/- ឈ្មោះ ព្រឿន សៀត ភេទស្រី អាយុ៣៦ឆ្នាំ របួសធ្ងន់, ៣/- ឈ្មោះ អិន អាន ភេទប្រុស អាយុ៣៥ឆ្នាំ របួសបាក់ដៃ, ៤/- ឈ្មោះ ឈី វ៉ាន់ថៃ ភេទប្រុស អាយុ១៨ឆ្នាំ កូនកំលោះ (ស្លា.ប់) ខណៈពេលបញ្ជូនដល់មន្ទីរពេទ្យបង្អែកស្រុកថ្មពួក, ៥/ -ឈ្មោះ ជាតិ សុខន ភេទស្រី អាយុ១៩ឆ្នាំ រស់នៅភូមិគោកត្រាច ឃុំគោកស្នួល ស្រុកក្រឡាញ់ ខេត្តសៀមរាប (កូនក្រមុំ) របួសបាក់ដៃឆ្វេង, ៦/- ឈ្មោះ ហាប់ តល់ ភេទប្រុស អាយុ៥៥ឆ្នាំ រស់នៅភូមិជាមួយគ្នា របួសបាក់ជើងខាងស្ដាំ ចំណែកអ្នកបើកបរពុំមានរងរបួសទេ។
![](https://kohsantepheapdaily.com.kh/wp-content/uploads/2023/03/2b24d495052a8ce66358eb576b8912c8-3.jpg)
ក្រោយទទួលបានដំណឹងខាងលើភ្លាម កម្លាំងប៉ុស្ដិ៍បានសហការជាមួយកម្លាំងជំនាញចរាចរណ៍ស្រុកថ្មពួក បានចុះទៅដល់កន្លែងកើតហេតុ និងដឹកអ្នករបួសយកទៅសង្គ្រោះនៅមន្ទីពេទ្យបង្អែកស្រុកថ្មពួក។ ចំណែកអ្នកស្លា.ប់ សមត្ថកិច្ចបានប្រគល់ជូនសាច់ញាតិ ដើម្បីដឹកយកទៅធ្វើបុណ្យតាមប្រពៃណី៕
![](https://kohsantepheapdaily.com.kh/wp-content/uploads/2023/03/a5e00132373a7031000fd987a3c9f87b-3.jpg)
![](https://kohsantepheapdaily.com.kh/wp-content/uploads/2023/03/8d5e957f297893487bd98fa830fa6413-3.jpg)
ចែករំលែកព័តមាននេះ