ការបោះឆ្នោតក្នុងប្រទេសបង្កក្តីបារម្ភលើផ្នែកសេដ្ឋកិច្ច
តុលាការកំពូលរបស់ប្រទេសកេនយ៉ាបានសម្រេចថា ការបោះឆ្នោតជ្រើសរើសប្រធានាធិបតីកាលពីខែមុននេះ នឹងត្រូវចាត់ទុកជាមោឃៈ និង
ទីក្រុងណៃរ៉ូប៊ី ៖ តុលាការកំពូលរបស់ប្រទេសកេនយ៉ាបានសម្រេចថា ការបោះឆ្នោតជ្រើសរើសប្រធានាធិបតីកាលពីខែមុននេះ នឹងត្រូវចាត់ទុកជាមោឃៈ និងបញ្ជាឲ្យបោះឆ្នោតជាថ្មីមួយទៀត ។
ការសម្រេចចិត្តនេះកើតឡើងបន្ទាប់ពីមានការចោទប្រកាន់ថា ការបោះឆ្នោតមានភាពមិនប្រក្រតី និងបង្កការភ្ញាក់ផ្អើលដល់វិនិយោគិន។ ការធ្វើដូច្នេះបានបង្កឲ្យទីផ្សារភាគហ៊ុនរបស់ប្រទេសនេះឈប់ដំណើរការ ហើយតម្លៃរូបិយវត្ថុធ្លាក់ចុះ ។
អ្នកតាមដានបារម្ភថា សេចក្តីសម្រេចនេះអាចនឹងបង្កឲ្យមានអំពើហិង្សា ដូចធ្លាប់កើតមានឡើងក្នុងឆ្នាំ២០០៧ដែរ ។
លោក John Ashbourne មកពី Capital Economics បានព្យាករកាលពីមុនពេលបោះឆ្នោតថា ការលូតលាស់សេដ្ឋកិច្ចនឹងធ្លាក់ចុះ៣% ប្រសិនបើមានវិបត្តិនេះកើតមានឡើង ។
កសិកម្ម គឺជាប្រភពការងារ និងវិស័យធំជាងគេរបស់ប្រទេសនេះ ដែលស្មើ២៥%នៃផលិតផលក្នុងស្រុកសរុប (GDP) និងស្មើ៥០%នៃប្រាក់ចំណូលបានមកពីការនាំចេញ ក្នុងនោះមានផលិតផលចម្បងៗដូចជា តែ កាហ្វេ និងផ្លែស្វាយ ។
កេនយ៉ាក៏ពឹងផ្អែកលើវិស័យទេសចរណ៍ផងដែរ ដែលស្មើជិត១០%នៃ GDP ។ នេះបើយោងតាមក្រុមប្រឹក្សាធ្វើដំណើរ និងទេសចរណ៍ពិភពលោក ។ វិស័យនេះបានផ្តល់ការងារដល់ពលរដ្ឋប្រមាណ១លាននាក់ និងអាចទាក់ទាញភ្ញៀវទេសចរអន្តរជាតិដល់ទៅ១,២លាននាក់ក្នុងឆ្នាំនេះ ។
ប៉ុន្តែចំនួនភ្ញៀវទេសចរបានធ្លាក់ចុះប្រមាណ១ភាគ៣ បន្ទាប់ពីការផ្ទុះអំពើហិង្សាកាលពីឆ្នាំ២០០៧ និង២០០៨ ។ រីឯអំពើភេរវកម្មដែលកើតមានឡើងក្នុងឆ្នាំ២០១៣ និង២០១៥ ក៏បានប៉ះពាល់ដល់វិស័យទេសចរណ៍ ដែរ ។
មូលនិធិរូបិយវត្ថុអន្តរជាតិ (IMF) ព្យាករថា សេដ្ឋកិច្ចកេនយ៉ានឹងលូតលាស់ជាង៦%ក្នុងឆ្នាំនេះ និង៦,៥%ក្នុងឆ្នាំក្រោយ ។ យ៉ាងណាក្តី ការលូតលាស់សេដ្ឋកិច្ចរបស់ប្រទេសនេះគ្មានភាពរឹងមាំខ្លាំងក្លាទេ ។
ការពឹងផ្អែកលើវិស័យកសិកម្ម បានធ្វើឲ្យប្រទេសនេះងាយនឹងទទួលរងផលប៉ះពាល់ពីអាកាសធាតុមិនល្អ ហើយធនាគារពិភពលោកព្យាករថា GDP នឹងធ្លាក់ចុះ០,៦%ក្នុងឆ្នាំនេះ ដោយសារគ្រោះរាំងស្ងួត ។
ប្រទេសនេះក៏មានអត្រាអ្នកគ្មានការងារធ្វើច្រើនផងដែរ ។ នេះបើយោងតាមធនាគារពិភពលោក ។
ប្រជាពលរដ្ឋកេនយ៉ាប្រមាណ៤០% កំពុងតែរស់នៅក្នុងភាពក្រីក្រ ហើយអត្រាអតិផរណាបានកើនឡើងដល់១០,៣%ឯណោះនៅខែមីនា៕
ចែករំលែកព័តមាននេះ