គ្រោះថ្នាក់ចរាចរ២ករណីសម្លា.ប់មនុស្ស៣នាក់របួសធ្ងន់២នាក់
ខេត្តកំពង់ចាម ៖ គ្រោះថ្នាក់ចរាចរចំនួន២ករណីផ្សេងគ្នា ក្នុងនោះមាននៅស្រុកចំការលើ ដោយបុរសពីរនាក់
ខេត្តកំពង់ចាម ៖ គ្រោះថ្នាក់ចរាចរចំនួន២ករណីផ្សេងគ្នា ក្នុងនោះមាននៅស្រុកចំការលើ ដោយបុរសពីរនាក់ បានស្រវឹងស្រា ជិះម៉ូតូបុករថយន្តពីក្រោយរបួសធ្ងន់ និងស្រុកព្រៃឈរ នៅព្រឹកថ្ងៃទី១៨ ខែសីហា ឆ្នាំ២០១៧ រវាងម៉ូតូ និងរថយន្ត បណ្តាលឲ្យស្លាប់ចំនួន៣នាក់ភ្លាមៗតែម្តង ។
តាមរបាយការណ៍របស់លោកវរៈសេនីយ៏ទោ ខេង ស្រេង អធិការនគរបាលស្រុកចំការលើ បានឲ្យដឹងថា ៖ នៅវេលាម៉ោង១០និង១៥នាទីយប់ ថ្ងៃទី១៦ ខែសីហា ឆ្នាំ២០១៧ លើផ្លូវជាតិលេខ៧១ ត្រង់ចំណុចភូមិក្បាលហុងចាស់ ឃុំល្វាលើ ស្រុកចំការលើ មានម៉ូតូ១គ្រឿងម៉ាកស្មាស ពាក់ស្លាកលេខ ស្វាយរៀង ១D-២១៨៣ បើកបរដោយឈ្មោះ វ៉ា គឹមសុង ភេទប្រុស អាយុ២៣ឆ្នាំ មិនមានពាក់មួកសុវត្ថិភាព រស់នៅភូមិល្វាត្បូង ឃុំស្វាយទាប ស្រុកចំការលើ បានឌុបឈ្មោះ ឌឿន ពយ ភេទប្រុស អាយុ២៦ឆ្នាំ នៅភូមិស្ពឺកើត ឃុំស្ពឺ ស្រុកចំការលើ ដោយមិនពាក់មួកសវុត្ថិភាពដូចគ្នា បានទៅបុករថយន្តម៉ាកហ៊ីយ៉ានដាយ ពណ៌ស ១គ្រឿង ពាក់ស្លាកលេខ ភ្នំពេញ ៣A-៧៣៩១ ដែលចតនៅកៀនផ្លូវ ។
ករណីនេះបណ្តាលឲ្យអ្នកជិះម៉ូតូទាំង២នាក់រងរបួសធ្ងន់ ត្រូវបានបញ្ជូនមកសង្គ្រោះនៅមន្ទីរពេទ្យខេត្តទាំងយប់ មូលហេតុនេះ ត្រូវបានរកឃើញដោយបណ្តាលមកពីអ្នកបើកបរស្រវឹងស្រា ។
ចំពោះករណីទី២វិញ ត្រង់ចំណុចកំណាត់ផ្លូវខេត្តលេខ៧០ ក្នុងភូមិជ្រៃវៀន ឃុំជ្រៃវៀន ស្រុកព្រៃឈរ មានករណីគ្រោះថ្នាក់ចរាចរណ៏មួយបានកើតឡើងដោយរថយន្តពណ៌ស ១គ្រឿង ពាក់ស្លាកលេខ ភ្នំពេញ ២AP-៥៨២៧ ដោយអ្នកបើកបររត់គេចខ្លួនបាត់ បានបុកជាមួយនឹងម៉ូតូ១គ្រឿងម៉ាក C ១២៥ ពណ៌ខ្មៅ ពាក់ស្លាកលេខ កំពង់ចាម ១G-៩៧២៥ បើកបរដោយឈ្មោះ ឆាយ ភេទប្រុស អាយុ៥៦ឆ្នាំ នៅភូមិបន្ទាយរឹង ឃុំជ្រៃវៀន ស្រុកព្រៃឈរ នៅវេលាម៉ោង១០ព្រឹក ថ្ងៃទី១៨ ខែសីហា ឆ្នាំ២០១៧ បណ្ដាលឲ្យស្លាប់មនុស្សចំនួន៣នាក់ រួមទាំងអ្នកអង្គុយពីក្រោយ២នាក់មាន ១-ឈ្មោះ សុខ ហ៊ាង ភេទស្រី អាយុ៦០ឆ្នាំ និងក្មេងប្រុសអាយុ១០ឆ្នាំ ឈ្មោះ សុខ លាប រស់នៅភូមិទួលតាកោ ឃុំជ្រៃវៀន ស្រុកព្រៃឈរ ។
នគរបាលចរាចរណ៍ផ្លូវគោកខេត្តបញ្ជាក់ថា ៖ ករណីដែលបណ្តាលឲ្យស្លាប់មនុស្សដល់ទៅ៣នាក់នេះ មូលហេតុដោយសារតែម៉ូតូបើកជែងជាមួយនឹងរថយន្ត ដែលបើកស្របទិសគ្នា ក្នុងទិសដៅពីត្បូងទៅជើង វត្ថុតាងម៉ូតូ និងរថយន្តត្រូវបាននាំមករក្សាទុក នៅអធិការដ្ឋាននគរបាលស្រុកព្រៃឈរដើម្បីដោះស្រាយទៅតាមផ្លូវច្បាប់ ៕
ចែករំលែកព័តមាននេះ