ខេត្តកំពង់ស្ពឺ ៖ កាលពីព្រឹកថ្ងៃទី២២ ខែកុម្ភៈ ឆ្នាំ២០២៣ លោក លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា…
ខេត្តកំពង់ស្ពឺ ៖ កាលពីព្រឹកថ្ងៃទី២២ ខែកុម្ភៈ ឆ្នាំ២០២៣ លោក លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា បានដឹកនាំប្រតិភូមេធាវីមួយក្រុម ចូលរួមធ្វើបទឧទេ្ទសនាម ស្តីពី “គោលការណ៍ធំៗនៃច្បាប់” ជូនដល់មន្ត្រីមជ្ឈមណ្ឌល និងសិក្ខាកាមវគ្គហ្វឹកហ្វឺនជំនាញអង្គរក្សពិសេស ជំនាន់ទី២៥ ចំនួន៥៧០រូប នៅមជ្ឈមណ្ឌលហ្វឹកហ្វឺនភ្នំស្រង់ នៃបញ្ជាការដ្ឋានអង្គរក្ស ស្ថិតនៅភូមិស្វាយ ឃុំស្រង់ ស្រុកគងពិសី ខេត្តកំពង់ស្ពឺ ។
នាឱកាសនោះដែរ ក៏មានកិច្ចស្វាគមន៍យ៉ាងកក់ក្តៅពីឧត្តមសេនីយ៍ឯក យ៉ាត ទូច មេបញ្ជាការរង និងជានាយខុទ្ទកាល័យបញ្ជាការដ្ឋានអង្គរក្ស និងការធ្វើរបាយការណ៍ អំពីស្ថានភាពភូមិសាស្ត្រ និងសកម្មភាពការងារហ្វឹកហ្វឺន ដោយឧត្តមសេនីយ៍ឯក យីប កូយ នាយកមជ្ឈមណ្ឌលហ្វឹកហ្វឺនភ្នំស្រង់ ព្រមទាំងបានជូនដំណើរ ប្រធានគណៈមេធាវី ធ្វើទស្សនកិច្ចនៅស្ទូឌីយោថតភាពយន្ត និងសំណេះសំណាលជាមួយក្រុមការងារផលិតភាពយន្តរឿង “កូនប្រុសក្រោមពន្លឺព្រះច័ន្ទពេញបរមី” និងទស្សនកិច្ចអគារទីចាត់ការ បណ្ណាល័យ ព្រមទាំងសមិទ្ធផលនានា នៅក្នុងមជ្ឈមណ្ឌលហ្វឹកហ្វឺន ផងដែរ ។
លោក លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា បានថ្លែងនូវមតិស្វាគមន៍ ទៅកាន់សិក្ខាកាម និងបានធ្វើបទឧទេ្ទសនាម ចែករំលែកច្បាប់ ស្តីអំពី ៖
-លិខិតបទដ្ឋានគតិយុត្តនៃព្រះរាជាណាចក្រកម្ពុជា
-ស្ថាប័នធំៗមានកំណត់ក្នុងរដ្ឋធម្មនុញ្ញ
-តួអង្គសំខាន់ៗនៃតួអង្គតុលាការ
-ការទទួលខុសត្រូវផ្នែកច្បាប់ ។
លោក លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា បានសម្តែងអំណរគុណដល់នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការដ្ឋានអង្គរក្ស ចំពោះការអញ្ជើញលោកចូលរួមធ្វើបទឧទេ្ទសនាម ផ្សព្វផ្សាយអំពីគោលការណ៍ច្បាប់ និងអរគុណដល់សិក្ខាកាមទាំងអស់ ដែលបានយកចិត្តទុកដាក់ ត្រងត្រាប់ស្តាប់ កត់ត្រា នូវចំណុចសំខាន់ៗ ដែលបានធ្វើបទបង្ហាញនោះ ៕
ចែករំលែកព័តមាននេះ